Puha Fehuʻi

◼ Kapau ʻoku loto ha ongo meʻa ke ngāueʻaki ʻa e Fale Fakatahaʻangá ki heʻena malí, ko e hā ʻa e ngaahi meʻa ʻoku fiemaʻu ke na talanoa ki ai mo e kau mātuʻá?

Ko e mali ʻoku fokotuʻutuʻu ʻo fehoanaki mo e ngaahi tefitoʻi moʻoni Fakatohitapú ʻoku ʻoatu ai ʻa e lāngilangí kia Sihova. ʻOku moʻoni ʻeni tautefito ʻi he mali ʻoku fai ʻi he Fale Fakatahaʻangá, koeʻuhi ʻoku vakai ʻa e kakai ʻi he koló ko e polokalama ʻoku fai aí ko e konga ia ʻo e meʻa ʻoku fai ʻe heʻetau kautahá. Koeʻuhi ko e “meʻa kotoa pe ke fai ke tāu mo māu,” ʻoku totonu ke talanoa ʻa e kau mātuʻa fakalotofonuá mo e ongo meʻá ʻi he taimi ʻoku kole ai ke ngāueʻaki ʻa e Fale Fakatahaʻangá ki ha mali.—1 Kol. 14:40.

Ko ha ongo meʻa ʻokú na loto ke ngāueʻaki ʻa e Fale Fakatahaʻangá ki heʻena malí ʻoku totonú ke na ʻoatu ha tohi kole ki he kōmiti ngāue ʻo ha fakatahaʻanga ʻoku fakataha ʻi he holo ko iá. ʻOku totonu ke ʻoatu tokamuʻa ʻena tohí pea ʻoku totonu ke fakahaaʻi ai ʻa e ʻaho mo e taimi ʻokú na loto ai ke ngāueʻaki ʻa e holó. ʻOku totonu ke na manatuʻi ʻe ʻikai ke feʻunuʻaki ʻe he kau mātuʻá ʻa e taimi ʻo e fakatahá kae fakahoko ʻena malí. Tānaki atu ki ai, kuo pau ke ʻi ha tuʻunga lelei ʻa e fefine malí mo e tangata malí, ʻo na moʻui ʻo fehoanaki mo e ngaahi tefitoʻi moʻoni Fakatohitapú pea mo e ngaahi tuʻunga māʻoniʻoni ʻa Sihová.

Ke fakapapauʻi ʻoku fakaongoongoleleiʻi ʻe he malí ʻa hotau ʻOtua lāngilangiʻiá, ʻoku totonu ke talanoa ʻa e ongo meʻá mo e kōmiti ngāué ki he ngaahi fokotuʻutuʻu ʻo e malí ki muʻa ke fakapapauʻi ʻa e ngaahi fokotuʻutuʻú. Neongo ʻe ʻikai feinga ʻa e kau mātuʻá ke ʻoatu ʻenau fakakaukau fakafoʻituituí ki he ongo meʻá, kapau ʻoku palani ha meʻa ʻoku ʻikai sai, ʻoku totonu ke fai ha feʻunuʻaki. Ko e ngaahi fasi pē ʻoku filifili mei he Kingdom Melodies ʻa ia ʻoku maʻu ʻi heʻetau tohi hivá ʻe ngāueʻakí. Ko ha faʻahinga teuteuʻi pē ʻo e Fale Fakatahaʻangá pe feʻunuʻaki holo ʻo e ngaahi seá kuo pau ke maʻu ha ngofua ki ai. Kapau ʻe fai ha faitā pe hiki vitiō, ʻoku totonu ke ʻoua ʻe fakaleluʻi ai heni ʻa e ngeia ʻo e kātoangá. ʻE fakaʻatā nai ʻe he kau mātuʻá ʻa hono fai ʻo ha ʻahiʻahi ʻi he Fale Fakatahaʻangá kehe pē ʻoku ʻikai ke fepaki mo e ngaahi fokotuʻutuʻu kehe fakaefakatahaʻangá. ʻOku ʻikai totonu ke fakapipiki ʻa e ngaahi tohi fakaafé ʻi he papa fakahinohinó. Kae kehe, ʻe fai nai ʻe he kau mātuʻá ha fanongonongo nounou he lolotonga ʻo e Fakataha Ngāué ke fakahā ai ki he fakatahaʻangá ʻa e mali ʻoku ʻamanaki ke fai ʻi he Fale Fakatahaʻangá.

Neongo ʻoku ʻikai ko ha fiemaʻu ia ke papitaiso ʻa e faʻahinga kotoa ʻoku kau ki he malí hangē ko e kau toʻo kofú, ʻe ʻikai feʻungamālie ke fakakau ʻi he kau fononga ʻo e malí ha faʻahinga ko ʻenau tōʻonga moʻuí ʻoku fepaki ʻaupito ia mo e ngaahi tefitoʻi moʻoni Fakatohitapú pe ko honau ʻulungāangá ʻe fehuʻia nai ʻe he faʻahinga ʻoku nau haʻu ki he malí. ʻOku totonu ke fakahoko ʻa e malí ʻe ha mātuʻa kuo ʻosi fakanofo, kapau ʻe faingamālie. Ko e kau mātuʻá ko e kau faiako taau kinautolu ʻo e Folofola ʻa e ʻOtuá, ko ia ʻoku nau taau lahi ange ai ke fakaeʻa ʻa e ngaahi tefitoʻi moʻoni Fakatohitapu ʻe ʻaonga ki he kātoanga mahuʻinga ko ʻení.—1 Tim. 3:2.

Koeʻuhi ko e malí ʻe toe fakahaaʻi atu ai ʻa e tuʻunga ʻo e mātuʻa te ne fakahoko ʻa e malí, ʻoku totonu foki ke ne ʻilo ki muʻa ʻa e ngaahi fokotuʻutuʻu ki he malí. Te ne fakataha mo e ongo meʻá ke vakaiʻi ʻa hona tuʻunga fakaeʻulungāanga he lolotonga ʻa e faisoó; pea ʻe fiemaʻu ʻa e ongo meʻa malí ke na talanoa tauʻatāina mo faitotonu kiate ia. Kapau ko e fefiné pe ko e tangatá naʻe mali ki muʻa, kuo pau ke fakamoʻoniʻi ʻe he tokotaha ko iá ʻokú ne ʻatā Fakatohitapu mo fakalao ke toe mali. (Mt. 19:9) ʻE kau heni ʻa hono fakahā ki he mātuʻá ha tatau ʻo e tohi veté.

ʻI he fetuʻutaki tauʻatāina mo fengāueʻaki kakato ʻa e ongo meʻá mo e kau mātuʻá, ʻe hoko moʻoni ai ʻa e malí ko ha kātoanga fiefia ki he tokotaha kotoa.—Pal. 15:22; Hep. 13:17.