Faifakamoʻoni Fale-ki-he-Fale
1. Ko e hā ʻa e fehuʻi ʻoku malanga hake ʻi he fekauʻaki mo e ngāue fakafaifekau fale-ki-he-falé, pea ko e hā hono ʻuhingá?
1 “Ko e faʻahinga ʻoku nau taukei ʻi he ngaahi founga kehekehe ʻo hono fakamafola atu ʻa e Moʻoní te nau loto-tatau ko e feingangāue fakamalanga fale ki he fale ʻo ngāueʻaki ʻa e MILLENNIAL DAWN, ko e founga ola lelei taha ia ʻo hono malangaʻi ʻa e Moʻoní ʻi he aʻu mai ki he lolotonga ní.” Ko e fakamatala ia mei he Zion’s Watch Tower ʻo Siulai 1, 1893, ʻa ia naʻe fakamatalaʻi ai ʻa e mahuʻinga ʻo e ngāue fakafaifekau fale-ki-he-falé. ʻOku vakai ki ai ʻa e kakai takatakai ʻi he māmaní ko ha fakaʻilonga makehe ia ʻo e Kau Fakamoʻoni ʻa Sihová. ʻOku kei mahuʻinga ʻa e founga ko ʻení, koeʻuhí he ʻoku toe faingataʻa ange ke maʻu ʻa e kakaí ʻi honau ʻapí ʻi he ngaahi fonua ʻe niʻihi?
2. Ko e hā ʻa e makatuʻunga Fakatohitapu ki he faifakamoʻoni fale-ki-he-falé?
2 Fakatohitapu mo Mahuʻinga: ʻOku ʻi ai ʻa e makatuʻunga Fakatohitapu ʻo e faifakamoʻoni fale-ki-he-falé. Naʻe fakahinohinoʻi ʻe Sīsū ʻa e kau ākonga ʻe toko 70 ke nau ō tautau toko ua ki he ngaahi ʻapi ʻo e kakaí. (Luke 10:5-7) Taimi nounou hili ʻa e pekia ʻa Sīsuú, ʻoku pehē ʻe he Tohi Tapú fekauʻaki mo ʻene kau ākongá: “Ko e ʻaho kotoa pē, ʻi he Temipale pea ʻi ʻapi, naʻe ʻikai tuku ʻenau ako mo malangaʻaki” ʻa e ongoongo leleí. (Ng. 5:42) Naʻe toe faiako faivelenga ʻa e ʻapositolo ko Paulá mei he fale ki he fale.—Ng. 20:20.
3. Ko e hā ʻa e ngaahi ʻaonga ʻo e faifakamoʻoni fale-ki-he-falé?
3 ʻOku hokohoko atu ʻa e hoko ʻa e faifakamoʻoni fale-ki-he-falé ko ha founga mahuʻinga ia ʻo hono fakamafola atu ʻa e ongoongo leleí he ʻahó ni. ʻOku ʻai ai kitautolu ke tau “ʻeke” pe kumi ʻa e faʻahinga tāú ʻi ha founga hokohoko mo maau. (Mt. 10:11) ʻOku ongoʻi tauʻatāina ange ʻa e kakaí ʻi honau ʻapí. Ko e fetalanoaʻaki femātaaki mo kinautolú—fanongo ki honau leʻó, sio ki he anga ʻo honau matá mo fakatokangaʻi ʻa honau ngaahi ʻātakaí—ʻoku ʻai ai ke tau ʻiloʻi ʻa e ngaahi meʻa ʻoku nau mahuʻingaʻia aí mo hohaʻa ki aí. ʻOku faʻa ʻomai ai ʻa e faingamālie lelei ke tau fai ha fetalanoaʻaki lahi ange.
4. ʻE lava fēfē ke tau ʻai ke ola lelei ange ʻa e faifakamoʻoni fale-ki-he-falé?
4 Fai ha Feʻunuʻaki Fakafoʻituitui: Naʻe loto-lelei ʻa e ʻapositolo ko Paulá ke fai ha ngaahi feʻunuʻaki fakafoʻituitui “koeʻuhi ko e Kosipeli.” (1 Kol. 9:23) Mahalo ʻe lava ke tau feʻunuʻaki ʻetau taimi-tēpilé ke malanga ai he taimi ʻoku ngalingali ʻe tokolahi ange ai ʻa e kakai ʻi ʻapí, hangē ko e efiafí, ʻi he ngaahi fakaʻosinga uiké, pe ko e ngaahi ʻaho mālōloó. Tauhi ha lēkooti ʻo e ngaahi ʻapi ʻoku ʻikai ʻi ai ha tahá, pea toe fai ha feinga ʻi ha ʻaho kehe ʻo e uiké pe ʻi ha taimi kehe he ʻaho ko iá.
5. ʻE anga-fēfē nai hano fakakau atu ʻa e faʻahinga ʻoku fakangatangata honau tuʻunga moʻui leleí ki he ngāue fale-ki-he-falé?
5 Naʻa mo e faʻahinga ʻoku fakangatangata ʻenau tuʻunga moʻui leleí ʻe lava ke nau kau ʻi he malanga fale ki he falé. Mahalo ʻe lava ke fai ha ngaahi fokotuʻutuʻu ke ʻalu mo ha faʻahinga pehē ki he ngaahi ʻapi ʻoku faingofua ke hū ki aí, ʻo ʻai ai ke malava ʻo nau ngāue ʻi ha tuʻunga vave fakafiemālie. Ko ha tuofefine ʻe taha naʻe nounou ʻene mānavá naʻá ne malava ke ʻaʻahi ki ha ʻapi pē ʻe taha ʻi he haafe houa kotoa pē. Neongo ia, ko ha fiefia ē mo ha fiemālie naʻá ne ongoʻí ʻi he hili hono fakakau ia ki he kulupu malangá!
6. Ko e hā ʻoku totonu ai ke tau ʻai ʻa e faifakamoʻoni fale-ki-he-falé ko ha tafaʻaki tuʻumaʻu ia ʻo ʻetau ngāue fakafaifekaú?
6 ʻOku hokohoko atu ʻa hono maʻu ʻa e faʻahinga tokolahi hangē ha sipí ʻi he ngāue matapā-ki-he-matapaá. Naʻe tukituki atu ha tokotaha malanga ʻi ha matapā pea naʻe tala ange: “Hū mai. ʻOku ou ʻiloʻi koe. Naʻá ku lotu ki he ʻOtuá ke ne ʻomai ha taha ke tokoniʻi au, peau fanongo leva ki he tukituki ʻi he matapaá. Kuó Ne fanongo mai kiate au pea fekau mai koe.” ʻOku fakamoʻoniʻi ʻe he ngaahi olá ʻoku poupouʻi ʻe Sihova ʻa e founga malanga ko ʻení. (Mt. 11:19) Fakapapauʻi ke ʻai ʻa e faifakamoʻoni fale-ki-he-falé ko ha tafaʻaki tuʻumaʻu ia ʻo hoʻo ngāue fakafaifekaú.