Taimi-Tēpile Fakataha Foʻou ʻa e Fakatahaʻangá
1, 2. Ko e hā ʻa e ngaahi liliu ki he ngaahi fakatahá ʻe fakahoko ʻo kamata ʻi Sanuali 2009?
1 Lolotonga ʻa e uike ʻo ʻEpeleli 21-27, 2008, naʻe fanongoa ai ʻe he fanga tokoua takatakai ʻi māmaní ha fanongonongo fakafiefia. “Kamata ʻi Sanuali 1, 2009, ʻe fai ai ʻa e Ako Tohi ʻa e Fakatahaʻangá ʻi he taimi tatau mo e Ako Fakafaifekau Fakateokalatí pea mo e Fakataha Ngāué. Ko e Ako Tohi ʻa e Fakatahaʻangá ʻe liliu ia ʻo ui ko e Ako Tohi Tapu ʻa e Fakatahaʻangá.”
2 Taimi-Tēpile ki he Fakataha Fakauike ko Ení: Ko e taimi fakakātoa ki he fakatahá, ʻo kau ai ʻa e hivá mo e lotú, ko e houa ʻe 1 mo e miniti ʻe 45. ʻE kamataʻaki ʻa e fakatahá ʻa e hiva mo e lotu (5 min.), hoko atu ki ai mo e Ako Tohi Tapu ʻa e Fakatahaʻangá (25 min.). Hili iá ʻe kolosi hangatonu ai pē ki he Ako Fakafaifekau Fakateokalatí (30 min.). ʻE kamataʻaki leva ha hiva (5 min.) ʻa e Fakataha Ngāué (35 min.). ʻOku fakaʻosiʻaki ʻa e fakatahá ʻa e hiva mo e lotu (5 min.). Ke tokoni kiate koe ʻi he teuteu ki he ngaahi fakatahá ni, ko e taimi-tēpile ki he Ako Tohi Tapu ʻa e Fakatahaʻangá, Ako Fakafaifekau Fakateokalatí, pea mo e Fakataha Ngāué ʻe pulusi atu ia ʻi he māhina ki he māhina ʻi he ʻEtau Ngāue Fakafaifekau ʻo e Puleʻanga.
3. ʻE fakahoko fēfē ʻa e Ako Tohi Tapu ʻa e Fakatahaʻangá?
3 Ako Tohi Tapu ʻa e Fakatahaʻangá: Ko e fakataha ko ení ʻe fakalele tatau ia mo e Ako Taua Leʻo. ʻE ʻikai fiemaʻu ke kamataʻaki hano fakamanatu ʻo e fakamatala he uike ne toki ʻosí. ʻI hono kehé, ʻoku totonu ke mātuʻaki nounou pē ʻa e talateu ʻo e fakatahá. ʻE fakaʻatā ai heni ha taimi feʻunga ki he kau maʻu fakatahá kotoa ke nau fai ha ngaahi tali nounou. Ko e ʻovasia tauhí te ne tokangaʻi ʻa hono vahe ʻa e kau mātuʻa ke taufetongi ʻi hono fakahoko ʻa e fakatahá ni, ke mātuʻa kehe ʻi he uike taki taha.
4. ʻE fēfē hono liliu ʻa e Fakataha Ngāué?
4 Fakataha Ngāue: ʻE kei tatau ai pē ʻa e Fakataha Ngāué ka ʻe toe nounou ange ʻa e ngaahi kongá. ʻE meimei ke fai ʻa e ngaahi fanongonongó ʻi he miniti ʻe nima. ʻOku totonu ke hoko ko e taimi feʻunga eni ki he ngaahi fanongonongo mahuʻinga mo e ngaahi tohi ʻe niʻihi mei he vaʻá. Ko e ngaahi fanongonongo ko iá hangē ko e ngaahi fokotuʻutuʻu ngāue fakamalanga, taimi-tēpile fakamaʻa, fakamatala paʻanga pea mo e ngaahi tohi anga-maheni mei he ʻōfisi vaʻá ʻoku ʻikai fiemaʻu ke lau ia mei he peletifōmú ka ʻe fakapipiki ia ʻi he papa fakahinohinó ke lau ʻe he fanga tokouá. Ko e faʻahinga ko ia ʻe vaheʻi ange haʻanau konga ki he polokalamá ʻoku totonu ke nau teuteu lelei pea pipiki ofi ki he taimi ʻoku vaheʻi angé pea ki he ngaahi fakahinohino ʻoku ʻoatú.
5. Lolotonga ʻa e uike ʻo e ʻaʻahi ʻa e ʻovasia sēketí, ko e hā ʻa e taimi-tēpile fakataha ʻa e fakatahaʻangá?
5 ʻAʻahi ʻa e ʻOvasia Sēketí: Heʻikai feʻunuʻaki ʻa e taimi-tēpile fakauike ʻa e ʻovasia sēketí. ʻI he ʻaho Tūsité ko e Ako Fakafaifekau Fakateokalatí pea mo e Fakataha Ngāué ʻe fakahoko ia pea hoko atu ai ha hiva. ʻE fai leva ʻe he ʻovasia sēketí ha malanga miniti ʻe 30. Hangē ko ia ʻoku lolotonga fai ʻi he uike ʻo ʻene ʻaʻahí, ʻe vaheʻi ha efiafi kehe ki he Ako Tohi Tapu ʻa e Fakatahaʻangá ʻo hoko atu ki ai ha hiva pea mo e malanga ngāue ʻa e ʻovasia sēketí. ʻE fakaʻosiʻaki ʻa e fakatahá ha hiva mo e lotu.
6. Ko e hā ʻa e ngafa ʻo e ʻovasia kulupú?
6 Fakataha ki he Ngāue Fakamalangá: ʻE vaheʻi ʻa e kau ʻovasia kulupu ʻe he kulupu ʻo e kau mātuʻá ke nau tokangaʻi ʻa e ngaahi kulupu ngāue fakamalangá pea tokangaʻi ʻa e faʻahinga ʻoku kau ki he kulupu ko iá. ʻO ka fiemaʻu ha sevāniti fakafaifekau ke ne fakahoko ʻa e fatongiá, ʻoku totonu ke ui ia ko e “sevāniti kulupu.”
7. Ko e hā ʻe lava ke tau fakatuʻotuʻa atu ki ai ʻi heʻetau taimi-tēpile fakataha foʻou ʻa e fakatahaʻangá?
7 Hangē ko ia ʻoku fakamatalaʻi atu hení, te tau maʻu ai ʻa e faingamālie ke ako ha ngaahi fakamatala ʻaonga mo fakatupu langa hake ʻi ha efiafi ʻo e kai fakalaumālie. ʻE fakamafeia kitautolu ʻe he meʻá ni ke tau hoko ai ko e kau malanga mo e kau faiako ola lelei, kuo akoʻi ki ha ngāue fakafaifekau ola lelei ange.—Ef. 4:13, 14; 2 Tim. 3:17.
8. ʻE anga-fēfē ha ʻaonga ʻa e teuteu tokamuʻa fakatāutahá kia kitautolu pea pehē ki he niʻihi kehé?
8 Ko e vakaiʻi tokamuʻa ki he ngaahi fakataha ko ení ʻe tokoniʻi ai kitautolu ke tau tokanga lelei ki he ngaahi poini tefito ʻe fakamamafaʻi lolotonga ʻa e fakataha taki taha. Te tau maʻu kotoa ai ʻa e faingamālie ke fai ha tali, ʻo tokoni ki hono fai ha fefakalototoʻaʻaki lelei. (Loma 1:11, 12; Hep. 10:24) ʻOku totonu ko ʻetau taumuʻá ia ‘ke ʻai ke ha ki he kakai kotoa ʻetau laka ki muʻá’ ʻaki hono “tofa totonu ʻa e folofola ʻo e moʻoni.”—1 Tim. 4:15; 2 Tim. 2:15.
9. Ko e hā e meʻa ʻoku tau fakapapau ke faí, pea ko e hā hono ʻuhingá?
9 ʻOku tau fiefia ʻi he feliliuaki mahuʻinga ko eni ʻo ʻetau ngaahi fakataha ʻa e fakatahaʻangá. Fakatauange ke tau ngāueleleiʻaki kotoa ʻa e tataki ʻoku tokonaki mai ʻe he “tamaioeiki agatonu mo boto” pea nofo ofi ki hotau Tauhi-Sipi Lahí ʻi heʻene teuteuʻi kitautolu ki he “mamahi” lahi ʻa ia ʻoku tuʻunuku maí.—Mt. 24:21, 45, PM; Hep. 13:20, 21; Fkh. 7:14.