ʻI he tuʻunga-pule ʻa e ʻOtuá, naʻe fāʻūtaha mo melino ʻa e meʻa fakatupu kotoa
Ko e Hā ʻOku Tau Fiemaʻu Ai ʻa e Puleʻanga ʻo e ʻOtuá?
ʻI he kamataʻanga ʻo e hisitōlia ʻo e faʻahinga ʻo e tangatá, ko hotau Tokotaha-Fakatupú, ʻa Sihova, ko ia toko taha pē naʻe Pulé. Naʻá ne pule ʻi ha founga anga-ʻofa. Naʻá ne ngaohi ha ʻapi fakaʻofoʻofa—ko ha ngoue ʻi ʻĪteni—ke nofo ai ʻa e faʻahinga ʻo e tangatá. Naʻá ne tokonaki foki mo ha meʻakai hulu fau maʻanautolu. Naʻá ne toe ʻoange foki mo ha ngāue mohu ʻuhinga ke nau fai. (Sēnesi 1:28, 29; 2:8, 15) Naʻe mei maʻu ʻe he faʻahinga ʻo e tangatá ʻa e nonga kapau naʻa nau fakamoʻulaloa ki he tuʻunga-pule anga-ʻofa ʻa e ʻOtuá.
Naʻe talitekeʻi ʻe he ʻuluaki ongo mātuʻá ʻa e ʻOtuá ko hona Pule
ʻOku fakahaaʻi mai ʻi he Tohi Tapú ko ha ʻāngelo angatuʻu, naʻe ui ki mui ko Sētane ko e Tēvoló, naʻá ne poleʻi e totonu ʻa e ʻOtuá ke pulé. Naʻá ne pehē ko e faʻahinga ʻo e tangatá te nau fiefia ange ʻi he ʻikai muimui ki he tataki mo e tuʻunga-pule ʻa e ʻOtuá. Ko e meʻa fakamamahí, ko ʻetau ʻuluaki ongo mātuʻá, ʻa ʻĀtama mo ʻIvi, naʻá na muimui ʻi he ʻalunga ʻo Sētané pea angatuʻu ki he ʻOtuá.—Sēnesi 3:1-6; Fakahā 12:9.
Koeʻuhi naʻe talitekeʻi ʻe ʻĀtama mo ʻIvi ʻa e ʻOtuá ko hona Pulé, naʻe mole ai meiate kinaua hona ʻapi Palataisí mo e ʻamanaki ke moʻui haohaoa ʻo taʻengatá. (Sēnesi 3:17-19) Ko ʻena filí naʻe uesia foki ai ʻena fānaú. ʻOku pehē ʻe he Tohi Tapú koeʻuhi ko e angahala ʻa ʻĀtamá, naʻe “hoko mai ʻa e angahalá ki he māmaní pea mo e maté fakafou ʻi he angahalá.” (Loma 5:12) Naʻe toe taki atu ʻa e angahalá ki ha nunuʻa fakamamahi: “Lolotonga ʻa e taimi kuo pule ai ha tangata ki ha tangata ko e kovi pē ʻokú ne ʻomi kiate iá.” (Tangata Malanga 8:9) ʻI hono fakalea ʻe tahá, ʻi he pule ʻa e faʻahinga ʻo e tangatá kiate kinautolu pē, te nau fonu palopalemaʻia.
FOUNGA-PULE ʻA E TANGATÁ
Naʻe angatuʻu ʻa Nimilote kia Sihova
Ko e fuofua pule fakaetangata ʻi he Tohi Tapú ko Nimilote. Pea naʻá ne anga-tuʻu ki he tuʻunga-pule ʻa Sihová. Talu mei he ʻaho ʻo Nimiloté, kuo ngāuehalaʻaki ʻe he kau takí honau mafaí. ʻI he taʻu nai ʻe 3,000 kuo maliu atú, naʻe tohi ʻe Tuʻi Solomone: “Naʻá ku sio ki he tangi ʻa e faʻahinga kuo ngaohikoviá, pea naʻe ʻikai ha taha ke ne fakafiemālieʻi kinautolu. Pea ko e faʻahinga naʻa nau ngaohikovia kinautolú naʻa nau maʻu ʻa e mafaí.”—Tangata Malanga 4:1.
ʻOku ʻikai ke toe kehekehe ia mo e ʻahó ni. ʻI he 2009, ʻoku pehē ʻe ha tohi ʻa e Ngaahi Puleʻanga Fakatahatahá ko e ngaahi founga-pule koví kuo fakautuutu hono ʻiloʻi “ko e taha ia ʻo e ngaahi aka tefito ʻokú ne fakatupunga ʻa e kovi kotoa ʻoku hoko ʻi hotau sōsaietí.”
TAIMI KI HA LILIU!
ʻOku fiemaʻu ki he māmaní ha kau taki lelei ange mo ha founga-pule lelei ange. Pea ko e meʻa ia kuo talaʻofa mai ʻe hotau Tokotaha-Fakatupú!
Naʻa mo e founga-pule lelei taha ʻa e tangatá kuo ʻikai ke nau lava ʻo fakaleleiʻi ʻa e palopalema mafatukitukí
Kuo fokotuʻu ʻe he ʻOtuá ha Puleʻanga pe ko ha founga-pule, ʻa ia te ne fetongi ʻa e kotoa ʻo e founga-pule fakaetangatá, pea “ʻe tuʻu toko taha pē ia ʻo taʻengata.” (Taniela 2:44) Ko e Puleʻanga eni ʻa ia kuo lotu ʻa e laui miliona fekauʻaki mo iá. (Mātiu 6:9, 10) Ka ʻoku ʻikai ko e ʻOtuá te ne pule ʻi he Puleʻanga ko ení. ʻI hono kehé, kuó ne fakanofo ha tokotaha naʻá ne moʻui ko ha tangata ki muʻa ke Pule. Ko hai kuo fili ʻe he ʻOtuá?