ʻOkú Ke Ako ʻa e Meʻa Kotoa ʻOkú Ke Malavá Meia Sihova?

1. ʻOku fēfē ʻa e ongoʻi ʻa Sihova fekauʻaki mo e akó?

¹ Ko Sihova, ʻa hotau “Faiako Maʻongoʻongá,” ʻokú ne loto ke tau ako. (Ai. 30:20, NW) Naʻá ne kamata faiako hili ʻene fakatupu ʻa hono ʻAlo ʻuluaki fakatupú. (Sione 8:28) Hili e angatuʻu ʻa ʻĀtamá, ne ʻikai tuku ai e faiako ʻa Sihová, ka naʻá ne tokonaki anga-ʻofa mai e fakahinohino ki he faʻahinga taʻehaohaoa ʻo e tangatá.—Ai. 48:17, 18; 2 Tim. 3:14, 15.

2. Ko e hā e feingangāue fakaeako ʻoku lolotonga fakahokó?

² ʻI he ʻahó ni, ʻoku tataki ai ʻe Sihova ʻa e feingangāue fakaeako lahi taha ʻi he hisitōliá. Hangē ko ia ne kikiteʻi ʻe ʻAiseá, ko e laui miliona takatakai he foʻi kolopé ʻoku nau tafe ki he “moʻunga [fakaefakatātā] ʻo e fale ʻo Sihova.” (Ai. 2:2) Ko e hā ʻoku nau tafe ai ki aí? Ke fakahinohinoʻi ʻi he ngaahi founga ʻa e ʻOtuá, ʻio, ke akoʻi kinautolu ʻe Sihova! (Ai. 2:3) Lolotonga e taʻu fakangāue 2010, naʻe fakamoleki ai ʻe he Kau Fakamoʻoni ʻa Sihová ʻa e houa ʻe 1.6 piliona tupu ʻi he faifakamoʻoní mo hono akoʻi ki he kakaí ʻa e moʻoni Fakatohitapú. ʻIkai ko ia pē, ʻi he uike taki taha ʻoku ʻoatu ai e fakahinohino fakalaumālie ʻi he fakatahaʻanga ʻe 105,000 tupu ʻi māmani lahi, pea ʻoku faʻu ʻa e ʻū tohi fakaeako faka-Kalisitiane ʻe he tamaioʻeiki anga-tonu mo potó ʻi he lea laka hake he 500.

3. Kuo anga-fēfē hoʻo maʻu ʻaonga fakafoʻituitui mei he ako ʻoku tokonaki ʻe Sihová?

³ Maʻu ʻAonga Kakato: He maʻu ʻaonga ē ko kitautolu mei he ako fakaʻotuá! Kuo tau ako ko e ʻOtuá ʻoku ʻi ai hono huafa pea ʻokú ne mamahiʻi kitautolu. (Sāme 83:18; 1 Pita 5:6, 7) Kuo tau ako ʻa e ngaahi tali ki he niʻihi ʻo e ngaahi fehuʻi mahuʻinga taha ʻi he moʻuí: Ko e hā ʻoku faingataʻaʻia ai mo mate ʻa e kakaí? ʻE lava fēfē ke u maʻu ʻa e fiefia moʻoní? Ko e hā ʻa e taumuʻa ʻo e moʻuí? Kuo toe ʻomai ʻe Sihova kia kitautolu ʻa e tataki fakaeʻulungaanga ʻoku ʻai ke malava ʻo ‘tau monuʻia ai.’—Sios. 1:8.

4. Ko e hā ʻa e faingamālie fakaeako ʻe niʻihi ʻoku ala maʻu ʻe he kau sevāniti ʻa e ʻOtuá, pea ko e hā ʻoku totonu ai ke tau ako ʻa e meʻa kotoa te tau malavá meia Sihová?

⁴ Tānaki atu ki ai, ʻoku ʻai ʻe Sihova ke ala maʻu ʻa e ako makehe ke tokoniʻi ʻa e tokolahi ʻene kau sevānití ke fakalahi ʻenau ngāue kiate iá. Ko e peesi 4-6 ʻoku fakahokohoko ai ʻa e ngaahi faingamālie ʻe ala maʻu ʻe he niʻihi. Neongo kapau ʻoku taʻofi kitautolu hotau ngaahi tuʻungá mei hono maʻu ʻa e ako ʻa ia ʻoku fakahokohokó, ʻoku tau ngāuekakatoʻaki e ako fakaʻotua ʻoku tau ala maʻú? ʻOku tau fakalototoʻaʻi ʻa e fānau, ʻa ia ʻoku faʻa tataki ʻe he kau faiakó mo e niʻihi kehé ke tuli ki he ako māʻolunga ange ʻi he māmaní, kae fokotuʻu ha ngaahi taumuʻa fakalaumālie mo tuli ki he ako māʻolunga tahá—ko e ako fakaʻotuá? Ko hono ako ʻa e meʻa kotoa ʻoku tau malavá meia Sihová ʻe tokoniʻi ai kitautolu ke tau maʻu ha moʻui fiefia he taimí ni pea mo ha kahaʻu taʻengata.—Sāme 119:105; Sione 17:3.

Ngaahi Faingamālie Fakaeako ʻOku Ala Maʻu Fakafou he Kautaha ʻa Sihová

Ngaahi Kalasi Ako Lautohi mo Tohí

• Taumuʻa: Ke akoʻi e kakaí ki he founga ke lautohi ai mo tohí koeʻuhi ke nau kau ai ʻi he ako Tohi Tapu fakafoʻituituí pea ke akoʻi ʻa e moʻoní ki he niʻihi kehé.

• Lōloa: Fakatatau ki he fiemaʻú.

• Feituʻu: Fale Fakatahaʻanga fakalotofonua.

• Kinautolu ʻe Lava ke Kau ki Aí: Ko e kau malanga kotoa pē mo e faʻahinga mahuʻingaʻiá.

• Founga ke Kole Aí: ʻOku fokotuʻutuʻu ʻe he kau mātuʻa he fakatahaʻangá ʻa e ngaahi kalasi ako lautohi mo tohi ʻo fakatatau ki he fiemaʻu fakalotofonuá, pea ʻoku nau fakaʻaiʻai ʻa e tokotaha kotoa ʻe lava ke nau maʻu ʻaonga mei aí ke nau kau ki ai.

Ako Fakafaifekau Fakateokalatí

• Taumuʻa: Ke akoʻi ʻa e kau malangá ke nau hoko ko e kau malanga mo e kau faiako ola lelei ange ʻo e ongoongo leleí.

• Lōloa: Hokohoko.

• Feituʻu: Fale Fakatahaʻanga fakalotofonua.

• Kinautolu ʻe Lava ke Kau ki Aí: Ko e kau malanga kotoa pē. Pehē foki, ko e niʻihi ʻoku nau feohi longomoʻui mo e fakatahaʻangá, ʻoku nau loto-tatau mo e ngaahi akonaki ʻa e Tohi Tapú, pea ko ʻenau moʻuí ʻoku fehoanaki mo e ngaahi tefitoʻi moʻoni faka-Kalisitiané.

• Founga ke Kole Aí: Lea ki he ʻovasia Ako Fakafaifekau Fakateokalatí.

Ngaahi Kalasi Lea-Mulí

• Taumuʻa: Ke akoʻi ʻa e kau malangá ki he founga ke malangaʻi ai e ongoongo leleí ʻi ha toe lea kehe.

• Lōloa: Māhina ʻe fā pe nima. Ko e ngaahi kalasí ʻoku faʻa fai ia he ngaahi pongipongi Tokonakí he houa ʻe taha pe ua.

• Feituʻu: ʻOku faʻa fai ia ʻi ha Fale Fakatahaʻanga ofi mai.

• Kinautolu ʻe Lava ke Kau ki Aí: Ko e kau malanga tuʻunga lelei ʻoku nau fakaʻamu ke malanga ʻi ha lea muli.

• Founga ke Kole Aí: Ko e ngaahi kalasí ʻoku fokotuʻutuʻu ia ʻe he ʻōfisi vaʻá ʻo fakatatau ki he fiemaʻú.

Langa Fale Fakatahaʻangá

• Taumuʻa: Ke langa mo fakaleleiʻi ʻa e ngaahi Fale Fakatahaʻangá. ʻOku ʻikai ko ha ako eni, ka ʻi he malumalu ʻo e fokotuʻutuʻu ko ení ʻoku akoʻi ai e kau ngāue polé ki he ngaahi pōtoʻi kehekehe koeʻuhi ke lava ai ʻo nau tokoni ʻi he ngaahi ngāue langá.

• Lōloa: Fakatatau ki he ngaahi tuʻunga ʻo e tokotaha ngāue polé.

• Feituʻu: Ha feituʻu pē ʻi loto ʻi he feituʻu kuo vaheʻi ki he Kōmiti Langa Fakafeituʻú. ʻE fakaafeʻi nai e kau ngāue pole ʻe niʻihi ke nau tokoni ʻi he ngāue tokoní ʻi ha feituʻu mamaʻo ange kuo uesia ʻe ha fakatamaki.

• Ngaahi Tuʻunga Taau: Ko e fanga tokouá mo e fanga tuofāfiné kuo pau ke nau ʻosi papitaiso pea tali ʻe he kulupu ʻo e kau mātuʻá. ʻOku nau pōtoʻi nai pe ʻikai pōtoʻi.

• Founga ke Kole Aí: Fakafonu ha Kingdom Hall Volunteer Worker Questionnaire (S-82) ʻoku ʻomai ʻe he kau mātuʻa fakalotofonuá.

Ako Ngāue Tāimuʻá

• Taumuʻa: Ke tokoniʻi e kau tāimuʻá ke ‘fai ke kakato ʻenau gaue fakafaifekaú.’—2 Tim. 4:5, PM.

• Lōloa: Uike ʻe ua.

• Feituʻu: Fili ʻe he ʻōfisi vaʻá; ʻoku faʻa fai ʻi ha Fale Fakatahaʻanga ofi mai.

• Ngaahi Tuʻunga Taau: Ko e faʻahinga kuo nau tāimuʻa tuʻumaʻu ʻo ʻikai siʻi hifo he taʻu ʻe tahá.

• Founga ke Kau Aí: Ko e kau tāimuʻa tāú ʻoku anga-maheniʻaki pē ʻenau kau ki aí pea ʻoku fakahaaʻi kia kinautolu ʻe heʻenau ʻovasia sēketí.

Ako ki he Kau Hū ki Pētelí

• Taumuʻa: Ko e akó ni ʻoku faʻufaʻu ia ke tokoniʻi e kau aʻu foʻou maí ke nau lavameʻa heʻenau ngāue Pētelí.

• Lōloa: Houa ʻe taha he uike taha ʻi he uike ʻe taha-ono.

• Feituʻu: Pēteli.

• Ngaahi Tuʻunga Taau: Kuo pau ko e kau mēmipa tuʻumaʻu ʻo e fāmili Pētelí pe kau ngāue pole fakataimi taimi-lōloa (ko ha taʻu ʻe taha pe lōloa ange).

• Founga ke Kau Aí: Ko e kau mēmipa taau ʻo e fāmili Pētelí ʻoku anga-maheniʻaki pē ʻenau kaú.

Akoʻanga Ngāue Fakafaifekau ʻo e Puleʻangá

• Taumuʻa: Ke akoʻi e kau mātuʻá mo e kau sevāniti fakafaifekaú ke nau tokanga ki heʻenau tauhí mo e ngaahi fatongia fakaekautahá. (Ng. 20:28) Ko e akó ni ʻoku fai ia ʻi he ngaahi taʻu siʻi kotoa pē fakatatau ki he fili ʻoku fai ʻe he Kulupu Pulé.

• Lōloa: ʻI he ngaahi taʻu ki mui ní kuo fai ia ʻi he ʻaho ʻe taha mo e konga maʻá e kau mātuʻá pea ko e ʻaho ʻe taha maʻá e kau sevāniti fakafaifekaú.

• Feituʻu: ʻOku faʻa fai ʻi ha Fale Fakatahaʻanga pe ko ha Holo ʻAsemipilī ofi mai.

• Ngaahi Tuʻunga Taau: Kuo pau ko e kau mātuʻa pe kau sevāniti fakafaifekau.

• Founga ke Kau Aí: Ko e kau mātuʻa mo e kau sevāniti fakafaifekau tāú ʻoku fakaafeʻi kinautolu ʻe he ʻovasia sēketí.

Ako Maʻá e Kau Mātuʻa ʻi he Fakatahaʻangáa

• Taumuʻa: Ke tokoniʻi e kau mātuʻá ke tokanga ki honau ngaahi fatongia he fakatahaʻangá.

• Lōloa: ʻAho ʻe nima.

• Feituʻu: Fili ʻe he ʻōfisi vaʻá; faʻa fai ʻi ha Fale Fakatahaʻanga pe Holo ʻAsemipilī ofi mai.

• Ngaahi Tuʻunga Taau: Kuo pau ko e kau mātuʻa.

• Founga ke Kau Aí: Ko e kau mātuʻa tāú ʻoku fakaafeʻi kinautolu ʻe he ʻōfisi vaʻá.

Akoʻanga Maʻá e Kau ʻOvasia Fefonongaʻakí mo Honau Ngaahi Uaifíb

• Taumuʻa: Ke ʻai ke malava ʻa e kau ʻovasia sēketí mo e kau ʻovasia fakavahé ʻo ola lelei ange he ngāue ʻi he ngaahi fakatahaʻangá pea nau “fakafitefitaʻa ʻi he malanga mo e faiako” mo nau tauhi e faʻahinga ko ia ʻoku nau tokangaʻí.—1 Tim. 5:17; 1 Pita 5:2, 3.

• Lōloa: Māhina ʻe ua.

• Feituʻu: Fakapapauʻi ʻe he ʻōfisi vaʻá.

• Ngaahi Tuʻunga Taau: Kuo pau ko e kau ʻovasia fakasēketi pe fakavahe.

• Founga ke Kau Aí: Ko e kau ʻovasia fefonongaʻaki taau mo honau ngaahi uaifí ʻoku fakaafeʻi kinautolu ʻe he ʻōfisi vaʻá.

Akoʻanga Tohi Tapu Maʻá e Fanga Tokoua Taʻemalíc

• Taumuʻa: Ke teuʻi e kau mātuʻa mo e kau sevāniti fakafaifekau taʻemalí ki he ngaahi fatongia lahi ange. Ko e tokolahi ʻo e kau maʻu tohi fakamoʻoni akó ʻe vaheʻi ke ngāue he feituʻu ʻoku ʻi ai ha fiemaʻu ʻi honau fonua tupuʻangá. ʻE maʻu nai ʻe ha niʻihi ha vāhenga-ngāue ʻi ha fonua kehe kapau te nau fakafaingamālieʻi kinautolu.

• Lōloa: Māhina ʻe ua.

• Feituʻu: ʻOku fili ʻe he ʻōfisi vaʻá; ʻoku faʻa fai ʻi ha Holo ʻAsemipilī pe ko ha Fale Fakatahaʻanga.

• Ngaahi Tuʻunga Taau: Ko e fanga tokoua taʻemali ʻi he vahaʻa ʻo e taʻu 23 mo e 62 pea ʻoku nau moʻui lelei ʻoku nau loto ke ngāue maʻá e fanga tokouá mo e ngaahi meʻa ʻo e Puleʻangá ʻi ha feituʻu pē ʻoku ʻi ai ha fiemaʻu. (Mk. 10:29, 30) Kuo pau ke nau ngāue ʻo ʻikai toe siʻi hifo ʻi he taʻu hokohoko ʻe ua ʻi ha tuʻunga kuo fakanofo ki ai.

• Founga ke Kole Aí: Kapau ʻoku ala fakahoko ʻa e ako ko ení ʻi ho feituʻu vaʻá, ko ha fakataha maʻá e faʻahinga ʻoku mahuʻingaʻia ʻi he kau ki aí ʻe fai ia ʻi he ʻasemipilī fakasēketí. Ko ha toe fakamatala lahi ange ʻe ʻomai ia he lolotonga ʻa e fakataha ko ení.

Akoʻanga Tohi Tapu Maʻá e Ngaahi Hoa Mali Kalisitianéd

• Taumuʻa: Ke ʻoange ki he ngaahi hoa malí ʻa e ako makehe koeʻuhí ke lava ʻo ngāueʻaki kakato ange kinautolu ʻe Sihova mo ʻene kautahá. Ko e tokolahi ʻo e kau maʻu tohi fakamoʻoni akó ʻe vaheʻi ke ngāue he feituʻu ʻoku ʻi ai ha fiemaʻu ʻi honau fonua tupuʻangá. ʻE maʻu nai ʻe ha niʻihi ha vāhenga-ngāue ʻi ha fonua kehe kapau te nau fakafaingamālieʻi kinautolu.

• Lōloa: Māhina ʻe ua.

• Feituʻu: Ko e ʻuluaki ngaahi kalasi ʻe niʻihi ʻe fakahoko ia ʻi he Senitā Fakaeako Taua Leʻo ʻi Patterson, Niu ʻIoke, ʻAmelika. Hili iá, ʻe fakahoko e ako ko ení he ngaahi feituʻu ʻe fili ʻe he ʻōfisi vaʻá, ʻo faʻa fai ʻi ha Holo ʻAsemipilī pe ʻi ha Fale Fakatahaʻanga.

• Ngaahi Tuʻunga Taau: Ko e ngaahi hoa mali ʻi he vahaʻa ʻo e taʻu 25 mo e 50 pea ʻoku nau moʻui lelei ʻo maʻu ʻa e ngaahi tuʻunga ke ngāue ʻi ha feituʻu pē ʻoku ʻi ai ha fiemaʻu pea ʻoku nau maʻu ʻa e fakakaukau: “Ko au eni; ke ke fekau au.” (Ai. 6:8) ʻIkai ko ia pē, kuo pau ke nau ʻosi mali ʻo ʻikai toe siʻi hifo ʻi he taʻu ʻe ua pea ʻoku nau lolotonga ngāue taimi-kakato ʻo ʻikai toe siʻi hifo ʻi he taʻu ʻe ua hokohoko.

• Founga ke Kole Aí: Kapau ʻoku ala fakahoko ʻa e ako ko ení ʻi ho feituʻu vaʻá, ko ha fakataha maʻá e faʻahinga ʻoku mahuʻingaʻia ʻi he kau ki aí ʻe fai ia ʻi he ʻaho ʻasemipilī makehé. Ko ha toe fakamatala lahi ange ʻe ʻomai ia he lolotonga ʻa e fakataha ko ení.

Akoʻanga Tohi Tapu Taua Leʻo ko Kiliatí

• Taumuʻa: Ke akoʻi e kau tāimuʻá mo e kau sevāniti taimi-kakató ki he ngāue fakamisinalé.

• Lōloa: Māhina ʻe nima.

• Feituʻu: Senitā Fakaeako Taua Leʻo, Patterson, Niu ʻIoke, ʻAmelika.

• Ngaahi Tuʻunga Taau: Ko e ngaahi hoa mali kuo nau papitaiso ʻi he taʻu ʻe tolu pea ʻoku nau ʻi he vahaʻa ʻo e taʻu 21 mo e 38 ʻi he taimi naʻe aʻu atu ai ʻenau ʻuluaki kolé. Kuo pau ke nau lea faka-Pilitānia, ʻosi mali ʻo ʻikai toe siʻi hifo ʻi he taʻu ʻe ua, pea ʻoku nau lolotonga ngāue taimi-kakato ʻo ʻikai toe siʻi hifo ʻi he taʻu ʻe ua hokohoko. Ko e kau tohi kolé kuo pau ke nau moʻui lelei. Ko e kau tāimuʻa ʻoku ngāue ʻi ha fonua muli (kau ai e faʻahinga ʻoku nau ʻi ha tuʻunga misinale); kau ʻovasia fefonongaʻaki; ngaahi mēmipa ʻo e fāmili Pētelí; mo e kau maʻu tohi fakamoʻoni ako he kuohilí ʻo e Akoʻanga Ako Fakafaifekau, Akoʻanga Tohi Tapu Maʻá e Fanga Tokoua Taʻemalí, mo e Akoʻanga Tohi Tapu Maʻá e Ngaahi Hoa Mali Kalisitiané te nau toe kole nai kapau ʻoku nau aʻusia ʻa e ngaahi tuʻunga tāú.

• Founga ke Kole Aí: ʻI he ngaahi vaʻa kuo ʻosi fili, ko ha fakataha maʻá e faʻahinga ʻoku mahuʻingaʻia ʻi he ako ko eni ʻoku fakahoko ʻi he fakataha-lahi fakavahé. Ko ha toe fakamatala lahi ange ʻe ʻomai ia he lolotonga ʻa e fakataha ko ení. Kapau ʻoku ʻikai ha fakataha ʻi he ngaahi fakataha-lahi ho fonuá pea ʻokú ke loto ke kole ki ai, te ke tohi nai ki ho ʻōfisi vaʻá ki ha toe fakamatala lahi ange.

Akoʻanga Maʻá e Kau Mēmipa ʻo e Kōmiti Vaʻá mo Honau Ngaahi Uaifí

• Taumuʻa: Ke tokoniʻi e faʻahinga ʻoku ngāue he ngaahi Kōmiti Vaʻá ke nau tokanga lelei ange ki he ngāue hono tokangaʻi e ngaahi ʻapi Pētelí, fai ha tokanga ki he ngaahi meʻa fakangāue ʻokú ne uesia ʻa e ngaahi fakatahaʻangá, pea tokangaʻi e ngaahi sēketi mo e ngaahi vahe ʻi honau ngaahi feituʻú taki taha, pea pehē ki he liliu-lea, pulusi, mo hono fakafolau atu e ʻū tohí pea tokangaʻi mo e ngaahi potungāue kehekehe.—Luke 12:48e.

• Lōloa: Māhina ʻe ua.

• Feituʻu: Senitā Fakaeako Taua Leʻo, Patterson, Niu ʻIoke, ʻAmelika.

• Ngaahi Tuʻunga Taau: Ko e kau mēmipa ʻo e Kōmiti Vaʻá pe Kōmiti Fakafonuá pe kuo fakanofo ki he meʻa ko iá.

• Founga ke Kau Aí: Ko e fanga tokoua taau mo honau ngaahi uaifí ʻoku fakaafeʻi ʻe he Kulupu Pulé.

[Fakamatala ʻi lalo]