Fai ʻa e Ngaahi Ako Tohi Tapu Fakalakalaka ʻi he Matapaá mo e Telefoní
1. Ko e hā ʻetau taumuʻá ʻi hono fai ʻa e ngaahi ako Tohi Tapú?
1 Ko ha meʻa fakafiefia ia ke kamata ha ako Tohi Tapu! Kae kehe, ko hono maʻu ha taha ʻokú ne mahuʻingaʻia ʻi hono ako ʻa e Tohi Tapú ko e kamatá pē ia. Ko e taumuʻa ʻo e akó ke tokoniʻi ʻa e tokotahá ke ne hoko ko ha ākonga moʻoni ʻa Kalaisi. (Mt. 28:19, 20) Ko e hā ʻe lava ke ne tokoniʻi kitautolu ke tau lavaʻi ai ʻa e taumuʻa ko iá?
2. Ko e hā ʻa e ngaahi ako Tohi Tapu ʻi he matapaá mo e telefoní, pea ko e hā ʻoku nau ola lelei aí?
2 Kakai Femoʻuekina: Ko e kakai he ʻaho ní ʻoku nau lahilahi femoʻuekina. ʻI he ngaahi feituʻu ʻe niʻihi, ko e tokosiʻi pē nai ʻoku nau tomuʻa loto-lelei ai ke vaheʻi ha houa kakato ke ako ʻa e Tohi Tapú. Ke tokoniʻi ʻa e faʻahinga peheé, kuo fakalotolahiʻi kitautolu ke kamata mo fai ʻa e ngaahi ako Tohi Tapú ʻi he matapaá pe ʻi he telefoní. ʻI he ʻuluaki taimí, ko e ngaahi akó ni ʻe ʻi ha tuʻunga nounou nai pea ʻe lava ke kau ki ai ha fetalanoaʻaki ʻi ha ngaahi konga Tohi Tapu siʻi pē ʻo ngāueʻaki ha palakalafi ʻe taha pe ua ʻi ha tohi, hangē ko e Akoʻi ʻe he Tohi Tapú. He ala fakaongoongoleleiʻi moʻoni ē ko e kau malanga tokolahi ʻoku nau fai he taimí ni ʻa e ngaahi ako pehē ʻi he matapaá pe ʻi he telefoní!
3. Ko e hā ʻoku totonu ai ke tau feinga ke fakalahi ʻa e vahaʻa taimi ʻoku ngāueʻaki ki hano fai ha ako ʻi he matapaá?
3 Kae kehe, ʻoku totonu ke tau fiemālie ke hokohoko atu taʻefakangatangata ʻa hono fai ʻo ha ako ʻi he matapaá? ʻIkai. Neongo ʻoku fakapotopoto ke ʻoua te tau talanoa lōloa ʻi he taimi ʻoku ʻuluaki kamata ai ha akó, ko e Our Kingdom Ministry ʻo Mē 1990, peesi 8, naʻe pehē ai: “ʻI hono fokotuʻu pē ʻa e akó pea tupulekina ʻa e mahuʻingaʻia ʻa e tokotaha-ʻapí, ʻe lava ke fakamoleki nai ha vahaʻa taimi lōloa ange ʻi he akó.” ʻOku mātuʻaki mahuʻinga eni. Ke fakatātaaʻi: ʻE ʻuluaki fafangaʻi nai ha kiʻi tama fiekaia ʻaki ha kiʻi meʻa siʻisiʻi kae ʻoua ke foki mai ʻa hono uʻá, ka heʻikai lava ke tau ʻamanekina te ne toe maʻu hono mālohi kakató pea tupu ʻi he tuʻunga anga-mahení kapau naʻe fafangaʻi ia ʻaki ha meʻa siʻisiʻi ʻi ha vahaʻa taimi lōloa. ʻI he tuʻunga meimei tatau, ʻoku fiemaʻu ki ha tokotaha ako Tohi Tapu ha ako ʻoku fai fakalelei ange mo fai maʻu pē koeʻuhi ke hoko ai ko ha sevāniti matuʻotuʻa ange ʻa e ʻOtuá.—Hep. 5:13, 14.
4. Ko e hā ʻa e ngaahi ʻaonga ʻo hono fai ha ako Tohi Tapu ʻi he loto falé?
4 Ngaahi Ako Tohi Tapu ʻi ʻApi: ʻOku lelei ange ke fai ʻa e akó ʻi ha feituʻu ʻoku ʻikai sio mai ki ai ha taha—ʻi ha loto fale pe ʻi ha feituʻu feʻungamālie kehe. ʻE faingofua ange ʻi he meʻá ni ʻa e akó pea ʻe tokoniʻi ai ʻa e tokotaha akó ke ne maʻu ʻa e ʻuhinga ʻo e Folofola ʻa e ʻOtuá. (Mt. 13:23) ʻE toe malava lelei ange ai ki he faiakó ke ne feʻunuʻaki ʻa e meʻa ʻoku fai ai ʻa e akó ki he ngaahi fiemaʻu ʻa e tokotaha akó. ʻIkai ngata aí, ko hono maʻu ha vahaʻa taimi ako lōloa angé ʻe lava ke fakahoko ai ha lāulea fakaʻāuliliki mo fakatuimālohi ange ki he Folofola ʻa e ʻOtuá.—Loma 10:17.
5. ʻE lava fēfē ke tau ʻai ke hiki mei ha ako ʻi he matapaá ki ha ako ʻi he loto falé?
5 ʻE lava fēfē ke ke ʻai ke hiki mei he ako ʻi he matapaá ki ha ako ʻi he loto falé? Hili ha ngaahi ako nounou, ko e hā ʻoku ʻikai ke tuʻuaki ange ai pē ke ako ʻi ha vahaʻa taimi lōloa ange mo paú? Pe te ke ngāueʻaki nai ha fakalea ʻikai fakahangatonu ʻaki hono ʻeke ange ki he tokotahá, “ʻE ʻi ai hao taimi he ʻahó ni ke ta tangutu hifo ai ʻo fetalanoaʻaki ki he meʻá ni?” pe “Ko e hā e lahi ʻo e taimi te ke saiʻia ke fakamoleki he ʻahó ni ʻi he fetalanoaʻaki ki he kaveinga ko ení?” Kapau ʻe ʻikai lavameʻa hoʻo ngaahi feingá, ʻoku totonu ke hokohoko atu ʻa e ngaahi ako nounou ʻi he matapaá. Toe feinga ʻi ha taimi feʻungamālie ke ʻai ai ke hiki ki ha ako ʻi he loto falé.
6. Ko e hā ʻa e taumuʻa ʻoku totonu ke tau fakahokoʻaki ʻetau ngāue fakafaifekaú, pea ʻe lava fēfē ke tokoniʻi kitautolu ʻe he ngaahi fokotuʻu ʻi he kupu ko ení ke lavaʻi ai ʻa e taumuʻa ko iá?
6 ʻI heʻetau hokohoko atu ke kumi ki he faʻahinga tāú, ʻai ke ʻoua naʻa ngalo ʻa ʻetau taumuʻa ki hono kamata mo fai ha ngaahi ako Tohi Tapú. Ko ʻetau taumuʻá ke tokoniʻi ʻa e faʻahinga loto-totonú ke nau hoko ko e kau sevāniti fakatapui mo papitaiso ʻa Sihova. ʻOfa ke ne tāpuakiʻi ʻetau ngaahi feingá ʻi heʻetau fakahoko ʻetau ngāue fakafaifekaú fakataha mo e taumuʻa ko ení.—2 Tim. 4:5.