Ko ha ʻAho Makehe ki Hono Tuʻuaki ʻo e Ako Tohi Tapú
1 Kamata ʻi Sanuali, ʻe vaheʻi ai ʻe he fakatahaʻangá ʻa e fakaʻosinga uike ʻe taha ʻi he māhina kotoa pē, ko e ʻuluaki fakaʻosinga uiké nai, ke tokangataha ai ki hono tuʻuaki ʻo e ako Tohi Tapú. ʻE fai eni ʻi ha ʻaho Tokonaki pe Sāpate, ʻo fakatatau ki he meʻa ʻe lelei taha ki he feituʻú. ʻI he ʻaho ko iá kapau ʻe ʻikai tali ʻe he faʻahinga ʻi he ʻapí ʻa e tuʻuakí, ʻe kei tuʻuaki pē nai ʻe he kau malangá ʻa e tohi Akoʻi ʻe he Tohi Tapú pe tuku ʻa e ngaahi makasini fakamuimui tahá. ʻOku totonu ke fokotuʻutuʻu ʻa e kau mātuʻa mo e kau sevāniti fakafaifekau kotoa pē ke nau kau kakato ʻi he ngāue ko ení pea tokoniʻi ʻa e kau malangá ke kamata ha ngaahi ako Tohi Tapu.
2 Ko e Kōmiti Ngāue ʻa e Fakatahaʻangá te nau fakapapauʻi ʻa e fakaʻosinga uike ʻe vaheʻi ai ha ʻaho ki hono tuʻuaki ʻo e ngaahi ako Tohi Tapú. ʻOku totonu ke fai ʻa e ngaahi fakamanatu ʻi he taimi ki he taimi, koeʻuhi ke lava ai ʻo teuteu ʻa e kau malangá, pea fai ha feinga makehe ke tuʻuaki ʻa e ngaahi ako Tohi Tapú mei he fale ki he fale, pea ʻi he taimi ʻoku nau ʻaʻahi ai ki he faʻahinga naʻa nau fakahāhā ha mahuʻingaʻia ki muʻá.
3 Founga ke Teuteu Aí: ʻE lava ke tau maʻu ʻa e ngaahi fokotuʻu ki hono kamata ʻo e ngaahi ako Tohi Tapú ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Sanuali 2006 pea ʻi he peesi 2 ʻo e kiʻi tohi Founga ke Kamata mo Hoko Atu ʻa e Fetalanoaʻaki Fakatohitapú. ʻE fili nai ʻa e niʻihi ke ngāueʻaki ha tuleki, hangē ko e Te Ke Fieʻilo ki he Moʻoní? Pehē foki, ko e peesi 3 ʻo ʻEtau Ngāue Fakafaifekau ʻo e Puleʻanga ʻo ʻAokosi 2007 ʻoku ʻomai ai ʻa e ngaahi fokotuʻu ki hono kamata ha ngaahi ako Tohi Tapu ʻi he ʻaʻahi ki he faʻahinga ko ia naʻa nau tali ʻa e makasiní. ʻE fakataimitēpileʻi ke fai ʻe he kau mātuʻá mo e kau sevāniti fakafaifekaú ha fakataha nounou miniti ʻe 10 ki he 15 ki he ngāue fakamalangá, ʻa ia ʻe lāulea ai pe fakahāhā ha fokotuʻu ʻaonga ʻe taha pe ua ki hono kamata ʻo e ngaahi ako Tohi Tapú.
4 Ko e moʻoni, heʻikai ke tali ʻe he tokotaha kotoa ha ako Tohi Tapu pe hokohoko atu ʻenau akó ʻi ha vahaʻa taimi lōloa. ʻOku ʻikai totonu ke taʻofi kitautolu ʻe he meʻá ni, koeʻuhi ko Sihova ia ʻokú ne tohoakiʻi mai ʻa e faʻahinga hangē ha sipí ki heʻene kautahá. (Sione 6:44) Ko hotau fatongiá ʻoku ʻikai ko e tūtuuʻi pē ʻa e tenga ʻo e moʻoní ka ke tauhi foki mo fuʻifuʻi ʻa e meʻa kuo kamata ke tupú, pea ʻoku kau ai ʻa hono ako ʻa e Tohi Tapú mo e faʻahinga loto-totonú. ʻI hono fai iá, ʻoku tau maʻu ai ʻa e monū ʻo e hoko ko e kaungāngāue mo e ʻOtuá.—1 Kol. 3:9.