Fakatupulekina ʻa e Ngaahi Tōʻonga Lelei, Utu ʻa e Ngaahi Tāpuaki Lahi
1. Ko e hā ʻoku ʻaonga ai ke sivisiviʻi ʻa hoʻo founga-tuʻumaʻu fakalaumālié?
1 ʻI he taimi naʻá ke fuofua hoko ai ko ha Kalisitiané, ngalingali naʻá ke feinga lahi ke fakatupulekina ha founga-tuʻumaʻu lelei ʻo e ngaahi ngāue fakalaumālié ʻa ia ʻoku kau ai ʻa e ako Tohi Tapú, ngaahi fakataha faka-Kalisitiané, ko e ngāue fakamalangá pea mo e lotú. Tupu mei hono tāpuakiʻi ʻe Sihova ʻa hoʻo ngaahi feingá, kuó ke tupu fakalaumālie ai. Mahalo ko e ʻosi atu eni ha ngaahi taʻu lahi talu mei hoʻo papitaisó. ʻOkú ke tauhi maʻu ʻa e ngaahi tōʻonga fakalaumālie lelei naʻá ke fakatupulekina ʻi he taimi naʻá ke hoko ai ko ha Kalisitiané?
2. ʻOku anga-fēfē ʻetau maʻu ʻaonga mei he lau Tohi Tapu fakaʻahó?
2 Sivisiviʻi Hoʻo Founga-Tuʻumaʻú: ʻOkú ke tōʻongaʻaki ʻa e lau ha konga ʻo e Folofola ʻa e ʻOtuá ʻi he ʻaho taki taha? Ko ha tāpuaki lahi ē te tau utu ʻi he fai peheé! (Sios. 1:8; Sāme 1:2, 3) ʻI ʻIsileli ʻo e kuonga muʻá, naʻe pau ai ki he tuʻi taki taha ke ne lau ʻa ʻene tatau ʻo e Laó “ʻi he ngaahi ʻaho kotoa oʻene moʻui.” Ko e hā hono ngaahi ʻaongá? Te ne fakatupulekina ai ha loto-fakatōkilalo pea ako ke manavahē kia Sihova koeʻuhí ke ʻoua te ne afe mei Heʻene ngaahi tuʻutuʻuní. (Teu. 17:18-20) ʻOku pehē pē ʻi he ʻahó ni, ko e lau Tohi Tapu fakaʻahó ʻoku tokoniʻi ai kitautolu ke tau haohaoa ai pē mo ʻataʻatā mei he koví ʻi he lotolotonga ʻo e māmani fulikivanu mo fakameleʻi ko ʻení. ʻOku toe tokoniʻi ai kitautolu ke tau mateuteu kakato ki he ngāue fakafaifekaú.—Fili. 2:15; 2 Tim. 3:17.
3. Ko e hā ʻa e ngaahi tāpuaki te tau utu mei hono maʻu maʻu pē ʻa e ngaahi fakatahá?
3 Naʻe tōʻongaʻaki ʻe Sīsū ʻa e ʻalu ki he sinakoké, ʻa ia naʻe fai ai ʻa e lāulea ki he Tohi Tapú. (Luke 4:16). ʻOku ʻikai ha veiveiua naʻe fakaivia ia ke ne fehangahangai mo e ngaahi ʻahiʻahi naʻe pau ke ne fuesiá. ʻE toe fakaivimālohiʻi mo kitautolu foki ʻe he fakahinohino fakalaumālie ʻoku ʻomai ʻi he ngaahi fakataha ʻa e fakatahaʻangá pea mo e “fetokoniʻaki” pe fefakalototoʻaʻaki lelei. (Loma 1:12) ʻOku tokoniʻi kitautolu ʻe heʻetau fakatahataha fakataha mo hotau fanga tokouá ke tau kātekina ʻa e ngaahi faingataʻa ʻo e ngaahi ʻaho fakaʻosí ni. (Hep. 10:24, 25) ʻOkú ke kei tōʻongaʻaki ʻa e maʻu ʻa e ngaahi fakatahá kotoa?
4. ʻOku anga-fēfē ʻa ʻetau maʻu ʻaonga mei he kau atu ki he ngāue fakamalangá ʻi he uike taki taha?
4 ʻOku tala mai kia kitautolu ʻe he ngaahi fakamatala Fakatohitapu fakamānavaʻí naʻe kau ʻa e kau ʻapositoló ʻi hono talaki atu ʻa e ongoongo leleí “i he aho kotoabe, i he fale lotu lahi, bea moe fale kotoabe.” (Ng. 5:42, PM) Neongo ʻe ʻikai malava nai ke tau malanga he ʻaho kotoa pē, ʻe lava ke tau ʻai ia ko ʻetau tōʻonga ke kau ki ha founga pē ʻo e ngāue fakafaifekaú ʻi he uike kotoa pē? ʻI he fai peheé, te tau hoko moʻoni ai ʻo toe pōtoʻi ange ʻi hono ngāueʻaki ʻa e Folofola ʻa e ʻOtuá, pea ngalingali te tau maʻu ai ʻa e ngaahi hokosia fakalototoʻa ʻi hono vahevahe atu ʻa e moʻoni ʻo e Tohi Tapú ki he niʻihi kehé.
5. Ko e hā ʻoku mātuʻaki mahuʻinga ai ke lotu maʻu pē kia Sihová?
5 Naʻe tāpuakiʻi lahi ʻa e palōfita ko Tanielá koeʻuhi ko ʻene tauhi “taʻetukua” kia Sihova ʻi he kotoa ʻo ʻene moʻuí. Naʻe kau heni ʻa e tōʻongaʻaki ʻa e lotu maʻu pē kia Sihova. (Tan. 6:10, 17, 21 [6:10, 16, 20, PM]) ʻI he founga tatau, ʻi heʻetau hanga maʻu pē kia Sihova ʻi he lotu fakamātoató, te ne ʻomai kia kitautolu ʻa hono laumālie māʻoniʻoní. (Luke 11:9-13) ʻIkai ko ia pē, ʻe tali ʻe Sihova ʻaki ʻene ʻunuʻunu ofi mai kiate kitautolu, ʻo fakaʻatā ai ke tau maʻu ha vahaʻangatae fekoekoeʻi mo ia. (Sāme 25:14; Sem. 4:8) Ko ha pale maʻongoʻonga ē! Ko ia ai, ʻofa ke tau ngāue tōtōivi ke tauhi maʻu ha tōʻonga fakalaumālie lelei pea utu ʻa e ngaahi tāpuaki lahi meia Sihova.