Faiako Faingofua
1. Ko e hā ʻa e tafaʻaki mahuʻinga ʻe taha ʻo e faiako mahino mo ola leleí?
1 Ko e faingofuá ʻoku mahuʻinga ia ki he faiako ola leleí. Ko e fakakaukau atu ki he founga faiako ʻa e Faiako Lahi ko Sīsuú, ʻe lava ai ke tokoniʻi kitautolu ke fakalakalaka ʻa ʻetau “pōtoʻi fakaefaiakó.”—2 Tim. 4:2, NW; Sione 13:13.
2. Ko e hā ʻoku kau ʻi he faiako faingofuá, pea ko e hā e ngaahi ola lelei ʻe maʻu ʻi he founga faiako ko iá?
2 Lea Faingofua: Ko e Malanga ʻi he Moʻungá ʻoku kau ai ʻa e ngaahi moʻoni loloto taha kuo leaʻaki ʻe he tangatá, ʻo fakamatalaʻi kotoa ia ʻi he tuʻunga faingofua. (Mt., vahe 5-7) Ko e fuʻu kakai naʻe fanongo kia Sīsuú ne nau ‘fakatumutumu ʻi heʻene founga faiakó.’ Ko e kau ʻōfisa ne fekauʻi ke nau puke iá naʻe ueʻi kinautolu ke nau pehē: “Teʻeki ha tangata ʻe lea hange ko ia.” (Mt. 7:28, 29, NW; Sione 7:46) ʻOku ʻikai fiemaʻu ke tau ngāueʻaki ha ngaahi foʻi lea fakapoto, ngaahi kupuʻi lea fihi, pe ngaahi fakatātā fakaikiiki ke fakatuipauʻi fakaʻāuliliki ʻaki ʻa e moʻoní ki he niʻihi kehé. Ko e moʻoní ʻe lava ke fakamatalaʻi mahino ia ʻo ngāueʻaki ha ngaahi lea anga-maheni.
3. Ko e hā ʻoku hehema nai ai ha faʻahinga ke fai ha fuʻu fakamatala lahi ki heʻenau kau fanongó, pea ʻe lava fēfē ke fakaʻehiʻehi mei he meʻá ni?
3 Fakapapauʻi ʻa e Lahí: Naʻe fakakaukau ʻa Sīsū ki heʻene kau fanongó ʻi hono fakapapauʻi ʻa e lahi ʻo e fakamatala ke fakahoko kiate kinautolu ʻi he taimi ʻe taha. (Sione 16:12) Kuo pau ke tau fakatokanga meʻa mo ngaofengofua ʻi he fekauʻaki mo e meʻá ni, tautefito ʻi he faifakamoʻoni ki he kāingá, faʻahinga mahuʻingaʻia foʻoú, pe ko e fānaú. ʻOku totonu ke tau tokanga ke ʻoua ʻe fai ha fuʻu fakamatala lahi neongo ʻa e hā ngali nai ʻoku nau fanongo tokangá. Ko e faʻahinga ʻoku loto-totonú te nau hokohoko atu hono maʻu ʻa e ʻiloʻi ʻo e ʻOtua moʻoní, ʻa Sihova.—Sione 17:3; 1 Kol. 3:6.
4. Ko e hā e ʻuhinga ʻoku ʻaonga ai ke tokangataha ki he ngaahi poini tefitó kae ʻikai ko e fakaikiikí?
4 Tokangataha ki he Poini Tefitó: Naʻe ʻikai ʻai ʻe Sīsū ke fihi ʻa ʻene faiakó ʻi hano fakakau ki ai ha fakaikiiki lahi. ʻI he taimi naʻá ne pehē ai: “Ko e kakai kotoa pe ʻoku ʻi he ngaahi faʻitoka, . . . te nau ʻalu atu mei ai,” naʻe ʻikai ko e taimi ia ke ne fai ai ha fakamatala lahi ki he ikuʻanga ʻe ua ʻo e faʻahinga ʻe toetuʻú. (Sione 5:28, 29) ʻI he fai ʻo e ngaahi ako Tohi Tapú, ʻoku totonu ke tau tokangataha ki he ngaahi poini tefitó pea taʻofi ha hehema ke fai ha fakamatala kehe ʻoku ʻikai mei he tohi akó.
5. Ko e hā ʻa e tāpuaki ʻe lava ke tau maʻu kapau ʻe faingofua ʻetau faiakó?
5 He houngaʻia ē ko kitautolu ʻi hono akoʻi faingofua mai ʻe Sihova ʻa e meʻa kotoa ʻoku fiemaʻu ke tau ʻiló! (Mt. 11:25) ʻOfa ke tau ngāueʻaki ʻa e faiako faingofuá pea hokosia ai ʻa e fiefia ʻi hono maʻu ʻa e ola lelei ʻi he ngāue fakafaifekaú.