“ʻOku Ne ʻAtu Ngu ki he Vaivai”
1 Ko kitautolu kotoa ʻoku tau ongosia ʻi he taimi ki he taimi. ʻOku hoko nai ia ʻo ʻikai mei he ngāué pē pe ko ha ngāue kehe fakaesino ka ʻoku toe hoko ia mei he ngaahi palopalema ʻoku tau fehangahangai mo ia ʻi he ngaahi “taimi faingataʻa” ko ʻení. (2 Tim. 3:1) ʻI he tuʻunga ko e kau sevāniti ʻa Sihová, ʻe fēfē haʻatau maʻu ʻa e mālohi fakalaumālie ʻoku fiemaʻú koeʻuhi ke ʻoua te tau māmālie hifo ʻi heʻetau ngāue fakafaifekaú? ʻOku tau maʻu ʻeni ʻaki ʻetau falala ki he tokotaha ʻoku ‘kaukaua hono nguú,’ ko Sihova. (Ai. 40:26) ʻOkú ne ʻafioʻi ʻetau ngaahi fiemaʻú pea ʻokú ne mahuʻingaʻia moʻoni ʻi hono tokoniʻi kitautolú.—1 Pita 5:7.
2 Ngaahi Tokonaki ʻa Sihová: ʻOku fakaivimālohiʻi kitautolu ʻe Sihova ʻaki hono laumālie māʻoniʻoní, ʻa e mālohi taʻealafakafepakiʻi tatau naʻá ne ngāueʻaki ki hono fakatupu ʻa e ʻunivēsí. ʻOku tokoniʻi kitautolu ʻe he laumālie ʻo e ʻOtuá ke ‘fakafoʻou [hotau] nguú’ kapau te tau ongosia. (Ai. 40:31) ʻEke hifo kiate koe, ‘Ko fē ʻa e taimi fakamuimui naʻá ku lotu pē ai ke fakaivimālohiʻi au ʻe he laumālie māʻoniʻoní ke u lavaʻi ai ʻa hoku ngaahi fatongia faka-Kalisitiané?’—Luke 11:11-13.
3 ʻI hono lau fakaʻaho mo fakalaulauloto ki he Folofola fakamānavaʻi ʻa e ʻOtuá pea hoko ʻo fafangaʻi fakalaumālie ʻaki hono ako maʻu pē ʻo ʻetau ngaahi tohi faka-Kalisitiané, te tau hangē ai ha “ʻakau [maʻuiʻui] kuo to ki he ngaahi mangaʻi vai, ʻa ia ʻoku ne fua ʻi hono toʻukai, ko hono lau foki ʻoku ʻikai mae.”—Sāme 1:2, 3.
4 ʻOku toe ngāueʻaki ʻe Sihova ʻa e kaungātuí, ʻa ia ʻe lava ke nau hoko ko ha “fakafiemalie” pe tokoni fakaivimālohi kia kitautolu. (Kol. 4:10, 11) ʻOku nau fakaivimālohiʻi kitautolu ʻi he ngaahi fakataha ʻa e fakatahaʻangá ʻaki ʻenau ngaahi fetalanoaʻaki fakatupu langa haké, ngaahi talí mo e ngaahi talanoá. (Ng. 15:32) ʻOku tautautefito ki he kau mātuʻa Kalisitiané ʻenau ʻomai ʻa e tokoni fakalaumālie mo e fakalototoʻa fakaivifoʻou.—Ai. 32:1, 2.
5 Ko e Ngāue Fakafaifekaú: Kapau ʻokú ke ongoʻi ongosia, ʻoua ʻe taʻofi ʻa e ngāue fakamalangá! ʻI he ʻikai tatau mo e ngaahi ngāue lahi kehé, ko e kau maʻu pē ki he ngāue fakafaifekaú ʻoku fakaivifoʻou moʻoni ia kia kitautolu. (Mt. 11:28-30) Ko hono malangaʻi ʻa e ongoongo leleí ʻoku tokoniʻi ai kitautolu ke tau hangataha ki he Puleʻanga ʻo e ʻOtuá pea tauhi maʻu ʻi he fakakaukaú ʻa ʻitāniti mo hono ngaahi ʻamanaki fakaofó.
6 ʻOku lahi ʻa e meʻa ke fai ki muʻa ke fakaʻauha ʻa e fokotuʻutuʻu fulikivanu ko ʻení. ʻOku tau maʻu ʻa e ʻuhinga kotoa ke tuʻumaʻu ai ʻi heʻetau ngāué, ʻo “tatau ia moe mafai koia oku foaki e he Otua.” (1 Pita 4:11, PM) ʻI he tokoni ʻa Sihová te tau fakaʻosi ai ʻetau ngāué, he “ʻoku ne ʻatu ngu ki he vaivai” pe ongosiá.—Ai. 40:29.