Puha Fehuʻi
◼ ʻI he ngaahi founga ʻaonga fē ʻe lava ke tau tokoni ai ki he kau tāimuʻá?
Takatakai ʻi he māmaní lolotonga ʻa e taʻu fakangāue 2009, ne ofi ʻi he fanga tokoua mo e fanga tuofāfine ʻe 800,000 naʻá nau ngāue ko e kau tāimuʻa tuʻumaʻu mo e kau tāimuʻa makehe. Ko e kau sevāniti taimi kakato ko ení ʻoku nau feilaulauʻi ʻa e ʻuluaki fua ʻo honau taimí, iví, mo ʻenau ngaahi koloa fakamatelié kae malava ʻo fakamafola ʻa e ongoongo lelei ʻo e puleʻangá. (Pal. 3:9) Kuo pau pē ʻoku fakahōifua moʻoni kia Sihova ʻa ʻenau ngaahi feingá! ʻI he ngaahi founga fē ʻe lava ke tau tapua atu ai ʻa e anga ʻo e vakai ʻa Sihová pea poupou ki heʻenau fiefiá mo e kātakí ʻi he tafaʻaki ko eni ʻo e ngāué?
Ko e moʻoni ko ʻetau ngaahi lea filifili leleí ʻe fakalototoʻaʻi nai ai kinautolu ke hokohoko atu ʻi he ngāue ko ha kau tāimuʻá. (Pal. 25:11) ʻE lava ke tau fengaʻunuʻaki ʻetau taimi-tēpile fakauiké kae lava ke tau ngāue fakataha mo kinautolu ʻi he ngāue fakafaifekaú? ʻI he taimi ʻoku tau ngāue fakataha aí, ʻe lava ke tau fokotuʻu atu ke ngāueʻaki ʻa ʻetau meʻalelé kae ʻikai ko haʻanautolú. Pea kapau ʻoku tau heka ʻi heʻenau meʻalelé, mahalo ʻe lava ke tau fai ha foaki ke tokoni ki hono feau ʻenau ngaahi fakamolé. (1 Kol. 13:5; Fili. 2:4) Te tau toe fakahāhā ʻa ʻetau poupou anga-ʻofá ʻaki hono fakahaaʻi ʻa e anga-talitali kakai pea fakaafeʻi ʻi he taimi ki he taimi ʻa e kau tāimuʻá ki hotau ʻapí ki ha maʻu meʻatokoni.—1 Pita 4:8, 9.
ʻOku fakapapauʻi mai ʻe he Tohi Tapú ʻe tokonaki ʻe Sihova ʻa e ngaahi fiemaʻu maʻá e faʻahinga ʻoku nau fuofua kumi ki hono puleʻangá. (Sāme 37:25; Mt. 6:33) Ko e founga ʻe taha ʻokú ne fai ai ʻení ʻoku fakafou ia ʻi heʻetau fetokouaʻaki faka-Kalisitiane anga-ʻofá. (1 Sione 3:16-18) Ko e moʻoni, ko e kau tāimuʻá ʻoku ʻikai te nau ʻamanekina ko honau ngaahi fatongia fakaepaʻangá ʻe tokangaʻi ia ʻe he niʻihi kehé. Pea heʻikai nai te nau tamuʻomuʻa ʻi hono fakahaaʻi ki he niʻihi kehé fekauʻaki mo e taimi ʻoku nau hokosia ai ha fiemaʻú. Kae kehe, ʻe lava ke tau tokoni ki he kau tāimuʻa faitōnungá ke ‘lave atu ʻetau meʻa hulú ki heʻenau meʻa taʻeaʻú’ ʻi ha ngaahi founga ʻaonga ʻaki ʻa e hoko ʻo tokanga pea fakatokanga meʻa.—2 Kol. 8:14, 15.
ʻI he taimi naʻe fononga ai ʻa Fīpē, ko ha ʻevangeliō faivelenga ʻi he ʻuluaki senitulí ʻi he fakatahaʻanga Senikeleá, ki Lomá, naʻe fakalototoʻaʻi ʻe Paula ʻa e fanga tokoua ʻi Lomá: “Ke mou tali lelei ia ʻi he ʻEiki, ʻa ia ʻoku tāu mo e kau lotu ke fai; pea ka ai ha meʻa te ne fiemaʻu ai haʻamou tokoni, pea mou poupou ai ia.” (Loma 16:1, 2) ʻOku tau maʻu ʻa e faingamālie ke fakahāhā ʻa e poupou anga-ʻofa tatau ki he faʻahinga ʻi heʻetau fakatahaʻangá ʻoku nau fanongonongo taʻetuku ʻa e ongoongo leleí ko ha kau tāimuʻa tuʻumaʻu mo e kau tāimuʻa makehe.—Ng. 5:42.