Fakalaulauloto Fakataha mo e Faʻa Lotu—Ko ha Fiemaʻu Ia ki he Kau Faifekau Faivelengá
1. Ko e hā naʻá ne tokoniʻi ʻa Sīsū ke fakaʻehiʻehi mei he hoko ʻo fakaheleleuʻi mei heʻene ngāue tefitó?
1 Kuo fakamoleki ʻe Sīsū ʻa e efiafí ʻi hono fakamoʻui ʻa e kakaí pea mo hono kapusi ʻa e fanga tēmenioó. ʻI hono ʻiloʻi ia ʻe hono kau muimuí ʻi he ʻaho hono hokó, naʻa nau pehē: “ʻOku fiemaʻu koe ʻe he kakai kotoa,” ʻo nau fakaʻaiʻai ia ke hoko atu ʻene ngaahi ngāue fakaofó. Kae kehe, naʻe ʻikai ai pē teitei fakaheleleuʻi ʻa Sīsū mei heʻene ngāue tefitó ko hono malangaʻi ʻa e ongoongo leleí. Naʻá ne tali: “Tau ō ki ha potu kehe, ki he ngāhi vilisi ofi mai, koeʻuhi ke u malanga ki ai foki: he ko ia ia naʻa ku haʻu ai.” Ko e hā naʻá ne tokoniʻi ʻa Sīsū ke tauhi maʻu ʻene tokanga tefitó? Naʻá ne tuʻu hake hengihengi ke lotu mo fakalaulauloto. (Mk. 1:32-39) ʻE lava fēfē ʻe he fakalaulauloto mo e faʻa lotú ke toe tokoniʻi kitautolu ke tau hoko ko e kau malanga faivelenga?
2. Ko e hā ʻe lava ke tau fakalaulauloto ki ai te ne tokoniʻi kitautolu ke tauhi maʻu ʻetau faivelenga ki he ngāue fakafaifekaú?
2 Fakalaulauloto ki he Hā? Naʻe fakatokangaʻi ʻe Sīsū ko e kakaí naʻa nau “ongosia mo tukuhāusia, ʻo hange ko ha fanga sipi taʻe hanau tauhi.” (Mt. 9:36) ʻI he founga meimei tatau, ʻe lava ke tau fakakaukauloto atu ki he lahi ʻo hono fiemaʻu ʻe he kakaí ʻa e ongoongo leleí. ʻE lava nai ke tau fakakaukauloto ki he fakavavevave ʻo e taimí. (1 Kol. 7:29) ʻE lava ke tau fakakaukau fekauʻaki mo e ngaahi ngāue mo e ngaahi ʻulungaanga ʻo Sihová, ko hotau monū ke hoko ko e Fakamoʻoni ʻa Sihová, pea mo e koloa mahuʻinga fakalaumālie kuo tau ako mei he Folofola ʻa e ʻOtuá ʻa ia ʻoku kei taʻeʻiloa ki he kakai ʻo hotau feituʻu ngāué.—Sāme 77:11-13; Ai. 43:10-12; Mt. 13:52.
3. Ko fē nai ʻa e taimi te tau fakalaulauloto aí?
3 Fakalaulauloto ʻi he Taimi Fē? Hangē ko ia naʻe fai ʻe Sīsuú, ko e faʻahinga ʻe niʻihi ʻoku nau tuʻu hengihengia ʻi he taimi ʻoku kei lōngonoa aí. Ko e niʻihi ia ʻokú nau pehē ko e lelei tahá ke fakalaulauloto ʻi he efiafí ki muʻa ke nau toki mohé. (Sen. 24:63) Naʻa mo ha taimi-tēpile moʻumoʻua, ʻe lava ke tau maʻu ha taimi ki he fakalaulaulotó. Ko e faʻahinga ʻe niʻihi ʻoku nau fai pehē lolotonga ʻenau heka he ngaahi meʻalele fefonongaʻaki maʻá e kakaí. Ko e niʻihi ʻoku nau ngāueʻaki ha konga ʻo ʻenau taimi mālōlō hoʻataá ki ha fakalaulauloto ʻikai fakahohaʻasi. Ko e tokolahi ʻoku nau ʻilo ko e fakalaulauloto ki muʻa ke kau atu ʻi he ngāue fakafaifekaú, naʻa mo ha kiʻi lau mōmeniti, ʻokú ne tokoniʻi kinautolu ke nau malanga mo ha faivelenga mo e loto-toʻa lahi ange.
4. Ko e hā ʻoku totonu ai ke tau fakalaulaulotó?
4 Ko e fakalaulauloto mo e faʻa lotú te ne fakalolotoʻi ʻa ʻetau holi ke tauhi kia Sihová, fakamāsilaʻi ʻa ʻetau tokanga tefito fakalaumālié pea fakaivimālohiʻi ʻa ʻetau fakapapau ke malanga hokohokó. Ko e Faifekau Pule ʻa e ʻOtuá, ʻa Sīsū, naʻá ne maʻu ʻaonga mei he fakalaulaulotó, pea ko ia ʻe pehē pē mo kitautolu.