ʻE Lava ke ʻAʻau ʻa e Koloa!
1. Ko e hā ke fakakaukau ai ke ngāue tāimuʻa tuʻumaʻú?
1 ʻOkú ke kumi ki he fiefia mo e lavameʻa lahi ange ʻi hoʻo moʻuí? ʻOkú ke maʻu ʻa e fiefia mo e fiemālie ʻi hono tokoniʻi ʻa e niʻihi kehé? ʻOkú ke holi ke fakalahi ʻa hoʻo ngāue kia Sihová? Kapau ʻokú ke tali ʻio ki ha taha pē ʻo e ngaahi fehuʻí ni, tā ʻoku totonu leva ke ke fakakaukau ke ke ngāue tāimuʻa tuʻumaʻu. Ko e moʻoni, ko e ngaahi fatongia fakafāmili mo Fakatohitapu kehé, pea pehē ki he ngaahi fakangatangata ʻi he moʻui leleí mo e tuʻunga fakaesinó, kuo pau ke fai ha fakakaukau ki ai.
2. Lave ki he niʻihi ʻo e ngaahi koloa fakalaumālie ʻoku maʻu ʻe he kau tāimuʻa tuʻumaʻú.
2 Ko e ngaahi tohi fakamānavaʻi fakaʻotua ʻa Solomoné ʻoku fakafekauʻaki ai ʻa e tāpuaki ʻa Sihová mo e ngaahi koloa fakamatelié. (Pal. 10:22) ʻI he ʻahó ni, ko e tāpuaki ʻa Sihová ʻoku iku tefito ia ki he ngaahi koloaʻia fakalaumālie. Ko e ngaahi koloa ko iá ʻoku hulu fau maʻá e kau tāimuʻa tuʻumaʻú. Hangē ko ení, ʻoku nau hokosia ʻa e fiefia lahi ange ʻi he foaki ki he niʻihi kehé ʻi heʻenau ‘fakatau mai ʻa e taimi’ mei he ngaahi meʻa fakafoʻituitui ʻoku nau faí. (Kol. 4:5, NW; Ng. 20:35) Ko ʻenau ngaahi ngāue ʻofá ʻoku fakatokangaʻi mo fakahoungaʻi ia ʻe Sihova. Ko e ‘koloa [pehē] ʻi langí’ heʻikai ʻaupito holo ʻa hono mahuʻingá. (Mt. 6:20; Hep. 6:10) ʻIkai ko ia pē, ʻi hono tauhi ʻe he kau tāimuʻá ha ‘mata huʻufataha’ mo e falala ʻe tokonaki mai ʻe Sihova ʻenau ngaahi fiemaʻú, ʻoku tupu ai ʻo mālohi ange honau vahaʻangatae mo iá.—Mt. 6:22, 25, 32; Hep. 13:5, 6.
3. Ko e hā ʻa e faikehekehe ʻoku hoko ʻi he vahaʻa ʻo e tuli ki he koloa fakalaumālié mo e tuli ki he koloa fakamatelié?
3 Ko e tuli ki he ngaahi koloa fakamatelié ʻoku faʻa iku ia ki he “gaahi holi vale lahi mo fakamamahi.” (1 Tim. 6:9, 10, PM; Sem. 5:1-3) ʻOku ʻikai ʻaupito ko e tuʻungá eni ʻi he tāpuaki ʻa Sihová. ʻI hono fakamoleki ha konga mahuʻinga ʻo honau taimí ʻi he ngāue fakafaifekaú ʻoku tokoniʻi ai ʻa e kau tāimuʻa tuʻumaʻú ke nau tauhi maʻu ʻa e mafamafatatau fakalaumālié mo hano mahinoʻi māʻalaʻala ʻa e ngaahi meʻa mahuʻinga angé. (Fili. 1:10) Naʻe tukuange ʻe ha tokoua ʻe taha ʻa ʻene ngāue ko ha ʻenisiniá ʻa ia naʻe mole lahi ai ʻa e taimí ka ne tāimuʻa. Naʻá ne pehē: “Naʻá ku ʻiloʻi naʻe fakalotomafasia ʻa ʻeku ngāue fakamāmaní. ʻOku ʻikai pehē ia ʻi he ngāue tāimuʻá. ʻOku ou lava ke tokoniʻi ʻa e kakaí he taimí ni pea ke akoʻi kiate kinautolu ʻa e moʻoní. Kuo fakafiemālie mo fakamānako lahi ange eni.”
4. ʻOku anga-fēfē hono faitāpuekina ʻa e kau tāimuʻa tuʻumaʻú ʻi heʻenau ʻoatu ʻa e ngaahi tāpuaki ki he niʻihi kehé?
4 Tāpuaki ki he Niʻihi Kehé: ʻI he ʻahó ni, ʻoku fehangahangai ai ʻa e tokotaha kotoa mo e “ngaahi taimi faingataʻa.” (2 Tim. 3:1) Ko e kakai ʻi he feituʻu kotoa pē ʻoku nau fiemaʻu lahi ha ʻamanaki. Ko e kau fanongonongo ʻo e Puleʻangá ʻoku nau fiefia ʻi he sio tonu ki he lava ʻo liliu e siva ʻa e ʻamanaki ʻoku hā he mata ʻo e kakaí ki he fakatuʻamelie ʻi heʻenau tali ʻa e ongoongo leleí. He lahi ē ko e fiefia ʻa e kau tāimuʻa tuʻumaʻú ʻoku nau līʻoa ʻa e houa laka hake he 800 ʻi he taʻu taki taha ki he ngāue fakahaofi moʻui ko ení!—1 Tim. 4:16.
5, 6. Ko e hā nai te ne ʻai ke ke malava ʻo hoko ko ha tāimuʻa tuʻumaʻú?
5 Kuó ke fai ha fakakaukau fakamātoato ke ngāue ko ha tāimuʻa tuʻumaʻu? ʻE fiemaʻu nai ai ke “fakatau mai ʻa e taimi faingamālié” mei he ngaahi ngāue ʻoku siʻi hono mahuʻingá. (Ef. 5:15, 16, NW) Kuo fai ia ʻe he tokolahi pea kuo nau fakafaingofuaʻi ʻenau moʻuí, ʻo fakaʻatā ke nau fakasiʻisiʻi ʻa e ngāue fakamāmaní koeʻuhi ke līʻoa ʻa e taimi lahi ange ki he ngaahi meʻa ʻo e Puleʻangá. ʻE lava ke ke fokotuʻutuʻu hoʻo ngaahi meʻá ke kau fakataha mo kinautolu?
6 Kole ʻa e potó meia Sihova ke fokotuʻutuʻu ha taimi-tēpile ʻaonga. (Sem. 1:5) Ko e hā ʻa e ngaahi tāpuaki ʻe lava ke ke ʻamanekina ʻe maʻu mei aí? Ko ha koloa fakalaumālie lahi fau! ʻE toe tāpuakiʻi fakamatelie koe ʻe Sihova ʻaki ʻa e meʻa ʻokú ke fiemaʻú. (Mt. 6:33) Ko e faʻahinga ʻoku nau sivi ʻa Sihova ʻi he tafaʻaki ko ení te nau maʻu ‘ʻa e tapuakí, kaeʻoua ke ʻikai hao.’—Mal. 3:10.