Maʻu ʻa e Fiefia ʻi Hono Malangaʻi ʻa e Ongoongo Leleí

Kuo faifai ange peá ke ʻiloʻi ʻoku faingataʻa ke malanga? Ko e tokolahi ʻo kitautolu te nau tali ʻio ki he fehuʻí ni. Ko e hā hono ʻuhingá? Mahalo pē ʻoku tau faʻa fehangahangai mo ha taʻemahuʻingaʻia pe fakafili ʻi hotau feituʻu ngāué pe ʻoku tau manavasiʻi ke talanoa ki he kau solá. Ko hono moʻoní, ʻoku lava ke holoki ʻe he ngaahi meʻá ni ʻetau fiefiá. Kae kehe, ʻoku tau lotu ki he ʻOtua fiefia ʻa ia ʻokú ne fiemaʻu mai ke tau tauhi kiate ia ʻi he fiefia. (Saame 100:2; 1 Tīm. 1:​11) Ko e hā ʻa e ngaahi ʻuhinga lelei ʻe tolu ke tau fiefia ai ʻi he ngāue fakamalangá?

ʻUluakí, ʻoku tau talaki ha pōpoaki ʻo e ʻamanaki. Neongo ʻoku hōloa ʻa e ʻamanakí ʻi he sōsaieti ʻo e ʻaho ní, ʻoku lava ke tau fakafonu ʻa e loto ʻo e kakaí ʻaki ʻa e “ongoongo lelei ʻo e meʻa ʻoku lelei ange.” (ʻAi. 52:​7) Ka ko e ongoongo lelei ʻo e Puleʻanga ʻo e ʻOtuá ʻoku lava foki ke ne fakafonu kitautolu ʻaki ʻa e fiefia. Ki muʻa ke ʻalu ʻo malangá, fakalaulauloto ki he ngaahi tāpuaki ʻe ʻomai ʻe he Puleʻanga ʻo e ʻOtuá ki he māmaní.

Uá, ko e ongoongo lelei ʻoku tau malangaʻí ʻoku ʻaonga fakasino mo fakalaumālie ia ki he kakaí. ʻOku nau ako ai ke siʻaki ʻa e ngaahi tōʻonga fakatupu maumau pea maʻu ʻa e ʻamanaki ko e moʻui taʻengata. (ʻAi. 48:​17, 18; Loma 1:​16) ʻOku lava ke tau sioloto atu kiate kitautolu ʻi ha ngāue kumi-mo-fakahaofi. Neongo ko e kakai ʻe niʻihi ʻoku ʻikai ke nau loto ke fakahaofi kinautolu, ʻoku tau hanganaki kumi ki he faʻahinga ʻoku nau loto ke fakahaofi kinautolú.​—Māt. 10:​11-​14.

Tolú, pea ko e mahuʻinga lahi tahá ia, ko ʻetau ngāue fakamalangá ʻoku fakalāngilangiʻi ai ʻa Sihova. ʻOkú ne fakamahuʻingaʻi lahi ʻetau ngāue fakaefakamoʻoní. (ʻAi. 43:10; Hep. 6:​10) ʻIkai ngata aí, ʻokú ne foaki nima-homo mai hono laumālie māʻoniʻoní kiate kitautolu ke fakahoko ʻa e ngāue ko ení. Ko ia ai, kole kia Sihova ki ha fiefia, ko e fua ʻo e laumālie māʻoniʻoní. (Kal. 5:​22) ʻI heʻene tokoní, ʻoku lava ke tau ikuʻi ai ʻetau ngaahi loto-moʻuá pea malanga loto-toʻa. (Ngā. 4:​31) Ko ia, tatau ai pē pe ko e hā ʻa e tali ʻoku fai mai ʻi heʻetau feituʻu ngāué, ʻoku tau maʻu ʻa e fiefia ʻi heʻetau vāhenga-ngāue ko e malanga.​—ʻIsi. 3:​3.

SIO ʻI HE VITIŌ TOE MAʻU ʻA E FIEFIÁ ʻI HE AKO MO E FAKALAULAULOTO, PEA TALI LEVA ʻA E NGAAHI FEHUʻI KO ENÍ:

• Ko e hā kuo pau ai ke tau fakamuʻomuʻa ʻetau tōʻongaʻaki ʻa e kai fakalaumālié, neongo kapau ʻoku tau fakamoleki ʻa e houa lahi ʻi he ngāue fakamalangá ʻi he māhina taki taha?

• ʻI he founga fē ʻoku totonu ke tau faʻifaʻitaki ai kia Melé?

• Ko fē ʻa e taimi ʻokú ke vaheʻi ke fakalaulauloto ai ki he Folofola ʻa e ʻOtuá?

• Ko e hā ʻokú ne ʻomai kiate koe ʻa e fiefiá ʻi hoʻo malangaʻi ʻa e ongoongo leleí?