ʻOku Teuteuʻi Kitautolu ʻe he Fakataha Ngāué ki he Ngāue Lelei Kotoa Pē
1 Ko e taumuʻa ʻo e Fakataha Ngāué ke ne ueʻi mo teuteuʻi kitautolu ke tau kau kakato ange ʻi he ngāue fakamalangá mo e ngaohi ākongá. (2 Tīm. 3:17) Ka, ʻo kapau ʻoku ʻikai te tau teuteu lelei ki he fakatahá ni pe ʻoku ʻikai te tau ngāueʻaki ʻa e meʻa ʻoku tau akó, ʻe siʻisiʻi pē ʻa e ngaahi ʻaonga te tau maʻú.
2 Ko e tomuʻa teuteu ki aí te ne tokoniʻi koe ke ke maʻu ʻa e fakahinohinó ʻo kakato ange. Toe vakai ki he ngaahi tohi ʻe ngāueʻakí, pea ʻomai ia ki he fakatahá ni kae malava ke ke lau fakalongolongo pē ʻi he lave ki ai ʻa e toko taha malangá mo ke kau ai ki he fakatahá ni. ʻAi ke ke hoko ko ha toko taha fanongo tokanga, pea hiki ʻa e ngaahi noutí ke toki ngāueʻaki ʻamui.
3 ʻOku vakai tokanga ʻa e ʻovasia pulé ki he ngaahi konga kuo vahevahe ki he fakatahá ni. Kuo vaheʻi ki he kau mātuʻa mo e kau sevāniti alafua ke nau teuteu ʻa e ngaahi konga ko iá. (om p. 70) Ko e ngaahi fakatahaʻanga ʻoku tokosiʻi ai ʻa e kau mātuʻá mo e kau sevānití te nau fili ha ngaahi tokoua kehe ʻoku taaú ke tokoni kiate kinautolu. (km 10/76, Puha Fehuʻi) Ko e toko taha taki taha te ne fai ha malangá ʻoku totonu ke ne teuteu fakamākukanga, muimui ofi ki he tataki ʻoku tokonaki maí, pea fakapapauʻi ʻoku ʻikai pē te ne lakasi ʻa e taimi kuo vaheʻi kiate iá.
4 Ko e fakatahá ni ʻoku kamata maʻu pē ʻaki ʻa e ngaahi fanongonongó. Ko e tokoua kuo vaheʻi ki aí ʻoku totonu ke ne tomuʻa fetuʻutaki ki he ʻovasia pulé ke ne ʻilo pe ko e hā ha toe ngaahi meʻa ʻoku fie maʻu ke fakahaá. ʻE fakakau nai ki ai ʻa e ngaahi tohi mei he Sosaieté pe ko e ngaahi fakamanatu ʻo kau ki he ngaahi fokotuʻutuʻu ki he ngāue fakamalangá pe ko e ngaahi lipooti fakamāhiná. Te tau ʻilo nai heni ʻoku ʻi ai ha faʻahinga ʻoku puke ʻa ia ʻoku fie maʻu ke fai ki ai ha ʻaʻahi pe te tau fanongo ki he ngaahi fakaikiiki ʻo kau ki ha ngaahi ngāue ʻoku fakaangaanga ki ai ʻa e fakatahaʻangá ki he kahaʻú. Fai ha fanongo tokanga koeʻuhi ke ke ʻiloʻi mo mateuteu ke ke kau ki he ngaahi meʻá ni.
5 ʻI he ʻi ai ha konga ʻi he fakatahá ʻoku fie maʻu ke kau ki ai mo e kau fanongó, teuteu ki ai ʻaki hano lau ʻa e konga ko iá pea sio ki he ngaahi konga Tohi Tapú. Fakakaukau ki he founga te ke ngāueʻaki ai ʻa e ngaahi fokotuʻú pea ko e hā ʻa e ngaahi fakamatala te ke malava ke fai ke fakalototoʻa ki he niʻihi kehé. Te ke fakahā nai ʻa e ʻaonga ʻo e fakahinohinó ʻaki hano fakahā nounou ha meʻa naʻe hokosia.
6 ʻI he ʻi ai ha fakahāhā, feinga ke ke sio ʻokú ke ʻi he tuʻunga meimei tatau mo ia ʻoku hokó, pea ke fakakaukau ki he meʻa te ke leaʻakí. Fakatokangaʻi ʻa e ʻuhinga ke fakamoʻoniʻi ʻaki ha meʻa ʻoku ngāueʻakí pea mo e fakamatala ʻe fakaiku ki he fakatupu fakalotoʻí. Feinga ke manatuʻi ʻa e meʻa naʻá ke leaʻaki ʻi he taimi fakamuimui taha naʻá ke ʻi ha faʻahinga tuʻunga tatau ai, mo fakakaukau pe ʻe fēfē hono tokoniʻi koe ʻe he ngaahi meʻa tefito ʻoku hā ʻi he fakahāhaá ke ke maʻu ha ola lelei ange ʻi he kahaʻú.
7 Ko kinautolu ʻoku kau ʻi he ngaahi fakahāhaá mo e ngaahi fakaʻekeʻeké ʻoku totonu ke nau ʻahiʻahiʻi fakalelei ia ki muʻa. Ko e toko taha taki taha ʻoku totonu ke ne ʻilo pe ko e hā ʻa e meʻa te ne leaʻakí mo e meʻa ʻoku totonu ke ne fai ʻi he peletifoomú. ʻOku tātātaha pē ke fakaueʻiloto pe fakalototoʻaʻi ʻa e kau fanongó ʻe he ngaahi konga ʻoku ʻikai ke fai hano ʻahiʻahiʻí. ʻOku ʻi ai ʻa e faʻahinga ʻe niʻihi ʻoku nau teuteu ke ʻahiʻahi ʻenau kongá ʻi he ʻosi ʻa e ako Taua Leʻo ʻi he Sāpate ko ia ki muʻá koeʻuhi ke nau ʻahiʻahi ʻi he peletifoomú pea ke ʻai ke ʻilo ʻe he ngaahi tokoua ʻoku nau ngāue ki he meʻa fakaongo leʻo lahí ʻa e meʻa ʻe fie maʻú.
8 ʻI he taimi ʻe niʻihi ʻe fakakau atu ki he polokalamá ha malanga ʻoku lave ki ha fie maʻu mahino ʻa e fakatahaʻangá pe ko ha kupu faingatonu mei he Ko e Taua Leʻó. Fanongo tokanga, ʻai ʻa e akonakí ke aʻu ki ho lotó, pea feinga ke ngāueʻaki ia.
9 ʻOku totonu ke tau “teuteu ki he gaue lelei kotoabe.” (2 Tīm. 2:21, PM) Ko e Fakataha Ngāué ko e taha ia ʻo e ngaahi tokonaki kuo fai ʻe Sihova ke tokoniʻi kitautolu ki hono fai ʻa e teuteu lelei ko iá. Ko hono maʻu ʻa e fakataha ngāué mo e feinga loto-moʻoni ke ngāueʻaki ʻa e meʻa kuo tau akó ʻe tokoniʻi moʻoni ai kitautolu ke tau malava ke “fai ke kakato [ʻetau] gaue fakafaifekau.”—2 Tīm. 4:5, PM.