Hanganaki Leaʻaki e Folofola ʻa e ʻOtuá ʻi he Loto-Toʻa
1 ʻI hotau tuʻunga ko e kau faifekau Kalisitiané, ʻoku tau ʻiloʻi heʻikai talitali lelei ʻe he tokotaha kotoa pē ʻa ʻetau malangá. (Mt. 10:14) Kae kehe, heʻikai te tau fakaʻatā ʻa e taʻetali lelei ʻa e niʻihi ke ne fakatupunga ai kitautolu ke tau fakaʻehiʻehi mei hono ʻai ke ʻiloa ʻa e ongoongoleleí. (Pal. 29:25) Ko e hā ʻokú ne tokoniʻi kitautolu ke tau hanganaki leaʻaki e Folofola ʻa e ʻOtuá ʻi he loto-toʻá?
2 Naʻe fakamahuʻingaʻi ʻe he ʻapositolo ko Paulá ʻa e “fungani ʻa e ʻiloʻi ʻo Kalaisi Sisu.” Naʻe ueʻi ia ʻe he meʻá ni ke ne lea ʻi he “tuipau mālohi.” (Fili. 3:8; 1 Tes. 1:5, NW) Neongo naʻe vakai ʻa e niʻihi ki he pōpoaki naʻá ne malangaʻí naʻe ngāvaivai mo fakasesele, naʻá ne ʻiloʻi ko e “ivi ia ʻo e ʻOtua ʻoku ngaue ki he fakamoʻui ʻiate ia fulipe ʻoku tui.” (Loma 1:16) Ko ia ai, naʻa mo e lolotonga ʻa e fetaulaki mo e fakafepakí, naʻá ne hanganaki “leaʻaki ʻa e loto-toʻa fakafou ʻi he mafai ʻo Sihová.”—Ng. 14:1-7, NW; 20:18-21, 24.
3 Ko ʻEtau Matavai ʻo e Mālohí: Naʻe ʻikai malava ʻe Paula ʻi he mālohi pē ʻoʻoná ke fai ha fakamoʻoni loto-toʻa. ʻI he lea ʻo kau kiate ia mo Sailosí, naʻe tohi ʻe Paula: ‘Kae hili e ma tomua mamahi, mo ho ma gaohi koviʻi aubito, i Filibaí, naá ma [loto-toʻa] i ho ma Otuá ke leaaki kiate kimoutolu ae ogoogolelei oe Otuá lolotoga ae fakataga lahí.’ (Fakaʻītali ʻamautolu; 1 Tes. 2:2, PM; Ng. 16:12, 37) ʻIkai ngata aí, lolotonga ʻa hono tuku pilīsone ʻi Lomá, naʻe kole ʻa Paula ke lotu mai maʻana ʻa e niʻihi kehé koeʻuhí ke ne lava ʻo hokohoko atu hono ʻai ke ʻiloa ʻa e ongoongo leleí ‘ʻaki ʻa e [loto-toʻa] ʻa ia ʻoku tāu mo ia ke ne faí.’ (Ef. 6:18-20) ʻAki ʻa e falala kia Sihova ʻo ʻikai kiate iá, naʻe malava ai ʻa Paula ke ne hanganaki leaʻaki e Folofola ʻa e ʻOtuá ʻi he loto-toʻa.—2 Kol. 4:7; Fili. 4:13.
4 ʻOku tatau pē mo ia ʻi he ʻaho ní. Ko ha tokoua ʻa ia naʻe faingataʻa ʻaupito ke ne fakahaaʻi ia ko e taha ʻo e Kau Fakamoʻoni ʻa Sihová ʻi heʻene ngāueʻangá pea ke faifakamoʻoni ʻi he founga ʻikai anga-mahení, naʻá ne lotu ʻo fekauʻaki mo e meʻá ni peá ne kamata faifakamoʻoni. Naʻe ʻuluaki talitekeʻi ʻa ʻene ngaahi feingá ʻe ha hoa ngāue, ka ʻi ha lave ki he ʻamanaki ʻo e toetuʻú ne taki atu ai ia ki ha ako Tohi Tapu. Talu mei ai, mo hono ngāueʻaongaʻaki ʻe he tokouá ʻa e faingamālie kotoa pē ke fai ai ha fakamoʻoni. ʻI hono feituʻu ngāueʻanga hono hokó, naʻá ne tokoniʻi ai ʻa e kakai ʻe toko 34 ke nau papitaiso lolotonga ha vahaʻa taimi ko e taʻu ʻe 14. ʻE lava ke tau loto-falala ʻe pehē pē hono fakaivimālohiʻi kitautolu ʻe Sihova ke tau ‘hanganaki leaʻaki ʻene folofolá ʻi he loto-toʻa.’—Ng. 4:29, NW.