Lava ke Ola Lelei ʻa e Faifakamoʻoni Telefoní

1. Ko e hā nai ʻe vakai ai ki he faifakamoʻoni telefoní ko ha tafaʻaki mahuʻinga ia ʻo ʻetau ngāue fakafaifekaú?

¹ Ko e hā nai ʻoku tau fakakaukau ai ke ngāueʻaki ʻa e faifakamoʻoni telefoní ʻi heʻetau ngāue fakafaifekaú? Koeʻuhi ko e toe founga ia ʻe taha ʻo hono tokoniʻi ʻa e niʻihi kehé ke nau maʻu ʻa e ʻilo totonu ke maʻu ai ʻa e fakamoʻuí. (2 Pita 3:9) Neongo ko ʻetau founga tefito ʻo hono talaki ʻa e ongoongo lelei ʻo e Puleʻanga ʻo e ʻOtuá ko e malanga fale-ki-he-falé, ʻoku tau loto-lelei ke ngāueʻaongaʻaki ʻa e ngaahi founga kehe ke aʻu ai ki he faʻahinga heʻikai nai ke nau ʻi ʻapí.—Mt. 24:14; Luke 10:1-7; Fkh. 14:6.

2. ʻOku anga-fēfē hono fokotuʻutuʻu maau ʻa e faifakamoʻoni telefoní?

² Founga ʻo Hono Fokotuʻutuʻu Māú: Hangē ko ia ʻi he fokotuʻutuʻu ngāue ki he malanga fale-ki-he-falé, ʻoku toe ʻomai ki he kau malangá ʻa e feituʻu ki he faifakamoʻoni telefoní. ʻE lava nai ke fai toko taha pe mo ha toko ua pe toko tolu. Ko e feituʻu ʻoku ngāueʻakí ʻoku totonu ke feʻungamālie ia mo e meʻa ʻoku teu ke faí. ʻOku ʻiloʻi ʻe he tokolahi ʻoku lelei ʻaupito ke tangutu ʻi ha tēpile pea tuku ʻi muʻa ai ʻa e ngaahi meʻa ʻoku nau ngāueʻaki anga-maheni ʻi heʻenau malanga fale ki he falé.

3. Ko e hā ʻoku totonu ke tau manatuʻi ʻi he faifakamoʻoni telefoní?

³ Founga ʻo e Faifakamoʻoni Telefoní: ʻI he faifakamoʻoni telefoní, ko ʻetau malangá ʻoku totonu ke anga-fakafetalanoaʻaki. Ko e niʻihi ʻoku nau toki kamatá ʻoku nau lau nai ha kiʻi malanga ki he tokotaha-ʻapí ka ʻi ha founga anga-fakafetalanoaʻaki. Ko e ngaahi lea kamata ʻoku maʻu ʻi he Ko ʻEtau Ngāue Fakafaifekau mo e tuleki Te Ke Fieʻilo ki he Moʻoní? ʻe lava ke ʻaonga lahi ia ʻi he meʻá ni. ʻI hono fai ha malanga pē ʻaʻaú, fakapapauʻi ha kaveinga, faʻu ha fehuʻi, pea mateuteu ke vahevahe ha ngaahi konga Tohi Tapu ʻa ia ʻoku maʻu ai ʻa e talí. ʻI he tuʻunga lahi te ke tuʻuaki ʻa e ʻū tohi tatau ʻa ia ʻoku tuʻuaki ʻi he fale ki he falé. Fakakaukau ki he ngaahi fakamanatu hono hokó: ʻAi ke ke fiemālie pea lea māmālie. Anga-fakaʻapaʻapa, kātaki, pea anga-fakakaumeʻa, he ʻoku lava ke ongoʻi ia ʻi he telefoní. Fanongo ʻi hono ʻomai ʻe he tokotaha-ʻapí ʻa ʻene fakakaukaú, pea fakamālō mo fakahaaʻi ʻa e houngaʻia ʻi heʻene fakamatalá. Tokanga ke ʻoua ʻe lave ki he fokotuʻutuʻu ʻo e tokoni fakapaʻangá, he ʻe lava ke fakaʻuhingahalaʻi eni ko ha founga ʻo e kole paʻanga ʻi he telefoní.

4. Ko e hā nai ʻe ʻai ʻe he faifakamoʻoni telefoní ke tau malava ʻo fai ʻi he feituʻu ngāue kuo vaheʻi maí?

⁴ Ko e tokotaha ʻokú ke talanoa ki ai ʻi he telefoní ʻoku faingataʻaʻia fakaesino nai pe ko ha tokotaha ʻa ia ko ʻene taimi-tēpile ngāué ʻoku faingataʻa ai ke aʻu ki ai ʻi he ngāue fale-ki-he-falé. ʻOku ʻi ai ʻa e niʻihi kehe ʻoku nau nofo ʻi he ngaahi nofoʻanga ʻoku leʻohi pe ʻi he ngaahi ʻapaatimeni ʻoku fakataputapui ʻa e hū ki aí. Ko ia ai, ʻi ha feinga ke fakahoko kakato mo fakaʻāuliliki ange ʻetau ngāue fakafaifekaú, fakakaukau ki hono ngāueʻaki ʻa e founga ola lelei ʻo e faifakamoʻoni telefoní.