Te Ke Lava ʻo Kakapa Atu ki ha Hoa Taʻetui?
1 ʻOkú ʻi ai ha kau malanga ʻi hoʻo fakatahaʻangá ʻoku ʻi ai honau husepāniti pe uaifi taʻetui? Kapau ko ia, ʻoku ʻikai ha veiveiua ko e kau malanga ko ení ʻoku nau loto ke kau mai honau hoá mo kinautolu ki he lotu moʻoní. Ka ʻoku ʻikai ko kinautolu pē. Ko e fakatahaʻangá kotoa ʻokú nau tapua atu ʻa e holi ko ia ʻa e ʻOtuá “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) ʻE anga-fēfē nai haʻatau kakapa atu ki he ngaahi hoa taʻetui ʻo e kau malanga ʻi heʻetau fakatahaʻangá?
2 ʻUluakí, ʻoku totonu ke tau feinga ke sio ki he ngaahi meʻá mei he anga ʻo e vakai ʻa e tokotaha taʻetuí. ʻOku tokolahi ʻa e ngaahi hoa taʻetui ʻoku nau ʻofa nai ʻi honau fāmilí pea nau feinga mālohi ke nau hoko ko ha hoa mali mo ha mātuʻa lelei. Mahalo pē ʻoku nau maʻu ha tui fakalotu loto-moʻoni ʻoku kehe ia mei haʻatautolú. ʻOku nau maʻu nai ha ʻilo siʻisiʻi fekauʻaki mo e Kau Fakamoʻoni ʻa Sihová tuku kehe ʻa e meʻa ʻoku tala ange kia kinautolu ʻe honau kaungāmeʻa taʻeʻilo pe tomuʻa fehiʻá. Ko e niʻihi ʻoku ʻikai te nau saiʻia ʻi he taimi ʻoku ngāueʻaki ʻe honau hoá ki he lotú ʻa ia naʻa nau fakamoleki ki muʻa mo ho nau fāmilí. Ko e ʻiloʻiló te ne tokoniʻi kitautolu ke tau feangainga anga-ʻofa mo fakaʻapaʻapa ki ha tokotaha taʻetui pea fakaʻehiʻehi mei he hoko ʻo manavasiʻi tōtuʻa ʻi he taimi ʻoku ne ʻi hotau lotolotongá ai.—Pal. 16:20-23.
3 Mahuʻingaʻia Fakafoʻituitui: Ko e founga lelei taha ke ikuʻi mai ai ha hoa taʻetui ki he moʻoní, ʻi he kamata pē nai, mahalo ko hano fakafou ʻi heʻetau ngaahi ngāué, kae ʻikai fakafou ʻi ha fetalanoaʻaki Fakatohitapu. (1 Pita 3:1, 2) Ko e meʻa mahuʻinga ʻi he tuʻungá ni ko hono fakahāhā ʻa e mahuʻingaʻia fakafoʻituitui. Ko e fanga tuofāfine ʻi he fakatahaʻangá ʻe lava ke nau mahuʻingaʻia ʻi ha uaifi taʻetui, pea ko e fanga tokouá ʻe lava ke nau fai e meʻa tatau ki ha husepāniti taʻetui. Anga-fēfē?
4 Kapau ʻoku teʻeki ai ke ke feʻiloaki mo e malí, mahalo ʻe lava ke ke fai ia hili haʻo fetalanoaʻaki mo e hoa Kalisitiané. ʻOua ʻe siva ʻa hoʻo ʻamanakí kapau ko e ʻuluaki fakafeangai ʻa e tokotaha taʻetuí ʻokú ne taʻemahuʻingaʻia. Ko ʻetau anga-fakakaumeʻá pea mo e mahuʻingaʻia fakafoʻituituí ʻe lava ke ueʻi ia ke ne vakai mo e saiʻia ange ʻi he kau Fakamoʻoni ʻa Sihová. (Loma 12:20) Ko e kau Kalisitiane matuʻotuʻa ʻe niʻihi kuo nau fakaafeʻi ha tokotaha taʻetui mo hono fāmilí ki ha kai efiafi, mo e fakakaukau ke nau hoko ʻo maheni lelei ange pea holoki ki lalo mo ha tomuʻa fehiʻa pē naʻe ʻi ai. Kuo nau talanoa fekauʻaki mo ʻene ngaahi mahuʻingaʻiá, kae ʻikai ko hono fakamālohiʻi ʻa e fetalanoaʻakí ki he ngaahi kaveinga fakalaumālié. Ki mui aí, ʻi he taimi ʻoku ongoʻi fiemālie ange ai ʻa e tokotaha taʻetuí, ʻe malava nai ai ha fetalanoaʻaki Fakatohitapu. Pe ko ʻene talitali lelei nai ha fakaafe ke maʻu ʻa e taha ʻo ʻetau ngaahi fakatahá ke sio ki he meʻa ʻoku ako ʻe hono uaifí, tautautefito kuó ne ʻosi ʻiloʻi ha niʻihi ʻi he fakatahaʻangá. Neongo kapau ʻoku ʻikai mateuteu ia ke fai hano sivisiviʻi ʻa e moʻoní, ʻe lava moʻoni ke fakaongoongoleleiʻi ia ki he poupou ʻokú ne ʻoange ki hono hoa ʻoku tuí.
5 Tautefito ki he kau mātuʻá ʻoku totonu ke nau kakapa atu ki he ngaahi hoa taʻetuí pea tokanga ki he ngaahi faingamālie ke ʻoatu ha fakamoʻoní. Ko ha tokotaha taʻetui kuo ʻikai ke ne talitali lelei ha fetalanoaʻaki Fakatohitapu ʻe fanongo nai ki ha ngaahi fakalototoʻa Fakatohitapu ʻi he taimi ʻe ʻi he falemahakí ai pe fetaulaki ai mo ha ngaahi palopalema mafatukituki ʻo e moʻuí. Kapau ʻoku hokosia ʻe he fāmili māvahevahé ha faingataʻa, ʻo hangē ko e mate ʻa ha mēmipa ʻo e fāmilí, ko e kau mātuʻá te nau fakaafeʻi nai ʻa e tokotaha taʻetuí ke ne kau fakataha mai ʻi he taimi ʻoku nau ʻoatu ai ha fakafiemālie ki he fāmilí.
6 Sioloto atu ki he fiefia ʻe hokosia ʻe ha Kalisitiane ʻi heʻetau fakatahaʻangá kapau ʻe hoko hono malí ʻo tali lelei pea haʻu ki he moʻoní! Ko ha meʻa fakafiefia pehē te ne ʻoatu ai ʻa e fiefia lahi kia Sihova, ko e kau ʻāngeló, mo e toenga ʻo e fakatahaʻangá. (Luke 15: 7, 10) Kae kehe, kapau ko e tokotaha taʻetuí ʻoku ʻikai ke ne ongongofua ʻi he kamatá, te tau kei lava pē ʻo fiefia he ko ʻetau ngaahi feinga hokohoko ʻoku faí ʻoku fakahōifua ia kia Sihova, ʻa ia ʻoku “ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.”—2 Pita 3:9.
[Fehuʻi ki he Ako]
1. Ko e hā ʻoku ʻikai ai ko e kau Kalisitiane pē ʻoku nau nofo ʻi ha fāmili māvahevahé ʻoku nau mahuʻingaʻia ʻi hono tokoniʻi ʻa e hoa taʻetuí ke ne tali ʻa e moʻoní?
2. ʻE lava fēfē ʻe hono maʻu ʻa e ʻiloʻiló ʻo tokoniʻi kitautolu ke tau poupou ki ha hoa taʻetui?
3. Ko e hā e founga lelei taha ke ikuʻi mai ai ha hoa taʻetui?
4. ʻE anga-fēfē nai haʻatau fakahāhā ʻa e mahuʻingaʻia fakafoʻituituí?
5. ʻE anga-fēfē nai ʻa e kakapa atu ʻa e kau mātuʻá ki ha tokotaha taʻetui?
6. Ko e hā ʻa e ngaahi ʻuhinga ke kakapa atu ai ki he ngaahi hoa taʻetuí?
[Fakamatala ʻi he peesi 6]
Ko e founga lelei taha ke ikuʻi mai ai ha hoa taʻetui ki he moʻoní, ʻi he kamata pē nai, mahalo ko hano fakafou ʻi heʻetau ngaahi ngāué, kae ʻikai fakafou ʻi ha fetalanoaʻaki Fakatohitapu