ʻE Lava Ke Ke Fakalahi Hoʻo Ngāué?
1. Ko e hā ʻoku fiemaʻu fakavavevave ki he ngāue fakafaifekaú pea ko e hā hono ʻuhingá?
1 ʻI heʻene sio ki he fuʻu tokolahi ko ia naʻa nau fakahaaʻi ʻa e mahuʻingaʻia ʻi he ongoongo lelei ʻo e Puleʻangá, naʻe fakahinohino ai ʻe Sīsū ki heʻene kau ākongá ke nau “kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” (Mt. 9:37, 38) Koeʻuhi ʻoku tau ʻi he taimi ʻoku mei ʻosi ai ʻa e faʻahitaʻu utu-taʻú, ʻoku toe fuʻu fakavavevave ange ai ʻa ʻetau ngāué ʻi ha toe taimi ki muʻa. ʻOku ʻuhinga ení ʻoku totonu ke tau fakakaukau ʻi he lotu ki he founga ʻe lava ke tau toe kau kakato ange ai ʻi he ngāue fakafaifekaú.—Sione 14:13, 14.
2. Kuo anga-fēfē tali ʻa e niʻihi ki he uki ʻo e kau ngāue tokolahi ange ki he ngāue fakamalangá?
2 Fakalahi ʻo e Ngāué: ʻI he tataki mo e tokoni ʻa Sihová kuo ʻilo ai ʻe he tokolahi ʻoku malava ke nau kamata tāimuʻa. (Sāme 26:2, 3; Fili. 4:6) Kuo fai ʻe he niʻihi ʻa e feinga makehe ke ngāue ko ha tāimuʻa tokoni tuʻo taha pe ʻi he ngaahi māhina lahi ange lolotonga ʻa e taʻú. Kuo fakamoʻoniʻi ko ha founga lelei ʻeni ke fakalahi ai ʻenau ngāue fakafaifekaú. Ko e fiefia ʻoku maʻu ʻi he kau ki he monū ko ení kuo fakatupunga ai ʻa e tokolahi ke nau fakakaukau ke hoko ko e kau tāimuʻa tuʻumaʻu.—Ng. 20:35.
3. Kapau naʻá ke tāimuʻa ki muʻa, ko e hā nai ʻokú ke fakakaukau ki ai he taimi ní?
3 ʻE Lava Ke Ke Toe Foki ki he Ngāue Tāimuʻá?: Kapau naʻá ke ngāue tāimuʻa ki muʻa, ʻoku ʻikai ha toe veiveiua ʻa hoʻo manatu ʻofa ki he taimi ko iá. Kuó ke fakakaukau ʻi he lotu ke ke malava ʻo toe foki ki he ngāue tāimuʻá? Ko e ngaahi tuʻunga ko ia naʻe fakatupunga ke taʻofi ai ʻa hoʻo tāimuʻá ʻe ʻikai toe lava ke hoko ia. ʻE hoko mai nai ʻa e taimi kia koe ke ke toe maʻu ʻa e monū makehe ko iá.—1 Sione 5:14, 15.
4. Ko e hā ʻa e faingamālie makehe ʻoku ʻatā kiate kitautolu kotoa?
4 ʻOku lele lelei ʻa e ngāue utu-taʻú pea ʻoku vavé ni ke ʻosi. (Sione 4:35, 36) ʻOfa ke tau sivisiviʻi kotoa hotau tuʻunga lolotongá ke tau fakapapauʻi ai pe ʻe lava ke tau feʻunuʻaki ʻetau ngaahi ngāue fakaʻahó kae fakalahi ai ʻetau ngāue fakamalangá. Pe kapau ʻoku tau ʻiloʻi moʻoni heʻikai lava ke tau fakalahi ai ʻetau ngāué, ʻe lava ke tau vakai ki ha faʻahinga founga te tau hoko ai ʻo ola lelei ange? (Mk. 12:41-44) Ko ha monū moʻoni ia ʻoku tuku mai he taimí ni ki he faʻahinga kotoa ʻa ia ko honau ngaahi tuʻunga lolotongá ʻoku fakaʻatā ai ke ngāueʻaki kinautolu ʻe Sihova ʻi he ngāue makehe ko ení!—Sāme 110:3.