Ngaahi Fokotuʻu ʻe Tolu ki Hono Fakaleleiʻi Hoʻo Faiakó
1. Ko e hā ʻoku totonu ai ke tau kumi ke fakaleleiʻi ʻetau faiakó?
1 Ko e kau faifekau Kalisitiane kotoa pē ko e kau faiako. Pe ʻoku tau fai ʻa e ʻuluaki ʻaʻahí, toe foki ke fakalahi ʻa e mahuʻingaʻiá, pe fai ʻa e ako Tohi Tapú, ʻoku tau ʻoatu ʻa e fakamatala. Pea ko e fakamatala ʻoku tau akoʻí ʻoku ʻikai ko e meʻa maheni. ʻOku tau fakamaama atu ʻa e “ngaahi potutohi māʻoniʻoní,” ʻa ia ʻe lava ke ne ʻai ʻa e kakaí ke nau “poto ke maʻu ai ʻa e fakamoʻui.” (2 Tīm. 3:15) Ko ha monū fakaofo ē! Ko e ngaahi fokotuʻu eni ʻe tolu ki hono fakaleleiʻi ʻetau faiakó.
2. ʻE lava fēfē ke tau faiako ʻi he tuʻunga faingofua?
2 Tuʻunga Faingofua: ʻI he taimi ʻoku tau ʻiloʻi lelei ai ha kaveinga, ʻe lavangofua ke ngalo ʻa e hā ngali fihi nai ʻa e fakamatalá ki he tokotaha ʻoku ʻikai te ne ʻiloʻí. Ko ia, ʻi hono fai ha ako Tohi Tapu, ʻoua ʻe felei hoʻo faiakó ʻaki ha ngaahi fakaikiiki lahi ʻoku ʻikai fiemaʻu. Kae fakaeʻa ʻa e ngaahi poini tefitó. Ko e lahi ʻo e leá ʻoku ʻikai loko ʻuhinga ai ia ʻoku lelei ange hoʻo faiakó. (Pal. 10:19) ʻOku faʻa lelei taha pē ke lau ʻa e ngaahi konga Tohi Tapu tefitó. Hili hono lau ha konga Tohi Tapu, tokangataha ki he tafaʻaki ʻoku fai ki ai ʻa e lāuleá. Ko e Malanga ʻi he Moʻungá, ʻa ē ʻoku hiki ʻi he Mātiu vahe 5 ki he 7, ʻoku ʻi ai ʻa e ngaahi moʻoni mātuʻaki loloto, ka neongo ia naʻe faiako ʻa Sīsū ʻi he tuʻunga faingofua mo ʻikai ha ngaahi loko lea.
3. Ko e hā e ʻaonga ʻo e ngaahi talanoa fakatātaá, pea ko e hā ʻa e faʻahinga talanoa fakatātā ʻoku faʻa lelei tahá?
3 Ngaahi Talanoa Fakatātā: ʻOku langaʻi ʻe he ngaahi talanoa fakatātaá ʻa e fakakaukaú, ueʻi ʻa e ngaahi ongó, pea tokoni ki he manatú. ʻOua te ke ongoʻi kuo pau ke ke hoko ko ha tokotaha fananga kae toki lava ke ke ʻoatu ha ngaahi talanoa fakatātā lelei. Naʻe faʻa ngāueʻaki ʻe Sīsū ʻa e ngaahi talanoa fakatātā nounou mo ʻikai fihi. (Māt. 7:3-5; 18:2-4) Ko e ngaahi fakatātā faingofua ʻoku tā ʻi ha kiʻi laʻi pepa ʻe lava ke toe ʻaonga ʻaupito. ʻI ha kiʻi tomuʻa fakakaukau, ʻe lava ke ke maʻu ai ha ngaahi talanoa fakatātā ola lelei.
4. ʻE lava fēfē ke tau ngāueʻaki ola lelei ʻa e ngaahi fehuʻí?
4 Ngaahi Fehuʻi: ʻOku fiemaʻu ʻa e ngaahi fehuʻí ki hoʻo tokotaha akó ke ne fakakaukau ai. Ko ia ai, anga-kātaki ʻi he hili haʻo ʻeke ha fehuʻi. Kapau te ke ʻoatu vave pē ʻe koe ha tali, ʻe ʻikai ai te ke ʻiloʻi moʻoni ʻa e meʻa ʻoku mahinoʻi ʻe hoʻo tokotaha akó. Kapau ʻoku hala ʻene ngaahi talí, ʻe lelei ange nai ke tataki ia ki he fakamulituku totonú ʻaki ha toe ngaahi fehuʻi kae ʻikai ko hano fakatonutonuʻi pē ia. (Māt. 17:24-27) Ko e moʻoni, ʻoku ʻikai ha taha ʻo kitautolu ko ha kau faiako haohaoa. Ko ia ai, ʻoku fakalototoʻaʻi kitautolu ʻe he Tohi Tapú ke tokanga maʻu ai pē ki heʻetau faiako ʻoku faí. Ko ʻetau fai peheé ʻe ʻomai ai ʻa e ngaahi ʻaonga taʻengata kia kitautolu mo e faʻahinga ko ia ʻoku nau fanongo mai kiate kitautolú.—1 Tīm. 4:16.