Feingangāue Tufa Tuleki Makehe ʻi ʻOkatopa 20–Nōvema 16!

¹ Kamata ʻi he ʻaho Mōnite ʻo ʻOkatopa 20 pea hokohoko atu ai ʻi he uike kakato ʻe fā, te tau kau ai ʻi hano tufaki makehe ʻo ha tuleki foʻou ʻoku fakakaveinga Te Ke Fieʻilo ki he Moʻoní? Ko e ʻamanakí ia ʻe ueʻi ʻe he feingangāue makehe ko eni ʻi māmani lahí ha mahuʻingaʻia lahi ange ʻi he matavai pē taha ʻo e moʻoní.—Sione 17:17.

² ʻOku ʻomi ʻe he tulekí ʻa e ngaahi tali Fakatohitapu mahino ki he ngaahi fehuʻi mahuʻinga ʻe ono: “ʻOku tokanga moʻoni mai ʻa e ʻOtua kiate kitautolu?” “ʻE toe ngata ʻa e taú mo e faingataʻá?” “Ko e hā ʻoku hoko kiate kitautolu ʻi he taimi ʻoku tau mate aí?” “ʻOku toe ʻi ai ha ʻamanaki ki he kau maté?” “ʻE lava fēfē ke tali ʻe he ʻOtuá ʻeku lotú?” pea mo e “ʻE lava fēfē ke u maʻu ʻa e fiefia ʻi he moʻuí?” Ko e ngaahi lotu ʻa e Puleʻanga-Haʻa-Kalisitiané kuo halaʻatā haʻanau teitei ʻomi ha tali fakafiemālie ki he ngaahi fehuʻi ko ení. Naʻa mo e tokolahi ʻoku ʻikai te nau taukaveʻi ko ha Kalisitiane kinautolú kuo nau fifili ʻo kau ki he ngaahi meʻa peheé, ka ʻoku ʻikai nai te nau lāuʻilo ki he ngaahi tali mahino ʻoku maʻu ʻi he Tohi Tapú. Ko ia ai, ʻoku totonu ke toe fakamānako ange ʻa e pōpoaki ko ení.

³ Kāpui Homou Feituʻu Ngāué: Feinga ke kāpui ʻa e lahi taha ʻe ala malava ʻi homou feituʻu ngāue fale ki he falé. Kapau ʻoku lahi homou feituʻu ngāué, ʻe fakalototoʻaʻi nai kimoutolu ʻe he kau mātuʻá ke tuku ha tatau ʻo e tulekí ʻi he ngaahi ʻapi ʻoku ʻikai ʻi ai ha tahá ʻi he ʻuluaki ʻaʻahí pē. Manatuʻi ke ʻoatu ha tatau ki he ngaahi kaungāʻapí, kāingá, ngaahi maheni ʻi he ngāueʻangá pe ʻapiakó, pea mo e niʻihi kehe ʻokú ke talanoa maʻu pē mo kinautolú. Mahalo pē ʻe lava ke ke fokotuʻutuʻu ke tāimuʻa tokoni ʻi ʻOkatopa pe Nōvema. ʻOku ʻi ai haʻo kiʻi tama pe tokotaha ako Tohi Tapu ʻokú ne fai ha fakalakalaka fakalaumālie lelei pea te ne taau nai ke kau mo kitautolu ʻi he feingangāue ko ení ʻi he tuʻunga ko ha tokotaha malanga teʻeki papitaiso? Kapau ko ia, fakahā ki he kau mātuʻá.

⁴ Meʻa ke Leaʻakí: Ke lava ʻo aʻu ki he kakai tokolahi ange mo e pōpoakí, ʻoku lelei tahá ke tauhi ke nounou hoʻo tuʻuakí. ʻEke ange pē ki he ngaahi ʻapí ha taha ʻo e ngaahi fehuʻi ʻe ono ʻi he takafí pea fakahaaʻi ange ʻa e talí ʻi he tulekí. ʻE fakaʻatā ai heni ʻa e kau malangá kotoa ke feʻunuʻaki ʻenau tuʻuakí ki he ngaahi fiemaʻu ʻa e feituʻú. Kapau ʻe fakahaaʻi ʻe ha tokotaha ha mahuʻingaʻia, hikiʻi hifo ia pea toe foki ki ai. ʻI he ngaahi fakaʻosinga uiké, ko e ngaahi makasini lolotongá ʻe tuʻuaki fakataha nai ia mo e tulekí. Ko ʻene ngata pē ʻa e feingangāué ʻi Nōvema 16, te tau tufaki leva ʻa e tohi Akoʻi ʻe he Tohi Tapú. Ka ʻi ai ha tuleki ʻe toe, ʻe ngāueʻaki ia ʻi he founga tatau ʻo hangē pē ko e ngaahi tuleki kehe ʻoku ala maʻú.

⁵ Kamata ha Ako Tohi Tapu: Ko e tuleki ko ení kuo faʻufaʻu tefito ia ke tokoni kia kitautolu ke tau kamata ha ngaahi ako Tohi Tapu. ʻI hono fai ha toe ʻaʻahi ki ha tokotaha naʻá ne fakahaaʻi ʻa e mahuʻingaʻiá, te ke ʻeke nai pe ko e moʻoni Fakatohitapu fē naʻá ne maʻu ai ʻa e fakafiemālie pe fakanongá? Fakahanga ʻa e tokangá ki he peesi fakaʻosi ʻa ia ʻoku lave ai ki heʻetau fokotuʻutuʻu ako Tohi Tapú, pea ʻoange kiate ia ha tatau ʻo e tohi Akoʻi ʻe he Tohi Tapú. ʻO ka malava, lāulea nounou ki ha palakalafi ʻe taha pe ua mei he vahe ʻoku lahi ange ai e fakamatala ki he kaveinga naʻá ne filí.

⁶ ʻOku kumi ʻa Sihova ki he faʻahinga te nau lotu ange kiate ia ʻi he ‘laumālie mo moʻoní.’ (Sione 4:23) Fakatauange te tau kau kotoa ʻi he feingangāue makehe ko eni ke tokoniʻi ʻa e niʻihi kehé ke nau hoko ʻo ʻiloʻi ʻa e moʻoní!