Fakahinohino ki he Faʻahinga ʻOku Nau Fai ʻa e Konga ki he Fakataha Ngāué

ʻE kamataʻaki ʻa e ʻīsiu ko eni ʻo e Ko ʻEtau Ngāue Fakafaifekau ha taimi-tēpile ki he Fakataha Ngāué ʻaki ha fakalea faingofua. Ko e ngaahi fakahinohino mo e ngaahi fakamanatu ko ení ʻe fakaleleiʻi mo fakamahinoʻi ia ʻi he meʻa naʻe fakamatalaʻi ʻi he kupu “Founga Teuteu ki he Fakataha Ngāué,” ʻa ia naʻe hā ʻi he Ko ʻEtau Ngāue Fakafaifekau ʻo Mē 2009.

◼ Malanga: ʻOku ʻuhinga ia ki ha malanga makatuʻunga ʻi he maʻuʻanga fakamatala kuo vaheʻí kae ʻikai kau ki ai ʻa e kau fanongó. ʻOku totonu ki he tokotaha-malangá ke tokangataha ki he meʻa ʻe ʻaonga lahi taha ki he fakatahaʻangá.

◼ Fehuʻi mo e Tali: ʻOku hangē pē ko e Ako Taua Leʻo, ko e konga ko ení ʻoku ʻi ai ʻa e talateu nounou ʻaupito mo e fakamulituku, mo e ngaahi fehuʻi ʻoku ʻeke ʻi he ngaahi palakalafí kotoa. ʻOku totonu ke fakaʻehiʻehi ʻa e faiakó mei hono fai ha fakamatala tōtuʻa. Ko e ngaahi konga Tohi Tapu tefitó ʻe lava ke lau nai ia ʻi he taimi ʻoku tuku maí. ʻOku ʻikai ke totonu ke lau ʻa e ngaahi palakalafí kae ʻoua ke toki ʻomai ha fakahinohino ke fai pehē.

◼ Fetalanoaʻaki: Ko e malanga ko ení ʻoku ʻi ai hano konga ʻe kau ki ai ʻa e kau fanongó. ʻOku ʻikai ko ha malanga pē ia, pea ʻoku ʻikai ko ha ngaahi fehuʻi pē mo e ngaahi tali.

◼ Fakahāhā mo e Fakaʻekeʻeke: Ko e ngaahi fakahinohino ke fai ha fakahāhaá ʻoku ʻuhingá ko e fatongia ia ʻa e tokoua naʻe vaheʻi ki ai ʻa e kongá ke fakakau ki ai ha fakahāhā; ʻoku ʻikai fiemaʻu kiate ia tonu ke ne fai ʻa e fakahāhaá. Ko e faʻahinga ʻokú ne fili ke tokoni kiate iá ʻoku totonu ke nau malava ʻo fai ʻa e kongá mo alafaʻifaʻitakiʻanga pea kuo pau ke ne vaheʻi kiate kinautolu ha taimi feʻungamālie ʻo ka malava. ʻOku lelei ange ke ʻoua ʻe ngāueʻaki ʻa e kau malanga foʻou mo ʻikai ke nau taukeí ke fai ʻa e fakahāhā ki he founga hono fai ʻa e ngāue fakamalangá koeʻuhí pē ke nau ʻasi mai ai mei muʻa ʻi he peletifōmú, neongo ʻe lava ke ngāueʻaki ha niʻihi ʻo kinautolu ko ha tokotaha-ʻapi. Ko e kau malanga ʻoku nau fai ʻa e fakahāhaá ʻoku totonu ke nau hanga ki he kau fanongó. Ko e faʻahinga ʻoku kau ki ha fakaʻekeʻeké ʻoku nau fai ʻenau poupoú mei he peletifōmú kae ʻikai mei honau nofoʻangá. Ko e ngaahi fakahāhaá mo e ngaahi fakaʻekeʻeké ʻoku totonu ke ʻahiʻahiʻi. Kapau ʻe ʻovataimi ʻa e fakatahá pea ʻoku fiemaʻu ki ha tokoua ke fakanounouʻi ʻene kongá kae ʻoua ʻe taʻofi ai ʻa e ngaahi fakahāhaá pe ngaahi fakaʻekeʻeké. ʻOku totonu ki he kau sevāniti fakafaifekaú ke nau vakai ki he sea ʻo e kulupu ʻo e kau mātuʻá pe ko ha mātuʻa kehe ki muʻa ke fili ha faʻahinga ke nau kau.

Kapau ʻoku ʻi ai ha konga ʻoku kehe ʻa e fakahinohino ki aí, ʻoku totonu ke fai ha muimui lelei ki ai. Ko hono fakahoko ʻo e ngaahi konga ʻi he Fakataha Ngāué ʻo fakatatau ki he meʻa ne lave ki ai ʻi ʻolungá, ʻe tokoni ai ʻa e fanga tokouá ki he Fakataha Ngāué “ke fai ke tāu mo māu.”—1 Kol. 14:40.