ʻOkú Ke Malanga ʻAki ʻa e Loto-Toʻa?
1 Neongo ʻa hono puke mo fakamanamanaʻi ʻe he kau fakafepakí, naʻe hokohoko atu pē ʻe Pita mo Sione ʻa hono talaki ʻa e pōpoaki ʻo e Puleʻangá ʻaki ʻa e loto-toʻa. (Ng. 4:17, 21, 31) Ko e hā hono ʻuhinga kiate kitautolu ʻi he ʻaho ní ke malanga ʻaki ʻa e loto-toʻá?
2 Fakahoko Loto-Toʻa ha Fakamoʻoni: Ko ha ʻuhinga tatau ki he “loto-toʻá” ko e “taʻemanavahē,” ʻa ia ʻoku ʻuhingá ko hono maʻu ʻa e “loto-maʻu taʻemanavahē, loto-mālohi, mo e kātaki.” Ki he kau Kalisitiane moʻoní, ko e malanga ʻaki ʻa e loto-toʻá ʻoku ʻuhingá ke hoko ʻo taʻemanavahē ke lea ʻi ha taimi pē ʻoku ʻi ai ai ha taimi faingamālie ke vahevahe atu ai ʻa e ongoongo leleí ki he niʻihi kehé. (Ng. 4:20; 1 Pita 3:15) ʻOku ʻuhingá ke ʻoua te tau maaʻi ʻa e ongoongo leleí. (Sāme 119:46; Loma 1:16; 2 Tim. 1:8) Ko ia, ko e loto-toʻá ko ha ʻulungaanga ia ʻoku fiemaʻu ke fakahokoʻaki ʻetau ngāue ko hono malangaʻi ʻa e ongoongo lelei ʻo e Puleʻangá ʻi he taimi ko ʻeni ʻo e ngataʻangá. ʻOku ueʻi ai kitautolu ke vahevahe atu ʻa e ongoongo leleí ki he kakai ʻi ha feituʻu pē ʻoku tau maʻu nai kinautolu ki aí.—Ng. 4:29; 1 Kol. 9:23.
3 Loto-Toʻa ʻi he ʻApiakó: ʻOku ʻai ʻe he hehema ke manavahē pe loto-foʻí ke faingataʻa ke ke malanga ki ho kaungāakó? Ko e moʻoni, ʻoku ʻikai ke faingofua ʻi he taimi ʻe niʻihi; ʻoku lava ke hoko ia ko ha pole moʻoni. Kae kehe, ʻe fakaivimālohiʻi koe ʻe Sihova kapau ʻokú ke lotu ki ha loto-toʻa ke malanga ki he niʻihi kehé. (Sāme 138:3) ʻE tokoniʻi koe ʻe he loto-toʻá ke ke fakahaaʻi ko e taha koe ʻo e Kau Fakamoʻoni ʻa Sihová pea ke matuʻuekina ha manumanukiʻi. Ko hono olá, ko hoʻo malanga ʻi he ʻapiakó ʻe fakahaofi nai ai ʻa e faʻahinga ʻoku nau fanongo kiate koé.—1 Tim. 4:16.
4 Loto-Toʻa ʻi he Ngāueʻangá: ʻOku ʻiloa koe ko e taha ʻo e Kau Fakamoʻoni ʻa Sihová ʻi he ngāueʻangá? Ko e founga pē ʻe taha ʻoku malava ai ke aʻu ʻa e ongoongo leleí ki ho kaungāngāué ko hoʻo malanga nai kiate kinautolu. Ko hoʻo loto-toʻá te ne toe tokoniʻi koe ke ke maʻu ai hao taimi ʻatā ki hoʻo ngaahi fakataha faka-Kalisitiané mo e ngaahi fakataha-lahí.
5 Loto-Toʻa ʻi he Malumalu ʻo e ʻAhiʻahí: ʻOku mahuʻinga ʻa e loto-toʻá ʻi he taimi ʻoku tau fehangahangai ai mo e fakafepakí. (1 Tes. 2:1, 2) ʻOku tokoniʻi ai kitautolu ke tau pukemaʻu ʻetau tuí ʻi he taimi ʻoku tau tō ai ki he ngaahi fakamanamaná, manukí, pe fakatanga fakahangatonú. (Fili. 1:27, 28) ʻOku fakaivimālohiʻi ai kitautolu ke tau tuʻu maʻu ʻi he taimi ʻoku tenge ai kitautolu ke fakangaloku ʻetau pīkitai ki he ngaahi tuʻunga ʻa hotau ʻOtua, ko Sihová. ʻOku fakaivimālohiʻi ai kitautolu ke tauhi maʻu ʻetau loto-melinó ʻi he taimi ʻoku langaʻi ai ʻe he niʻihi kehé ha fakakikihi.—Loma 12:18.
6 Ko e hā pē ha ngaahi faingataʻa te tau fehangahangai fakafoʻituitui mo iá, ʻofa ke tau kītaki ʻi hono malangaʻi ʻa e ongoongo leleí ʻaki ʻa e loto-toʻa.—Ef. 6:18-20.