ʻOku Feʻunga ʻa e Meʻa ʻOku Ou Faí?
1. Ko e hā ʻa e ngaahi meʻa ʻe hohaʻa nai ki ai ha Kalisitiane faitōnunga?
1 Kuo faifai ange peá ke ʻeke hifo kiate koe ʻa e fehuʻi ko iá? Mahalo pē ko hoʻo kau ʻi he ngāue fakafaifekaú kuo hōloa koeʻuhi ʻoku fakatupunga ʻe he taʻumotuʻá, mahamahakí, pe ko e lahi ʻa e ngaahi fatongia fakafāmilí ke ke loto-siʻi. Ko e tuofefine ʻe taha mo ʻene fānau ʻe toko tolu naʻá ne tohi ʻo pehē ʻokú ne ongoʻi halaia ʻi he taimi ʻe niʻihi koeʻuhi ko e taimi mo e ivi naʻe fiemaʻu ke ne tokangaʻi ʻaki ʻa hono fāmilí ʻoku fakangatangata ai ʻa e meʻa ʻoku lava ke ne fai ʻi he ngāue fakafaifekaú. Ko e hā te ne tokoniʻi kitautolu ke tau vakai ai ki he ngaahi meʻá ʻi ha founga mafamafatatau?
2. Ko e hā ʻoku ʻamanekina ʻe Sihova meia kitautolú?
2 Meʻa ʻOku ʻAmanekina ʻe Sihova Meia Kitautolú: ʻOku ʻikai ha veiveiua, ko kitautolu kotoa te tau saiʻia ke fai ʻa e meʻa lahi ange ʻi he ngāue fakafaifekaú. Ka ʻoku faʻa ʻi ai ha faikehekehe lahi ʻi he meʻa te tau saiʻia ke faí mo e meʻa ʻe lava moʻoni ke tau faí. Ko e moʻoniʻi meʻa ko ia ʻetau saiʻia ke fai ʻa e meʻa lahi angé ʻoku fakahaaʻi ai ʻoku ʻikai ke tau fakataʻetaʻehohaʻa. ʻOku totonu ke tau manatuʻi ʻoku ʻafioʻi lelei ʻe Sihova hotau ngaahi ngātangá pea ʻoku ʻikai te ne fiemaʻu ʻa e meʻa lahi ange ʻi he meʻa ʻoku lava moʻoni ke tau faí. (Sāme 103:13, 14) Ko e hā ʻokú ne ʻamanekina meia kitautolú? ʻOkú ne finangalo ke tau tauhi ʻaufuatō kiate ia, ʻo foaki ʻetau lelei tahá kiate ia.—Kol. 3:23.
3. ʻE lava fēfē ke tau fakafuofuaʻi ʻetau ngaahi feinga ʻi he ngāue fakafaifekaú?
3 Ko e hā te ne tokoniʻi kitautolu ʻi hono fakapapauʻi ʻa e meʻa moʻoni te tau ala fakahokó? ʻE lava ke tau kole kia Sihova ke ne tokoniʻi kitautolu ke tau sio totonu ai ki hotau tuʻungá. (Sāme 26:2) Ko ha kaumeʻa Kalisitiane falalaʻanga mo matuʻotuʻa ʻa ia ʻokú ne ʻiloʻi lelei kitautolu pea ʻoku ʻikai ilifia ke tala mai pe ʻoku fiemaʻu ke tau fakaleleiʻi hotau tuʻungá ʻe toe hoko nai ia ko ha tokoni. (Pal. 27:9) Manatuʻi foki, koeʻuhi ʻoku feliliuaki ʻa e ngaahi tuʻungá, ʻoku ʻaonga ke fakafuofuaʻi maʻu pē ʻa hotau tuʻungá.—Ef. 5:10.
4. ʻOku totonu ke fēfē ʻetau vakai ki he ngaahi fakamanatu makatuʻunga ʻi he Tohi Tapú fekauʻaki mo e ngāue fakafaifekaú?
4 Founga ke Vakai ʻAki ki he Ngaahi Fakamanatú: Lolotonga ha lova, ko e kau fakakaekaé ʻoku nau faʻa kaikaila ʻo fakaʻaiʻai. Ko e taumuʻá ke tokoniʻi ʻa e kau lelé ke nau aʻusia ʻenau taumuʻá, ʻo ʻikai ʻai ke nau loto-siʻi. ʻI he tuʻunga meimei tatau, ko e ngaahi fakalototoʻa mo e fakamanatu makatuʻunga he Tohi Tapú ʻoku ʻomai ʻi heʻetau ngaahi fakatahá pea ʻi heʻetau ʻū tohí ke “malangaʻaki [fakavavevave] ʻa e folofola” ʻoku maʻa ʻetau lelei pea ʻoku ʻikai ke fakahuʻunga ai ko ʻetau ngaahi feingá ʻoku taʻefeʻunga ʻi ha founga. (2 Tim. 4:2) ʻOku lava ke tau tuipau ʻi he lolotonga ʻetau hanganaki feinga ke fai ʻetau lelei tahá, ʻe manatua ʻe Sihova ʻa ʻetau ‘ʻofá mo e ngaué’ fakataha mo ʻene hōifua ki ai.—Hep. 6:10.