Loto-Toʻa kae Fakatupu Melino
1 Ko e kakai tokolahi ʻoku tau malanga ki aí ʻoku nau fakahaaʻi ʻa e ngaahi tui loto-moʻoni ʻoku kehe ia mei he moʻoni Fakatohitapú. Lolotonga kuo pau ke tau malanga loto-toʻa, ʻoku tau toe loto foki ke “nofo melino pe mo e kakai kotoa pe,” pea fakaʻehiʻehi mei hano fai ha fakatupu ʻita noaʻia. (Loma 12:18; Ng. 4:29) ʻE lava fēfē ke tau hoko ʻo loto-toʻa kae fakatupu melino ʻi heʻetau ʻoatu ʻa e pōpoaki ʻo e Puleʻangá?
2 Kumi ki ha Ngaahi Meʻa ke Fai Ai ha Felotoi: ʻOku fakaʻehiʻehi ʻa e tokotaha fakatupu melinó mei he fakakikihí. ʻE ʻikai ke fiefanongo mai ʻa e tokotaha-ʻapí ki heʻetau pōpoakí kapau ʻoku tau fakahalaki ʻikai fiemaʻu ʻa ʻene ngaahi tui mālohí. Kapau ko e fakamatala hala ʻokú ne ʻomaí, ʻe fakapotopoto ange nai ke ʻoatu ha fakakaukau te tau loto-tatau ai mo iá. ʻI hono fakamamafaʻi ʻa e meʻa ʻoku tau tui tatau aí, ʻe malava nai ai ke tau toʻo atu ha ongoʻi ʻita pē pea aʻu ai ki hono lotó.
3 ʻOku tau fakangaloku pe fakavaivaiʻi nai ʻa e moʻoní kapau te tau tukunoaʻi pē ʻa e fakakaukau hala ʻa e tokotaha-ʻapí? ʻIkai. ʻI he tuʻunga ko e kau faifekau Kalisitiané, ko ʻetau ngāué ʻoku ʻikai ko hono fakahalaki ʻa e ngaahi fakakaukau hala kotoa pē ʻoku tau fehangahangai mo iá, ka ko hono malangaʻi ʻa e ongoongo lelei ʻo e Puleʻanga ʻo e ʻOtuá. (Mt. 24:14) ʻI he ʻikai ke fuʻu māfana ʻi hono ʻomai ʻe ha taha ha fakakaukau hala, ʻe lava ke tau vakai ki ai ko ha faingamālie ia ke ʻiloʻi ai ʻa ʻene fakakaukaú.—Pal. 16:23.
4 Fakangeingeiaʻi: ʻOku ʻi ai ha taimi kuo pau ai ke tau loto-toʻa mo loto-lahi ʻi hono fakahalaiaʻi ʻa e ngaahi akonaki halá. Kae kehe, ʻi he tuʻunga ko e kau fakatupu melinó, ʻoku tau fakaʻehiʻehi mei hono fai ha manuki pea pehē ki hono ngāueʻaki ʻa e ngaahi lea paetaku ke fakamatalaʻiʻaki ʻa e faʻahinga ʻoku nau tui mo akoʻi ʻa e ngaahi meʻa ʻoku halá. Ko ha anga-hīkisia ʻoku fakasītuʻaʻi ai ʻa e kakaí, ka ko e anga-fakatōkilalo mo e anga-ʻofá ʻoku fiefanongo mai ai ʻa e kau ʻofa ki he moʻoní. Ko hono tokaʻi ʻetau kau fanongó mo e meʻa ʻoku nau tui ki aí ʻoku fakangeingeiaʻi ai kinautolu, ʻo faingofua ange ai ke nau tali ʻa ʻetau pōpoakí.
5 Naʻe tokaʻi ʻe he ʻapositolo ko Paulá ʻa e tui ʻa e faʻahinga naʻá ne malanga ki aí peá ne feinga ke ʻoatu ʻa e ongoongo leleí ʻi ha founga ʻe fakamānako ki honau lotó. (Ng. 17:22-31) Naʻá ne loto-lelei ke hoko “ko e meʻa kehekehe ki he kakai kehekehe” koeʻuhí ke ne “fakamoʻui hanau niʻihi.” (1 Kol. 9:22) ʻE lava ke tau fai ʻa e meʻa tatau ʻaki ʻetau hoko ʻo fakatupu melino ʻi hono malangaʻi loto-toʻa ʻa e ongoongo leleí.