ʻOku Tau Koloaʻaki Hotau Ngaahi Monuú!
1 ʻI he kotoa ʻo e moʻui ʻa e faʻahinga ʻo e tangatá, kuo ʻomai ai ʻe Sihova ki heʻene kau sevānití ʻa e ngaahi monū lahi kehekehe. Kuó ne foaki kiate kinautolu ʻa e ngaahi monū ʻo tatau ai pē pe ko e tangata pe fefine kinautolu, ko e hā honau taʻumotuʻá, pe tuʻunga ʻi he moʻuí. (Luke 1:41, 42; Ng. 7:46; Fili. 1:29) Ko e hā ʻa e ngaahi monū ʻokú ne ʻomai kiate kitautolu ʻi he ʻaho ní?
2 Niʻihi ʻo Hotau Ngaahi Monuú: ʻOku tau maʻu ʻa e monū ko e hoko ʻo akoʻi ʻe Sihova. (Mt. 13:11, 15) Ko hono fakahīkihikiʻi ʻa Sihova ʻaki ʻetau ngaahi tali he lolotonga ʻa e ngaahi fakataha ʻa e fakatahaʻangá ko ha monū ia ʻe taha ʻoku tau maʻu. (Sāme 35:18) ʻI heʻetau maʻu ha ngaahi faingamālie ke tali aí, ʻoku tau vēkeveke fai ia. ʻI he tuʻunga meimei tatau, kapau ʻoku tau vakai ki he ngāue taki taha ʻoku vaheʻi mai ʻi he fakatahaʻangá ko ha lāngilangi, te tau fakahoko ia ʻi he lelei taha ʻo ʻetau malavá. ʻOku tau kau tuʻumaʻu ki he monū ʻo hono fakamaʻa ʻa e Fale Fakatahaʻangá pea tauhi fakalelei iá?
3 Neongo ʻoku fifili ʻa e laui miliona pe ʻoku fanongo mai ʻa e ʻOtuá ki heʻenau ngaahi lotú, ʻoku tau maʻu ʻa e monū ʻi hono fanongoa ʻetau ngaahi lotú ʻe he Tokotaha mahuʻinga taha ʻi he ʻunivēsí. (Pal. 15:29) ʻOku fanongo mai ʻa Sihova tonu ki he ngaahi lotu ʻa ʻene kau sevānití. (1 Pita 3:12) ʻOku ʻikai te ne fakangatangata ʻa hono lahi ʻo e malava ke tau fakaofiofi ai kiate iá. Ko ha meʻaʻofa mahuʻinga lahi ē ʻoku tau maʻu, ke malava ke lotu “ʻi he faingamalie kotoa pe”!—Ef. 6:18.
4 ‘Kaungāngaue mo e ʻOtuá’: Ko e taha ʻo hotau ngaahi monū lelei tahá ko hono fanongonongo ʻa e ongoongo lelei ʻo e Puleʻanga ʻo e ʻOtuá ʻi he tuʻunga ko e ‘kaungāngaue mo e ʻOtuá.’ (1 Kol. 3:9) Ko ha ngāue ia ʻokú ne ʻomai ʻa e fiemālie mo e fakaivifoʻou. (Sione 4:34) ʻOku ʻikai ko ha meʻa pau ia kia Sihova ke ne ngāueʻaki ʻa e faʻahinga ʻo e tangatá ke fakahoko ʻa e ngāué ni, ka kuó ne ʻomai kiate kitautolu ʻa e ngāue ko ʻení ko ha fakahāhā ia ʻo ʻene ʻofá. (Luke 19:39, 40) ʻI hono fai iá, kuo ʻikai ke tuku mai ʻe Sihova ʻa e monū ko ʻení ki ha faʻahinga tokotaha pē. Ko e faʻahinga ʻoku nau kau ʻi he ngāue fakafaifekau ki he kakaí kuo pau ke nau aʻusia mo tauhi maʻu ʻa e ngaahi tuʻunga taau fakalaumālie pau. (Ai. 52:11) ʻOku tau fakahāhaaʻi ʻoku tau fakamahuʻingaʻi ʻa e monū ko ʻení ʻaki hono ʻai ʻa e ngāue fakafaifekaú ko ha konga mahuʻinga ia ʻo ʻetau ngāue tuʻu maʻu fakauiké?
5 Ko e ngaahi monū meia Sihová ʻoku nau fakakoloa ʻetau moʻuí. (Pal. 10:22) ʻOua ʻaupito ʻe fakamaʻamaʻaʻi ia! ʻI hono fakahāhā ʻoku tau koloaʻaki moʻoni ʻa hotau ngaahi monū ʻo e ngāué, ʻoku tau fakahōifuaʻi ai ʻetau Tamai fakahēvaní, ko e Tokotaha-Foaki ʻo e “foaki lelei kotoabe moe foaki haohaoa kotoabe.”—Sem. 1:17, PM.