Konga 1—Fai ʻa e Ngaahi Ako Tohi Tapu Fakalakalaká
Ko e Hā ʻa e Ako Tohi Tapu?
1 ʻI māmani lahi, ʻoku fakahoko ai ʻa e ako Tohi Tapu ʻe ono miliona nai ʻe he kakai ʻa e ʻOtuá ʻi he māhina taki taha. ʻI hono ngāueʻaki ʻa e ngaahi founga fakafaiako leleí, ʻe lava ke tau tokoniʻi ai ʻa e kau ako Tohi Tapu ko ení ke nau fakalakalaka ki he tuʻunga ʻo e fakatapuí mo e papitaisó pea hoko ʻo “mafai ke akoʻaki ki ha kakai kehe foki.” (2 Tim. 2:2) Te ke saiʻia ke tokoniʻi hoʻo tokotaha akó ke ne fai ha fakalakalaka pehē? Kamata ʻi he ʻīsiu ko ení, ʻe fakaeʻa ai ʻi he ʻEtau Ngāue Fakafaifekau ʻo e Puleʻanga ha ngaahi kupu hokohoko ʻa ia ʻe fakamatalaʻi ai ʻa e ngaahi tafaʻaki tefito ʻo hono fai ʻa e ngaahi ako Tohi Tapu fakalakalaká.
2 Taimi ke Līpooti Ai ha Ako Tohi Tapu: Kapau ʻokú ke fai ha ngaahi fetalanoaʻaki Fakatohitapu tuʻumaʻu mo hokohoko lelei, neongo ʻene nounoú, ʻo ngāueʻaki ʻa e Tohi Tapú fakataha mo e taha ʻo e ʻū tohi ʻoku fakataumuʻa ki he akó, ʻokú ke fai ai ha ako Tohi Tapu. ʻOku moʻoni eni neongo kapau ʻoku fakahoko ʻa e akó ʻi he matapaá pe ʻi he telefoní. ʻE lava ke līpooti ʻa e akó ʻi hono fai ʻo tuʻo ua hili hono fakahāhā ʻa e fokotuʻutuʻu ʻo e akó pea kapau ʻoku ngalingali ʻe hokohoko atu ʻa e akó.
3 Ko e polosiua Fiemaʻu mo e tohi ʻIlo ko e ongo tohi ia ʻoku ngāueʻaki ki hono fai ʻo e ngaahi ako Tohi Tapu lahi. Hili ʻa hona fakakakató, kapau ʻoku hā mahino ʻoku fai ʻe ha tokotaha ha fakalakalaka, neongo ʻene māmālié, pea ʻokú ne fakatupulekina ʻa e houngaʻia ki he meʻa ʻokú ne akó, ʻe hoko atu leva nai ʻa e akó ki he tohi Lotu ki he ʻOtua. Ko e polosiua ʻE Lava Ke Ke Hoko ko e Kaumeʻa ʻo e ʻOtuá! ʻe ngāueʻaki nai ia ke ako ai mo e kakai ʻoku fakangatangata ʻenau tuʻunga fakaakó pe malava fakaelautohí.
4 Ko e ngāue ako Tohi Tapú kuo ola lelei ia ʻi hono tokoniʻi ʻa e laui miliona ke nau hoko ko e kau ākonga moʻoni ʻa Sīsū Kalaisi. (Mt. 28:19, 20) ʻI hono ngāueʻaki ʻa e ngaahi fokotuʻu ʻoku ʻomai ʻi he ngaahi kupu ka hoko mai ʻi he fakahokohoko ko ení ʻe lava ke ke fai ai ha ako Tohi Tapu fakalakalaka.