Lotu kia Sihova ʻi he Tuʻunga ko ha Fāmili

¹ ʻI he taimi ʻo e Tohi Tapú, naʻe ngāue fakataha ai ʻa e ngaahi mēmipa ʻo e fāmilí ʻi he ngaahi meʻa lahi. Naʻa nau fakahoko ʻa e ngaahi ngāue fakaʻahó pea hiliō ai ʻenau lotu kia Sihova ʻi he tuʻunga ko ha fāmili. (Liv. 10:​12-14; Teu. 31:12) ʻI he ngaahi feituʻu lahi ʻi he ʻahó ni, ʻoku siʻisiʻi ke fai fakataha ai ʻe he ngaahi mēmipa ʻo e fāmilí ha ngaahi meʻa. Kae kehe, ʻoku ʻiloʻi ʻe he kau Kalisitiané ʻa e mahuʻinga ʻo e kau ʻi ha ngaahi ngāue ʻi he tuʻunga ko ha fāmili, tautefito ʻi he fekauʻaki mo e lotú. He pau moʻoni ē ke fakahōifua ki he Tupuʻanga ʻo e fāmilí ʻene ʻafio hifo ki he lotu fāʻūtaha ange kiate ia ʻa e ngaahi fāmilí!

² Malanga Fakataha: Ko e ngāue fakataha ke malangaʻi ʻa e ongoongo leleí ʻoku fakaivimālohiʻi ai ʻa e haʻi fakafāmilí. Ko ia ai, tānaki atu ki he ngāue fakamalanga fakataha mo e niʻihi kehe ʻi he fakatahaʻangá, ʻe toe ngāue tuʻumaʻu ha tokotaha mātuʻa mo hono uaifí mo e fānaú. (1 Tim. 3:​4, 5) Neongo hono maʻu ha taimi-tēpile moʻumoʻuá, naʻa mo e kau ʻovasia fefonongaʻakí ʻoku nau fokotuʻutuʻu ha taimi ke ngāue ai mo honau ngaahi uaifí ʻi he ngāue fakafaifekaú.

³ Ko e ngaahi mātuʻa ʻoku nau ngāue fakamalanga mo ʻenau fānaú ʻoku nau malava ke tokoniʻi kinautolu ke fakalakalaka ʻi he tuʻunga ko e kau ʻevangeliō. ʻE ʻikai ngata pē ʻi he fakatokangaʻi ʻe he fānaú ʻa e fiefia mo e fiemālie ʻenau mātuʻá ʻi he ngāue fakafaifekaú ka te nau toe sio ki he fakahāhā ʻe heʻenau mātuʻá ʻenau ʻofa ʻa kinautolu tonu kia Sihová pea ki he kaungā faʻahinga ʻo e tangatá. (Teu. 6:​5-7) ʻOku ʻikai ke hōloa ʻa e mahuʻinga ʻo e ngāue fakataha ko iá ʻi he tupu hake ʻa e fānaú ʻi ʻapi ʻo taʻumotuʻa angé. Ko ha ongo meʻa mo hona ngaahi foha ʻe toko tolu ʻi he vahaʻa ʻo e taʻu 15 mo e 21 ʻoku hokohoko atu ʻenau ngāue fakataha ʻi he ngāue fakafaifekaú ʻi ha tuʻunga tuʻumaʻu. Naʻe pehē ʻe he Tamaí: “ʻOkú ma akoʻi kiate kinautolu ha meʻa ʻi he taimi kotoa pē. Pea ʻokú ma fakapapauʻi ko ha hokosia fakafiefia mo fakalototoʻa ia.”

⁴ Teuteu Fakataha: Kuo ʻiloʻi ʻe he ngaahi fāmilí ʻoku ʻaonga ke teuteu fakataha ki he ngāue fakafaifekaú. ʻOku faʻa saiʻia ʻa e fānaú ʻi he ngaahi taimi ʻahiʻahí ʻi he taufetongi ʻa e ngaahi mēmipa ʻo e fāmilí ʻi hono fai ʻo e fanga kiʻi tuʻuakí pe hoko ko ha tokotaha-ʻapi. ʻOku ngāueʻaki ʻe he niʻihi ha ngaahi miniti siʻi ʻi he ngataʻanga ʻo e ako fakafāmilí ke fai ai ʻa e meʻá ni.

⁵ ʻOku tupulekina ʻetau fiefiá ʻi he taimi ʻoku tau kau fakataha ai mo e faʻahinga ʻoku tau ʻofa aí ʻi he ngaahi ngāue mahuʻinga mo fakafiemālié. He meʻa fakafiefia ē ki he ngaahi mēmipa ʻo e fāmilí ke ngāue fakataha ʻi he ngāue fakafaifekau ʻi he fale ki he falé pea pehē ki hono fai ha ngaahi toe ʻaʻahi mo fakahoko ha ngaahi ako Tohi Tapú! Ko ia ʻi hoʻo lotu fakataha kia Sihova mo ho fāmilí, ʻe lava ke ke talaki fiefia: “Ka ko au mo hoku fale te mau tauhi ʻa Sihova.”—Sios. 24:15.