Puha Fehuʻi

◼ ʻOku totonu ke fēfē ʻa hono fakahoko mai ʻa e hiva kamata ʻo e Ako Fakafaifekau Fakateokalatí, Fakataha Ngāué, ko e Malanga Maʻá e Kakaí mo e Ako Taua Leʻo, pea ʻe fakahoko mai ia ʻe hai?

Ko e ngaahi hiva kamata ʻoku filifili ki he uike taki taha ʻo e Ako Fakafaifekau Fakateokalatí ʻoku fakahokohoko mai ia ʻi he Taimi-Tēpile ki he Ako Fakafaifekau Fakateokalatí ʻa ia ʻoku ʻi he fakalahi ʻo ʻEtau Ngāue Fakafaifekau ʻo e Puleʻanga ʻo ʻOkatopá. Ko e ngaahi hiva kamata mo e hiva tuku ki he uike taki taha ʻo e Fakataha Ngāué ʻoku hā ia ʻi he peesi 2 ʻo ʻEtau Ngāue Fakafaifekau ʻo e Puleʻanga. Pehē foki, ko e ngaahi fika ʻo e hiva ki he Ako Taua Leʻo fakauiké ʻoku maʻu ia ʻi he peesi 2 ʻo e ʻīsiu taki taha ʻo e Taua Leʻo. ʻOku fai ʻa e vakai ki he ngaahi hiva kuo vaheʻí ko e konga ia ʻo e foʻi fakataha kakato ko iá pea ʻoku totonu ke fakahoko mai ia ʻe he tokoua ʻokú ne fai ʻa e foʻi fakataha ko iá kae ʻikai ko e tokotaha sea ʻo e fakataha ki muʻá.

Ko e fakatātaá, ʻe talitali lelei ʻa e kau fanongó ʻe he ʻovasia ʻo e Ako Fakafaifekau Fakateokalatí, fakahā mai ʻa e hiva kamatá, fakahoko ʻa e akó pea fakaafeʻi leva ki he peletifōmú ʻa e tokotaha malanga ʻuluaki ʻo e Fakataha Ngāué. Ko e tokoua ʻokú ne fakahoko ʻa e konga ʻo e Fakataha Ngāué ko ia ʻoku totonu ke ne fakahaaʻi mai ʻa e hiva ʻe kamataʻaki ʻa e Fakataha Ngāué.

ʻI he tuʻunga tatau, ʻe kamata ʻa e Fakataha Maʻá e Kakaí ʻe he tokotaha seá. Te ne talitali māfana ʻa e kau maʻu fakatahá kotoa pea fakaafeʻi kinautolu ke kau fakataha ʻi hono hivaʻi ʻa e hiva kamata naʻe fili ʻe he tokotaha malangá. Ko e tokotaha seá (pe ko ha tokoua taau kehe nai naʻe vaheʻi ki muʻa) te ne kamata ʻa e fakatahá ʻaki ʻa e lotu. Te ne fakafeʻiloaki ʻa e tokotaha malangá pea fakahā mai mo ʻene kaveinga malangá. Hili ʻa e malangá, ko e tokotaha seá, ʻi he ʻikai ke ne fakamatala fakanounou mai ʻa e meʻa naʻe toki leaʻaki ʻe he tokotaha malangá, te ne fakahaaʻi nounou ʻa e houngaʻia ki he fakahinohinó. Te ne fakahā mai ʻa e kaveinga ʻo e malanga maʻá e kakaí ki he uike hoko maí, pea fakaafeʻi leva ʻa e kau maʻu fakatahá kotoa ke nofo ai pē ki he Ako Taua Leʻo. ʻOku ʻikai foki fiemaʻu ia ki he tokotaha seá ke ne ʻeke ki he kau fanongó pe ʻe sai ke ʻave hanau ʻofa mo e talamonū ki he fakatahaʻanga ʻoku haʻu mei ai ʻa e tokotaha malangá. Ko hono hokó, ʻe fakaafeʻi ʻe he tokotaha seá ʻa e faiako ʻo e Ako Taua Leʻo ki he peletifōmú.

ʻE fakahā mai ʻe he faiako ʻo e Ako Taua Leʻo ʻa e ʻuluaki hiva ke ngāueʻaki ʻoku fekauʻaki mo e akó. Te ne fakahoko ʻa e akó ʻo fehoanaki mo e ngaahi fakahinohino kuo pulusí pea fanongonongo mai leva ʻa e hiva fakaʻosí. ʻE faʻa fakaafeʻi ʻe he faiako Ako Taua Leʻo ʻa e tokoua naʻá ne fai ʻa e malanga maʻá e kakaí ke ne fai ʻa e lotu tukú.

Ko hono fakahoko ʻa e ngaahi fakahinohino kotoa ko ʻení ʻe tokoni ia ke fakapapauʻi ko ʻetau ngaahi fakataha ʻi he fakatahaʻangá ʻoku fakahoko ia ʻi ha tuʻunga maau.