Ko e Tohi Akoʻi ʻe he Tohi Tapú—Ko ʻEtau Tokoni Ako Tohi Tapu Tefitó Ia
1 He meʻa fakafiefia moʻoni ia ke tau siotonu ʻi hono tukuange mai ʻa e tohi Ko e Hā ʻOku Akoʻi Moʻoni ʻe he Tohi Tapú? ʻi he Fakataha-Lahi Fakavahe “Talangofua Fakaʻotua”! Naʻe fiefia ʻa e kau fakafofongá ʻi hono maʻu ha tatau fakafoʻituitui ʻi he ngataʻanga ʻo e polokalama ʻi he Tokonakí. ʻE anga-fēfē hano ngāueʻaki ʻa e meʻangāue fakafaiako foʻou ko ení? ʻOku faʻufaʻu ia ke hoko ko ʻetau tokoni ako Tohi Tapu tefitó ia. Neongo ʻe ʻuluaki fakahaaʻi ʻa e tohi foʻoú ko e tohi ia ke tuʻuaki ʻi Maʻasí, ʻoku fakalototoʻaʻi atu ʻa e kau malangá ke nau kamata ngāueʻaki leva ia ke kamata mo fai ai ʻa e ngaahi ako Tohi Tapú.
2 Ngaahi Ako Tohi Tapu Lolotongá: Ko e kau malanga ʻoku nau fakahoko ʻa e ngaahi ako Tohi Tapu ʻi he tohi ʻIlo pe polosiua Fiemaʻu ʻoku totonu ke nau ngāueʻaki ʻa e fakafuofua leleí ʻi hono fili ʻa e founga mo e taimi ke kamata ai ʻa hono ngāueʻaki ʻa e tohi foʻoú lolotonga ʻa e akó. Kapau naʻe toki kamataʻi ki muí ni mai ha ako, ʻe lava ke ke kamata pē mei he kamataʻanga ʻo e tohi foʻoú. Kapau kuó ke tō atu ki loto ʻi he tohi ʻIlo, te ke hoko atu nai ʻa e akó ʻi he vahe fehoanakimālie ʻo e tohi Akoʻi ʻe he Tohi Tapú. Kapau ʻokú ke ofi ki he ngataʻanga ʻo e tohi ʻIlo, te ke fili nai ke fakakakato ai leva ʻa e tohi ko iá.
3 ʻOku ʻikai ha veiveiua ko e kotoa ʻo kitautolú ʻoku tau ʻiloʻi ʻa e kakai tokolahi te nau maʻu ʻaonga mei hono ako ʻa e tohi Akoʻi ʻe he Tohi Tapú. Fēfē ke ke tuʻuaki ki he tokotaha taki taha ha ako Tohi Tapu ʻi he tokoni ako fakalakalaka ko ení? Ko e fakatātaá, ko e faʻahinga kuo nau ako ʻa e polosiua Fiemaʻu pe ko e tohi ʻIlo ka naʻe ʻikai te nau fakalakalaka atu ki he fakatapui mo e papitaisó te nau loto nai ke toe hoko atu ʻenau akó ʻo ngāueʻaki ʻa e tohi foʻoú. ʻE fili nai ʻe he ngaahi mātuʻá ke nau ngāueʻaki ʻa e tohí ʻi heʻenau ʻoatu ʻa e ʻilo totonu ʻo e finangalo ʻo e ʻOtuá ki heʻenau fānaú.—Kol. 1:9, 10.
4 Ko Hono Ako ha Tohi Hono Ua: ʻOku ʻi ai ha fokotuʻutuʻu ki ha tokotaha ako Tohi Tapu ke ne ako ha tohi hono ua hili hono fakakakato ʻa e Ko e Hā ʻOku Akoʻi Moʻoni ʻe he Tohi Tapú? ʻIo. Kapau ʻoku hā mahino ʻoku fai ʻe ha tokotaha ako ha fakalakalaka, neongo ʻoku māmālie, pea ʻokú ne fakatupulekina ha houngaʻia ki he meʻa ʻokú ne akó, ʻe hoko atu nai ʻa e ako Tohi Tapú ʻo ngāueʻaki ʻa e tohi Lotu ki he ʻOtua Moʻoni Pē Tahá. ʻOku tau falala-pau ʻe hoko ʻa e tohi Akoʻi ʻe he Tohi Tapú ko ha meʻangāue mālohi ia ʻi hotau nimá ʻi heʻetau fakahoko ʻa e fekau ke ngaohi-ākongá.—Mt. 28:19, 20.