Teuteu Lelei ki he Faiakó
1. Ko e hā ʻoku totonu ke tau tokanga taha ai ke fakatupulekina ʻi he tokotaha akó ʻa e houngaʻia ʻi hono fai ha ako Tohi Tapu?
1 ʻI heʻetau fai ha ako Tohi Tapu, kuo pau ke tau teuteu lelei kapau ʻoku tau loto ke ueʻi ʻa e tokotaha akó ke tauhi kia Sihova. Kuo pau ke tau ʻai ke ola lelei ʻetau faiakó ʻaki hono fakatupulekina ʻi he tokotaha akó ʻa e houngaʻia ki he moʻoni ʻi he Tohi Tapú. ʻE ueʻi ai ʻa e tokotaha akó ke ne fai ha meʻa. (Teu. 6:5; Pal. 4:23; 1 Kol. 9:26) ʻE anga-fēfē nai ʻetau fai ʻa e meʻá ni?
2. ʻOku tokoni fēfē ʻa e lotú ʻi hono fai ha teuteu lelei ki ha ako?
2 Teuteu mo Lotu: Koeʻuhi ko Sihova ia ʻokú ne ʻai ke tupu ʻa e tenga ʻo e moʻoní ʻi he loto ʻo e tokotaha akó, ʻoku feʻungamālie ke kamata ʻa e teuteu ki he akó ʻaki ʻa e lotu fakahangatonu pē maʻá e tokotaha akó mo ʻene fiemaʻu paú. (1 Kol. 3:6; Sem. 1:5) ʻE fakapapauʻi nai ʻe he lotu peheé ʻa e toe tokoni ʻe lava ke tau fai ke aʻu ai ki hono lotó ʻa e “ʻilo” totonu ʻo e finangalo ʻo Sihová.—Kol. 1:9, 10.
3. ʻE anga-fēfē haʻatau teuteu mo fakakaukau ki he tokotaha akó?
3 Fakakaukau ki he Tokotaha Akó: Naʻe ʻiloʻi ʻe Sīsū ko e faiako ola leleí ʻoku kau ki ai ʻa e fakakaukau ki he kau fanongó. Lahi hake ʻi he tuʻo uá, naʻe ʻeke ai kia Sīsū ʻa e fehuʻi tatau: “Ko e ha ha meʻa te u fai kae tō moʻoku ʻa e moʻui taʻengata?” ʻI heʻene tali taki taha, naʻá ne ngāueʻaki ha fakalea kehekehe. (Luke 10:25-28; 18:18-20) ʻOku totonu ke tau fakakaukau ki he tokotaha akó ʻi he taimi ʻoku tau teuteu aí. Ko e konga Tohi Tapu fē te tau lau fakataha mo iá? Ko e hā ʻa e lahi ʻo e fakamatala te tau feinga ke ʻosikí? Ko e hā ʻa e poini ʻi he akó ʻe faingataʻa nai ki he tokotaha akó ke ne mahinoʻi pe tali? Kapau te tau ʻamanekina ʻa e fehuʻi nai te ne ʻeké, te tau mateuteu ai ke fai ha tali lelei ange.
4. Ko e hā ʻoku kau ki he teuteu leleí?
4 Fakamanatu ʻa e Fakamatalá: Tatau ai pē pe naʻe tuʻo fiha ʻetau ako ʻa e fakamatalá ʻi he kuohilí, ko e fuofua taimi eni ke tau ako ai ia mo e tokotaha akó. Kapau ʻoku tau fie aʻu ki hono lotó, ʻoku mātuʻaki mahuʻinga ke teuteu lelei ki he ako taki taha. ʻOku ʻuhinga eni ko hono fai ʻa e meʻa ʻoku tau fakalototoʻaʻi ʻa e tokotaha akó ke ne faí. Fakamanatu ʻa e fakamatalá, kau ai ʻa e ngaahi konga Tohi Tapú, mo fakakaukau ki he tokotaha akó, pea laineʻi nai ʻa e ngaahi poini tefitó.—Loma 2:21, 22.
5. ʻE lava fēfē ke tau faʻifaʻitaki kia Sihova?
5 ʻOku mahuʻingaʻia moʻoni ʻa Sihova ʻi he fakalakalaka ʻa e tokotaha ako Tohi Tapu kotoa. (2 Pita 3:9) ʻI hono vaheʻi ʻa e taimi ke teuteu ai ki he ako Tohi Tapu kotoa pē, ʻoku tau fakahāhā ai ʻa e tokanga anga-ʻofa tatau.