Puha Fehuʻi

◼ Ko e hā ʻa e tohi ʻe ua ʻoku totonu ke ako ʻe he faʻahinga mahuʻingaʻiá?

Ko e tohi Akoʻi ʻe he Tohi Tapú ʻa ʻetau meʻangāue tefito ke kamata mo fakahokoʻaki ʻa e ngaahi ako Tohi Tapú. Neongo ʻoku ʻikai taʻofi hano ngāueʻaki ha tohi kehe, hangē ko ha tuleki feʻungamālie ke kamata ha ako Tohi Tapu, ka ʻoku totonu ke fai ha feinga ke fetongi leva ki he tohi Akoʻi ʻe he Tohi Tapú. Kuo maʻu ʻa e ngaahi ola tuʻu-ki-muʻa ʻi hono ngāueʻaki ʻa e tohi Akoʻi ʻe he Tohi Tapú ke kamata ha ngaahi ako.

ʻI he ʻosi pē ʻa e tohi Akoʻi ʻe he Tohi Tapú pea ʻoku fakalakalaka ʻa e tokotaha akó, ʻoku totonu leva ke ako ʻa e tohi Lotu ki he ʻOtua. (Kol. 2:7) ʻI he peesi 2 ʻoku fakamatalaʻi ai ʻa e taumuʻa ʻo e tohi ko iá: “ʻOku ekinaki mai ʻa e Tohitapú ki he faʻahinga kotoa ʻoku nau ʻofa ki he ʻOtuá ke ‘mou mafai ke ilo . . . hono loloto, mo hono maoluga’ ʻo ʻene ngaahi moʻoni mahuʻingá. (Efeso 3:18, PM) Ke aʻusia iá, kuo teuteu ai ʻa e tohi ko ení. ʻOku mau ʻamanaki te ne tokoniʻi koe ke ke tupu fakalaumālie mo mateuteu ange ai ke ʻaʻeva ʻi he hala fāsiʻi ko ia ʻoku taki atu ki he māmani foʻou māʻoniʻoni ʻa e ʻOtuá.”

Kapau ʻoku taau ʻa e tokotaha akó ke papitaiso ki muʻa ke kakato ʻa e ongo tohí, ʻoku totonu ke hokohoko atu ʻa e akó kae ʻoua ke ʻosi ʻa e ongo tohí. Neongo kuo papitaiso ʻa e tokotaha akó, ʻe lava ke lau ʻe he faiakó ʻa e taimi, toe ʻaʻahi mo e ako Tohi Tapú. Ko e tokotaha malanga ʻoku ngāue fakataha mo e faiakó pea kau ki hono fai ʻo e akó te ne toe lava ke lau ʻa e taimí.