“Fafagaʻi i he Gaahi Lea oe Tui”
1 Ko e tuli ki ha moʻui ʻo e līʻoa fakaʻotuá ʻoku fiemaʻu ki ai ʻa e feinga mālohi. (1 Tim. 4:7-10) ʻI hotau mālohí tonu, ʻe vave ʻa ʻetau tupu ʻo ongosia pea humu ʻi he feinga ke muimui ʻi ha ʻalunga pehē. (Ai. 40:29-31) Ko e founga ʻe taha ʻe lava ke tau maʻu ai ʻa e mālohi meia Sihová ko e hoko ʻo “fafagaʻi i he gaahi lea oe tui.”—1 Tim. 4:6, PM.
2 Meʻakai Fakalaumālie Mahu: Fakafou ʻi heʻene Folofolá pea mo e “tamaioeiki agatonu mo boto,” ʻoku tokonaki mai ai ʻe Sihova ʻa e meʻakai fakalaumālie mahu. (Mt. 24:45, PM) ʻOku tau fai ʻetau tafaʻakí ke maʻu ʻaonga mei ai? ʻOku tau lau ʻa e Tohi Tapú he ʻaho taki taha? ʻOku tau fokotuʻu nai ha taimi pau ki he ako fakafoʻituituí mo e fakalaulaulotó? (Sāme 1:2, 3) Ko ha kai fakalaumālie fakamoʻuilelei pehē ʻoku fakalongomoʻuiʻi ai kitautolu pea maluʻi ai kitautolu mei he ngaahi uesia fakatupu vaivai ʻo e māmani ʻa Sētané. (1 Sione 5:19) Kapau te tau fakafonu hotau ʻatamaí ʻaki ʻa e ngaahi meʻa lelei pea ngāueʻaki kinautolu ʻi heʻetau moʻuí, ʻe kau ʻa Sihova mo kitautolu.—Fili. 4:8, 9.
3 ʻOku toe fakaivimālohiʻi kitautolu ʻe Sihova fakafou ʻi he ngaahi fakataha ʻa e fakatahaʻangá. (Hep. 10:24, 25) Ko e fakahinohino fakalaumālie mo e feohi lelei ʻoku maʻu ʻi he ngaahi fakatahataha ko ení ʻoku fakaivimālohiʻi ai kitautolu ke tau tuʻu mālohi neongo ʻa e ngaahi ʻahiʻahí. (1 Pita 5:9, 10) Naʻe pehē ʻe ha finemui ʻe taha: “ʻOku ou ʻalu he ʻahó kotoa ki he akó, pea ʻokú ne fakaongosiaʻi au. Ka ko e ngaahi fakatahá ʻoku hangē ia ha feituʻu moʻui ʻi he toafá, ʻa ia ʻoku fakaivifoʻou ai au ke u fekuki mo e ʻaho ako hoko maí.” He faitāpuekina moʻoni ē ko kitautolu ʻi he feinga ʻoku tau fai ke maʻu ai ʻa e ngaahi fakatahá!
4 Ko Hono Talaki ʻa e Moʻoní: Ko e malanga ki he niʻihi kehé naʻe hangē ia ha meʻakaí kia Sīsū. Naʻá ne fakaivia ia. (Sione 4:32-34) ʻI he tuʻunga tatau, ʻi he taimi ʻoku tau lea ai ki he niʻihi kehé ʻo kau ki he ngaahi talaʻofa fisifisimuʻa ʻa e ʻOtuá, ʻoku tau ongoʻi fakaivifoʻou ai. Ko e hoko ʻo femoʻuekina ʻi he ngāue fakafaifekaú ʻoku toe tauhi ai hotau lotó mo e ʻatamaí ke tokangataha ki he Puleʻangá pea mo e ngaahi tāpuaki ʻe vavé ni ke hoko maí. ʻOku fakaivifoʻou moʻoni ai kitautolu.—Mt. 11:28-30.
5 He monūʻia ē ko kitautolu ke maʻu ʻaonga mei he meʻakai fakalaumālie mahu ʻoku tokonaki mai ʻe Sihova ki heʻene kakaí he ʻaho ní! ʻOfa ke tau hokohoko atu ʻa e kalanga fiefia ke fakahīkihikiʻi iá.—Ai. 65:13, 14.