Puha Fehuʻi

◼ ʻOku totonu ki ha fefine malanga ke ne tui ha pūlou, kapau ʻokú ne ngāue fakataha mo ha tokoua ʻi hono fakahoko ʻo ha ako Tohi Tapu ʻi he matapaá?

ʻI he taimi ʻoku fakahoko ai ʻe ha fefine malanga ha ako Tohi Tapu tuʻumaʻu pea ʻoku ʻi ai mo ha tokoua, ʻoku totonu ke ne tui ha pūlou. (1 Kol. 11:3-10) Ko e ʻīsiu ʻo e Taua Leʻo, Siulai 15, 2002 peesi 27, ʻoku fakamatala ai: “Ko ha konga ʻeni ia ʻo e faiako ʻosi fokotuʻutuʻu ki muʻa ʻa ia ko e tokotaha ʻokú ne fai ʻa e akó ʻokú ne tataki moʻoni ia. ʻI he malumalu ʻo e ngaahi tuʻungá ni, ʻoku hoko ʻa e akó ia ko ha fakalahi ʻo e fakatahaʻangá. Kapau ʻoku fakahoko ʻe ha fefine Fakamoʻoni ʻosi papitaiso ha ako pehē ʻoku ʻi ai ha tangata Fakamoʻoni ʻosi papitaiso ai, ʻoku totonu ke ne tui ha pūlou.” ʻOku hoko eni tatau ai pē pe ʻoku fakahoko e akó ʻi ha ʻapi, ʻi he matapaá pe ko ha toe feituʻu kehe.

ʻI he tafaʻaki ʻe tahá, kapau ko e ako Tohi Tapu ʻi he matapaá ʻoku teʻeki ai ke fokotuʻu, ʻoku ʻikai fiemaʻu ʻa e tuofefiné ke ne tui ha pūlou kapau ʻoku ʻi ai mo ha tokotaha malanga ʻo e Puleʻangá ko ha tangata, neongo ko e taumuʻa ʻo e toe ʻaʻahí ko hono fakahāhaaʻi ʻo e ako Tohi Tapú pe lave ki ha fakamatala ʻi ha taha ʻo e ʻū tohi ʻoku fokotuʻu ke fai ai ʻa e akó. Ko hono moʻoní, ko e ngaahi ako Tohi Tapu ʻi he matapaá ʻoku ʻikai ke faʻa fokotuʻu leva ia, ka ʻoku fakafou ʻi he ngaahi toe ʻaʻahi hokohoko ʻoku fakalakalaka, ko e kau malangá ʻoku fiemaʻu ke nau fakakaukau ki he ngaahi tuʻungá pea fakapapauʻi lelei ʻa e tuʻunga ʻoku totonu ke ngāueʻaki ai ʻa e pūloú.