Malanga Fakavavevave!
1. Ko e hā ʻa e ekinaki ʻa Paula ʻoku fiemaʻu ke tokanga ki ai ʻi hotau ʻahó ni?
1 “Ke ke malangaʻaki [fakavavevave] ʻa e folofola.” (2 Tim. 4:2) Ko e hā ʻoku mātuʻaki mahuʻinga ai ʻi hotau ʻahó ni ʻa e ekinaki ʻa Paulá? ʻE lava fēfē ke maongo ʻa e leá ni ki heʻetau moʻuí mo e niʻihi kehé?
2. Ko e hā ʻoku tau kumi tōtōivi ai ki he faʻahinga kuo teʻeki ai ke nau fanongo ʻi he ongoongo leleí?
2 Kau ki Ai ʻa e Moʻui: Kuo teʻeki ai ke fanongo ʻa e kakai ʻe laui miliona takatakai ʻi he māmaní ki he ongoongo lelei ʻa ia ʻe lava ke iku ki honau fakamoʻuí. (Loma 10:13-15; 1 Tim. 4:16) ʻOku maʻu ʻa e faʻahinga loto-totonu tokolahi ʻi he feituʻu kuo toutou ngāueʻí. Kapau te tau ʻaʻahi ʻi he ʻaho kehe pe ʻi ha toe taimi kehe ʻo e ʻahó, te tau maʻu nai ai ha tokotaha kehe. Ko e kumi tōtōivi peheé te tau maʻu ai ha konisēnisi maʻa pea ʻatā ai mei he halaia ʻi he totó.—Ng. 20:26.
3. ʻE lava fēfē ke tau ngāuefakapotopotoʻaki hotau taimí ʻi he ngāue fakafaifekaú?
3 Neongo e fehangahangai mo e fakafepaki fakamālohí, ko e kau Kalisitiane he ʻuluaki senitulí naʻa nau ‘fakafonu ʻa Selusalema ʻaki ʻenau akonakí.’ (Ng. 5:28) ʻOku tau fakapapauʻi tatau ke “fakamooni” fakaʻāuliliki? (Ng. 10:42, PM) ʻI he ngāue fakafaifekaú, ʻoku tau ngāuefakapotopotoʻaki hotau taimí? Kapau ʻoku tau tatali ʻi hono fai ʻe he niʻihi kehé ha toe ʻaʻahi, ʻoku tau tamuʻomuʻa ke lea ki he faʻahinga ʻoku feʻaluʻakí?
4. ʻOku anga-fēfē hono tokoniʻi kitautolu ʻe he malanga fakavavevavé ke tau hanganaki leʻó?
4 Fakalahi ʻEtau Tokangá: ʻI he ofi mai ʻa e ngataʻanga ʻo e fokotuʻutuʻu ko ení, kuo pau ke tau nofoʻaki tokanga, ʻo hanganaki leʻo. (1 Tes. 5:1-6) ʻI he taimi ʻoku tau toutou lea ai fekauʻaki mo ʻetau ʻamanaki ʻo e Puleʻangá, ʻoku tau fakaʻehiʻehi ai mei hono lōmekina ʻe he fokotuʻutuʻu ko ení. (Luke 21:34-36) ʻI he tafaʻaki ʻe tahá, ʻi heʻetau tauhi maʻu ʻo “hanganaki fakakaukau” ki he ʻaho ʻo Sihová, ʻoku ueʻi ai kitautolu ke fakalahi ʻetau kau ʻi he ngāue fakamalanga fakahaofi moʻuí.—2 Pita 3:11, 12, NW.
5. ʻOku anga-fēfē hanga ʻe he tokaʻi ʻo e moʻuí ʻo ueʻi kitautolu ʻi he ngāue fakafaifekaú?
5 ʻI heʻetau malanga fakavavevavé, ʻoku tau tapua atu ai ʻa e vakai ʻa Sihova ki he moʻuí: “Mo e ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.” (2 Pita 3:9; Isi. 33:11) ʻOfa ke tau fakapapauʻi ke fetuʻutaki ki he tokolahi taha ʻe ala lava ʻi hotau feituʻu ngāué, ki he fakahīkihikiʻi ʻo Sihová!—Sāme 109:30.