“ʻAi ʻEku ʻIoké Kiate Kimoutolu”
1 ʻI ha māmani ʻoku fonu he faingataʻá mo e loto-hohaʻá, kuo tau hokosia ʻa e nonga moʻoni ʻi hono tali ʻa e fakaafe fakalotomāfana ʻa Sīsū ke maʻu ʻa e fakaivifoʻou ʻoku ʻomai ʻi heʻene ʻioké. (Mt. 11:29, 30, NW) Ko hono tali ʻa e ʻioke ʻo e tuʻunga-ākongá ʻoku kau ki ai ʻa e kau ʻi ha ngāue ʻa ia ʻoku ʻikai ngata pē ʻi heʻene faingataʻá ka ʻoku toe fakaivifoʻou foki. ʻOku kau ki ai ʻa hono malangaʻi ʻa e ongoongo lelei ʻo e Puleʻangá mo hono tokoniʻi ʻa e niʻihi kehé ke nau maʻu ʻa e fakaivifoʻou fakataha mo kitautolu ʻi he malumalu ʻo e ʻioke anga-ʻofa ʻa Sīsuú.—Mt. 24:14; 28:19, 20.
2 Fakaivifoʻou mei he Ngāue Fakafaifekaú: Naʻe ʻikai kole ʻa Sīsū ki hono kau muimuí ke tānaki atu ʻene kavengá ki he meʻa ne nau ʻosi fuá. Naʻá ne fakaafeʻi kinautolú ke fetongi ʻenau kavenga mamafá ʻaki ʻene kavenga maʻamaʻá. Heʻikai ke tau kei ongoʻi mafatukituki ʻi he ngaahi loto-hohaʻa mo e taʻehaʻamanaki ʻi he fokotuʻutuʻu ko eni ʻo e ngaahi meʻá; pea heʻikai foki ke tau ngāue ki he ngaahi koloa taʻepaú. (Luke 21:34; 1 Tim. 6:17) Neongo ʻoku tau femoʻuekina pea kuo pau ke tau ngāue ke maʻu ʻa e ngaahi fiemaʻu fakaʻahó, ʻoku tau fakatefito ʻetau moʻuí ʻi he lotu ki he ʻOtuá. (Mt. 6:33) Te tau ʻiloʻi maʻu pē ʻoku fakaivifoʻou ʻa e ngāue fakafaifekaú, ʻo ʻikai fakakavenga, kapau ʻoku tau tauhi maʻu ʻa e vakai totonu ki he meʻa ʻoku mahuʻinga tahá.—Fili. 1:10.
3 ʻOku fakanatula pē ʻetau fiefia ʻi he talanoa fekauʻaki mo ha meʻa pē ʻoku tau mahuʻingaʻia ai. (Luke 6:45) ʻOku tokanga lahi ʻa e kau Kalisitiane kotoa pē kia Sihova mo e ngaahi tāpuaki ʻo e Puleʻangá kuó ne talaʻofá. Ko ia ai, he fakaivifoʻou moʻoni ē ke talanoa fekauʻaki mo e “ogoogo fiefia oe gaahi mea lelei” pea tuku ki mui ʻetau ngaahi hohaʻa fakaʻahó lolotonga ʻetau kau ʻi he ngāue fakafaifekaú! (Loma 10:15, PM) Ko e moʻoni, ko e lahi ange ʻo ʻetau fai ʻo ha meʻa, ko ʻetau hoko ia ʻo pōtoʻi angé pea ko e fiefia lahi ange ia te tau hokosiá. Ko ia ai, ko hono līʻoa ʻa e taimi lahi ange ki he ngāue fakafaifekaú, kapau ʻoku tau malava, ʻe ʻomai ai ʻa e fakaivifoʻou lahi ange. Pea he fakaivifoʻou moʻoni ko e taimi ʻoku tali ai ʻe he faʻahinga tāutaha ʻa ʻetau malangá! (Ng. 15:3) Naʻa mo e taimi ʻoku tau fehangahangai ai mo e taʻemahuʻingaʻiá pe fakafepakí, ʻe ʻomai ʻe he ngāue fakafaifekaú ʻa e fakaivifoʻou fakalaumālie kapau te tau manatuʻi ko ʻetau ngaahi feingá ʻoku fakahōifuaʻi ai ʻa Sihova pea ʻe iku ai ki ha faʻahinga ola lelei pē makatuʻunga ʻi heʻene tāpuakí.—Ng. 5:41; 1 Kol. 3:9.
4 ʻI hono tali ʻa e fakaafe ʻa Sīsuú, ʻoku tau maʻu ai ʻa e monū ʻo e ngāue fakataha mo ia ʻi he tuʻunga ko e Kau Fakamoʻoni ʻa Sihova. (Ai. 43:10; Fkh. 1:5) ʻOku ʻikai ha meʻa ʻe lava ke toe fakaivifoʻou ange ʻi he meʻa ko iá!