Fakafiemālie ki he Kau Mamahí
1. Ko e hā ʻoku fiemaʻu ai ʻe he kau mamahí ha fakafiemālié?
1 Ko e mate ha taha naʻá te ʻofa ai ko ha hokosia fakamamahi moʻoni ia, tautautefito kiate kinautolu ʻoku ʻikai haʻanau ʻamanaki ki he Puleʻangá. (1 Tes. 4:13) ʻOku faʻa fifili ai ʻa e tokolahi: ‘Ko e hā ʻoku mate ai ʻa e kakaí? ʻOku nau ʻi fē ʻi heʻenau maté? Te u toe sio nai ki hoku ʻofaʻangá?’ ʻOku hā atu ʻi lalo ha ngaahi fokotuʻu ʻe niʻihi ki hono fai ha fakafiemālie ki he faʻahinga ʻoku tau fetaulaki mo ia ʻi he malaʻe malangá ʻa ia ʻoku nau lolotonga mamahi ʻi ha mate ha kāinga pe ko ha kaumeʻa.—Ai. 61:2.
2. Kapau ʻe tala mai ʻe ha tokotaha-ʻapi ʻoku ne tengihia, ʻoku totonu nai ke tau feinga maʻu pē ke fakalōloa ʻetau faifakamoʻoní?
2 Mei he Fale ki he Fale: ʻE tala mai nai ʻe ha tokotaha-ʻapi ne toki mate atu ha taha ʻi hono fāmilí. ʻOkú ne lea tangi mai pē? ʻOku kei tengihia mai ha kāinga mei he falé? ʻI ha tuʻunga pehē, ʻoku lelei ange ke ʻoua ʻe toe fakalōloa e faifakamoʻoní. (Koh. 3:1, 7) Mahalo ʻe lava ke tau fakahaaʻi ʻetau kaungāongoʻí, ʻaki hono ʻoange ki ai ha tuleki, makasini pe ko ha polosiua feʻungamālie pea tau mavahe anga-fakaʻapaʻapa leva. Pea tau toki foki leva ki ai ʻi ha taimi ʻe faingamālie ange ai ʻa e tokotaha-ʻapí ke vahevahe mo ia ha ngaahi fakafiemālie lahi ange mei he Tohi Tapú.
3. ʻO ka faingamālie fakatatau ki he tuʻungá, ko e hā ʻa e ngaahi konga Tohi Tapu ʻe malava ke tau fakahaaʻi ki ha tokotaha-ʻapi kei tengihiá?
3 ʻI ha ngaahi taimi kehe, ʻoku tau ngali ʻiloʻi nai ai ʻe lava ke fai ha talanoa lahi ange ʻi he ʻuluaki ʻaʻahí pē. Neongo ʻoku ʻikai ko ha taimi ia ke fakahalaʻi ai ʻa e ngaahi fakakaukau halá, ʻe malava lelei ke lau fakataha mo kinautolu ʻa e ngaahi talaʻofa ʻa e Tohi Tapú fekauʻaki mo e toetuʻú. (Sione 5:28, 29) Pe ko ʻetau fakahaaʻi ange ʻa e lau ʻa e Tohi Tapú fekauʻaki mo e tuʻunga ʻo e maté. (Koh. 9:5, 10) ʻE toe hoko ʻo fakafiemālie nai ha fakamatala Fakatohitapu fekauʻaki mo ha toetuʻu. (Sione 11:39-44) Ko e toe founga ʻe taha ko ʻetau lāulea ki he ʻamanaki ko ia naʻe fakahāhā ʻe he tokotaha anga-tonu ko Siopé kia Sihová. (Siope 14:14, 15) Ki muʻa ke mavahé, ʻe lava ke tau tuʻuaki ange ʻa e Ko e Hā ʻOku Hoko Kiate Kitautolu ʻi he Taimi ʻOku Tau Mate Aí?, ʻI he Mate ha Taha ʻOkú Ke ʻOfa Ai, pe ko ha toe polosiua pe tuleki ʻoku feʻungamālié. Pe ko ʻetau tuku ʻa e tohi Akoʻi ʻe he Tohi Tapú, ʻo fakahanga e tokangá ki he fakamatala ʻi he vahe 6, pea fokotuʻutuʻu ke fai ha talanoa ki he kaveinga ko iá ʻi heʻetau toe foki atú.
4. Ko e ngaahi taimi kehe fē ʻoku lava ke tau ʻoatu ai ʻa e fakafiemālié?
4 ʻI ha Ngaahi Taimi Kehe: Kapau ʻoku malangaʻi ha putu ʻi he Fale Fakatahaʻangá, ʻe ʻi ai nai ʻa e kakai kehé? ʻE lava ke nau ala maʻu ʻa e tohi ko ia ʻoku ʻoatu ai ʻa e fakafiemālié. ʻOku fiefia ʻa e ngaahi ʻapi faiʻanga putu ʻe niʻihi ke ʻi ai maʻu pē haʻanau ngaahi tohi feʻungamālie maʻá e ngaahi fāmili tengihiá. ʻI he taimi ʻe niʻihi, ko e ngaahi fanongonongo putú ʻa ia ʻoku ʻasi ʻi he nusipepá kuo maʻu ai e faingamālie ke fai ha tohi nounou ʻo e fakafiemālie ki he ngaahi mēmipa tengihia ʻi he fāmilí. ʻI ha tuʻunga ia ʻe taha, hili hono maʻu ha tohi naʻe mono fakataha ai mo ha ngaahi tuleki, naʻe ʻalu leva ʻa e uitou tangatá mo hono ʻofefiné ki he ʻapi ʻo e tokotaha malangá ʻo fehuʻi ange: “Ko kimoutolu ʻa e kakai naʻa mou ʻomi ʻa e tohí ni? Ko hono moʻoní, ʻoku ou fie ʻilo lahi ange fekauʻaki mo e Tohi Tapú!” Naʻe loto-lelei ʻa e tangatá mo hono ʻofefiné ki ha ako Tohi Tapu peá na kamata maʻu ʻa e ngaahi fakataha ʻa e fakatahaʻangá.
5. Ko e hā ke tau tokanga ai ki he ngaahi faingamālie ke fakafiemālie ai ʻa e faʻahinga ko ia ʻoku loto-mamahí?
5 ʻOku pehē ʻe he Koheleti 7:2: “ʻOku lelei hake ke ʻalu ki ha fale ʻoku i ai ha tangi, ʻi he ʻalu ki he fale ʻoku fai ai ha inu kava.” ʻOku faʻa fie fanongo ange ki he Folofola ʻa e ʻOtuá ha tokotaha ʻoku loto-mamahi ʻi ha tokotaha kumi ki he fiefiá. ʻOku totonu kiate kitautolu hono kotoa ke tau tokanga ke ʻiloʻi ʻa e ngaahi taimi faingamālie ʻoku feʻungamālie ke fakafiemālieʻi ai ʻa e faʻahinga ʻoku nau tengihia ʻi he mate ha taha naʻa nau ʻofa aí.