Fakafiemālie ki he Loto-Mafesí
1 Kuo ʻikai ha toe taimi ʻi he hisitōlia ʻo e faʻahinga ʻo e tangatá naʻe fiemaʻu lahi fau ai ʻa e fakafiemālié ka ko e taimí ni. ʻI he muimui ki he tataki ʻa hotau Tuʻi ko Kalaisi Sīsuú, ʻoku tau ngāue mo kitautolu foki ke “haʻihaʻi ʻa e kakai ʻoku loto mafesi.”—Ai. 61:1.
2 Founga ke Fai Aí: Ke fakafiemālieʻi ʻa e kakaí, ko ʻetau ngāue fakafaifekaú ʻoku totonu ke fakahoko ia ʻaki ha tuʻuaki fakalototoʻa mo teuteuʻi lelei. ʻI he ʻikai ke tau lahi fakamatala ki he ngaahi ngāue kovi mo e ngaahi tokāteline loi ʻi he māmaní, ʻoku hoko ai ʻo muʻomuʻa ʻi heʻetau fetalanoaʻakí ʻa e moʻoni Fakatohitapú mo e ʻamanaki fakafiefia ki he ngaahi talaʻofa fakafiemālie ʻa e ʻOtuá. ʻOku ʻikai ke ʻuhinga ʻeni ia ʻoku ʻikai totonu ke fai ha lāulea ki ʻĀmaketone. Ko ʻetau ngāué ke fanongonongo fakatouʻosi ʻa e “taʻu ʻo e hoifua ʻa e ʻEiki, mo e taimi sauni ʻa hotau ʻOtua,” pea ke “lea ke fakatafoki ae agahala mei hono hala kovi.” Kae kehe, ko e fakatokanga ʻo ʻĀmaketoné mo ha fakamatala ki hono ngaahi nunuʻa fakaefakaʻauhá ʻoku ʻikai ʻuhinga ia aí ke fakapūlouʻi ʻa e kaveinga ʻo e ongoongo lelei ʻo e Puleʻanga ʻo e ʻOtuá.—Ai. 61:1, 2; Isi. 3:18, PM; Mt. 24:14.
3 Mei he Matapā-ki-he-Matapā: ʻOku ʻikai ko ha meʻa foʻou ia ke maʻu ha kakai ʻoku nau loto-siʻi koeʻuhi ko e mahamahakí, mate ha ʻofaʻanga, fakamaau taʻetotonu, pe ko e ngaahi palopalema fakaʻekonōmika. ʻI he faʻifaʻitaki kia Kalaisí ʻoku ‘langa hotau fatú’ mo fakahā ʻa e kaungāongoʻi ki he faʻahinga ʻoku tau fetaulaki mo ia ʻi he ngāue fakafaifekaú. (Luke 7:13; Loma 12:15) Neongo te tau lau ha konga Tohi Tapu ʻe taha pe ua ʻoku felāveʻi mo e palopalemá, kuo pau ke tau ‘vave he fanongó,’ ʻo fakaʻatā ai ʻa e tokotahá ke ne fakahaaʻi mai ʻene ngaahi ongoʻí. (Sem. 1:19) ʻI he tomuʻa fanongó, ʻoku tau mateuteu lahi ange ai ke ʻoatu ha fakafiemālie.
4 ʻI ha taimi feʻungamālie he lolotonga ʻo e fetalanoaʻakí, te tau pehē nai, “ʻOku ou loto ke talanoa mo koe ki ha ngaahi lea fakalototoʻa mei he Tohi Tapú.” ʻOku totonu ke ngāueʻaki ʻa e fakafuofua leleí koeʻuhí ke ʻoua te tau feinga ke fakahalaʻi ʻa e fakakaukau hala kotoa pē ʻoku ʻomai nai ʻe he tokotahá. ʻI hono kehé, ʻoku totonu ke tau tokangataha ke ʻoatu ha fakalototoʻa mo e fakafiemālie ʻaki hono ngāueʻaki ʻa e Tohi Tapú ke ueʻi ʻa e lotó. ʻI he tuʻunga ko ʻení, te tau sio nai ki he Reasoning From the Scriptures peesi 117-121 ʻi he kaveinga ko e “Encouragement.” Pe te ke ʻoange nai ki he tokotaha-ʻapí ha tatau ʻo e tuleki Fakafiemālie ki he Kau Loto-Mafasiá pea vakai ki he fakamatala fakalototoʻa ʻi lotó.
5 Kumi ha Faingamālie ke Fakafiemālieʻi Ai ʻa e Niʻihi Kehé: ʻOkú ke ʻilo ha kaungāʻapi, kaungāngāue, kaungāako, pe mēmipa ʻi he fāmilí ʻokú ne fiemaʻu ha fakafiemālie? Fēfē ke ke feinga ke ʻaʻahi ki he ʻapi ʻo e faʻahinga peheé ʻi he taumuʻa ke ʻoatu ha fakafiemālie mei he Tohi Tapú. ʻI hono ʻiloʻi ʻa e ʻuhinga ʻoku nau fiemaʻu ai ha fakafiemālié, ʻe lava ke ke mateuteu ai ki he fiemaʻu pau ko iá. ʻI he tuʻungá ni, kuo fai ai ʻe he niʻihi ha tohi pe telefoni. Ko e ʻofa moʻoni ki he kaungāʻapí ʻe ueʻi ai kitautolu ke fakahā ʻa e kaungāongoʻi pea ʻoatu ʻa e fakafiemālie ʻoku fiemaʻu mei he Tohi Tapú.—Luke 10:25-37.
6 ʻIo, ʻoku fekauʻi kitautolu ke fakafiemālieʻi ʻa e faʻahinga ʻoku tangí, ke fakafiefiaʻi ʻa e loto-mamahí pea ke ʻoange kia kinautolu ʻa e ʻamanaki ki ha kahaʻu fiefia. Ko e fakafiemālie ʻeni ʻoku fiemaʻu ʻe he kakai takatakai ʻi he māmaní. Ko e talanoa fiefia fekauʻaki mo e ngaahi meʻa lelei lahi kuo talaʻofa ʻe he ʻOtuá ʻe ʻomai ai ʻa e fakafiemālie mo e ʻamanaki ki he faʻahinga loto-totonú. ʻOfa ke tau manatuʻi maʻu pē ʻa e fiemaʻu ke haʻihaʻi ʻa e kakai ʻoku loto-mafesí.