Ngaahi Meʻa ke Manatuʻi ki he Fakamanatú

ʻOku totonu ki he kau mātuʻá ke nau fai ha tokanga ki he ngaahi meʻa ko ení ʻi he teuteu atu ki he Fakamanatú:

◼ Fakapapauʻi ʻe ʻikai ke tufa ʻa e maá mo e uainé kae ʻoua kuo tō ʻa e laʻaá.

◼ ʻOku totonu ke maʻu mo ʻosi teuteu ʻa e faʻahinga mā mo e uaine ʻoku feʻungamālié.—Sio ki he Taua Leʻo ʻo Fepueli 15, 2003, peesi 14-15.

◼ ʻOku totonu ke tomuʻa ʻomai ʻo fokotuʻutuʻu ki he holó ʻa e peletí, ipu sioʻatá pea mo ha tēpile mo ha meʻa ʻufiʻufi tēpile feʻunga.

◼ ʻOku totonu ke fakamaʻa fakaʻāuliliki ki muʻa ʻa e Fale Fakatahaʻangá pe ko ha feituʻu faiʻanga fakataha kehe pē.

◼ Ko e kau fakanofonofó mo e kau tufá ʻoku totonu ke fili pea fakahinohinoʻi ki muʻa ʻo fekauʻaki mo honau ngaahi fatongiá, ko e founga totonu ke muimui aí pea mo e fiemaʻu ki ha vala mo e teuteu tāú.

◼ ʻOku totonu ke fai ʻa e ngaahi fokotuʻutuʻu ke ngāue ki ha faʻahinga pē ʻo e kau paní ʻoku vaivai ʻo ʻikai malava ke ʻi aí.

◼ ʻI he taimi ʻoku fakataimitēpileʻi ai ha fakatahaʻanga lahi hake he tahá ke ngāueʻaki ʻa e Fale Fakatahaʻanga tatau, ʻoku totonu ke ʻi ai ʻa e feongoongoi lelei ʻi he lotolotonga ʻo e ngaahi fakatahaʻangá koeʻuhi ke fakaʻehiʻehi ai mei he feʻefiʻefihi ʻoku ʻikai fiemaʻu ʻi he loki talitalí pe matapā hūʻangá, ʻi he hala ʻaluʻanga kakaí pea ʻi he tauʻanga meʻalelé.

◼ Kapau ʻe ngāueʻaki ha feituʻu faiʻanga fakataha kehe, fakapapauʻi ʻoku ʻi ai ha meʻa fakaleʻolahi totonu koeʻuhí ke lava ʻo fanongo ʻa e tokotaha kotoa ʻi he kau fanongó ki he tokotaha malangá.