“Kuo ʻOsi Sāuni ki he Ngāue Lelei Fulipe”

¹ ʻOku tāpuakiʻi ʻa e kakai ʻa Sihova ʻi he ʻaho ní ʻaki ha meʻakai fakalaumālie lelei lahi ʻaupito. (Ai. 25:6) ʻOku ʻi ai ʻa e ngaahi fakamatala Fakatohitapu lahi ke fiefia ai fakafou ʻi he ako fakafoʻituituí mo fakafāmilí pea ʻi he ngaahi fakataha ʻa e fakatahaʻangá, ngaahi ʻasemipilií, mo e ngaahi fakataha-lahí. Ka ʻoku tau maʻu ʻa e ʻaonga kakato ʻo e ngaahi meʻá ni kotoa fakataha mo ha vakai atu ke hoko ʻo “ʻosi sāuni ki he ngāue lelei fulipe”?​—2 Tim. 3:17.

² Fakakaukau atu ki he ngaahi meʻa fakalaumālie ki he taʻu 1998, ʻa ia kuo ʻosi atu hono vaeuá! ʻI he ngaahi fakataha fakauike ʻa e fakatahaʻangá, ʻoku tau lāulea ai ki he ngaahi meʻa lalahi ʻe niʻihi ʻo e ngaahi tohi ʻe 23 ʻo e Ngaahi Konga Tohitapu Faka-Kalisi Kalisitiané, pea fakamatalaʻi ʻa e vahe tolu ʻe taha ʻo e tohi Fāʻūtaha ʻi he Lotú. ʻOku tau toe fakamanatu ai ʻa e kotoa ʻo e tohi ʻIlo mo e polosiua Fiemaʻu, pea laka hake ʻi he vahe tolu ʻe taha ʻo e kiʻi tohi ko e Ngaahi Tuʻunga Lea Faka-Tohitapu ke Fetalanoaʻaki Ai. Tānaki atu ki ai, kuo fakaivia kitautolu ʻe he ngaahi tatau ʻe 12 ʻo ʻEtau Ngāue Fakafaifekau ʻo e Puleʻanga, ngaahi kupu ako ʻe 52 ʻi he Taua Leʻo, pea mo e meimei lahi tatau mo ia ʻo e ngaahi malanga maʻá e kakaí ʻi ha ngaahi tuʻunga-lea faka-Tohitapu kehekehe. ʻOku tānaki atu ki he kotoa ʻo e ngaahi meʻá ni ʻa e ngaahi polokalama fakataha-lahi mo e ʻasemipilī fakakoloa lahi ʻaupito. Ko ha ngaahi meʻa lelei fakalaumālie lahi ē kuo ʻai ke tau ala maʻú!

³ Houngaʻia ʻi he Ngaahi Tokonaki ʻa Sihová: Ke maʻu ʻa e ʻaonga kakató, ʻoku fiemaʻu kiate kitautolu ke tau houngaʻia ʻi he ʻuhinga ʻoku tokonaki mai ai ʻe Sihova ʻo lahi ʻa e meʻa fakalaumālie peheé. Ko hono maʻu ʻa e ngaahi meʻa lelei ko ʻení ʻokú ne langa hake ai ʻetau tuí pea fakaivimālohiʻi ai hotau vahaʻangatae mo iá. (1 Tim. 4:6) Kae kehe, ʻoku ʻikai ke ʻai ke ala maʻu pē ʻa e meʻakai fakalaumālié ki hono fakahinohinoʻi kitautolú. ʻOkú ne ueʻi kitautolu ke tau kau ʻi hono vahevahe atu ʻa e moʻoní ki he niʻihi kehé pea teuʻi kitautolu ke hoko ʻo ola lelei ʻi he fai peheé ʻi he tuʻunga ko e kau faifekau ʻo e ongoongo leleí.​—2 Tim. 4:5.

⁴ ʻAi ke ʻoua te tau siʻaki ʻetau ngaahi fiemaʻu fakalaumālié, kae fakatupulekina maʻu pē ʻa e holi ki he ngaahi tokonaki fakafiemālie fakalaumālie lahi mei he tēpile ʻa Sihová. (Mt. 5:3; 1 Pita 2:2) Ke maʻu ʻa e ʻaonga kakató ʻoku fiemaʻu ke vaheʻi ha taimi feʻunga ki he ngaahi meʻa mahuʻinga peheé hangē ko e ako Tohitapu fakafoʻituitui mo e fakafāmili maʻu pē, pea maʻu maʻu pē ʻa e fakatahá. (Ef. 5:l5, 16) Ko e ngaahi pale fakafiefia ʻo e fai peheé ʻe fehoanaki ia mo e fakalototoʻa fakamānavaʻi naʻe tohi ʻe Paula ki he kau Kalisitiane Hepelū anga-tonú, hangē ko ia ʻoku lēkooti ʻi he Hepelu 13:​20, 21.