Jehovah’s Witnesses—Faith in Action, Part 1: Out of Darkness
ʻI he Tohi Tapú, ʻoku fakafekauʻaki ʻa e māmá mo e moʻoní, ka ʻoku fakafekauʻaki ʻa e poʻulí ia mo e loí. (Saame 43:3; ʻAi. 5:20) Naʻe fakahū mai ʻe Sētane ʻa e poʻulí ki he māmaní ʻi he taimi naʻá ne kākaaʻi ai ʻa ʻIví, pea faai mai pē ʻo ne fakauku ʻa e faʻahinga ʻo e tangatá ki he poʻuli lōlō. (Fkh. 12:9) Ko e foʻi vitiō Jehovah’s Witnesses—Faith in Action, Part 1: Out of Darkness ʻoku fakamatalaʻi ai ʻa e anga ʻo e kamata ʻa e maama fakalaumālié ke ʻasi hake mei he poʻulí. (ʻAi. 60:1, 2) Hili ʻa e mamata ʻi he foʻi vitioó, ʻe lava ke ke tali ʻa e ngaahi fehuʻi ko ení?
(1) Naʻe anga-fēfē ʻa e tupulaki ʻa e poʻuli lōloó hili e mate ʻa e kau ʻapositoló? (2) Kamata ʻi he 1100 tupú, ko e hā ʻa e ngaahi fakalakalaka naʻá ne tokoniʻi ʻa e kakaí ke nau ʻiloʻi ai ko e lotú kuo nau fuʻu hē mamaʻo? (3) Ko hai ʻa Henry Grew mo George Storrs? (4) Ko e hā ʻa e ngaahi meʻa ne hoko ʻi he moʻui ʻa Charles Russell naʻe maongo loloto kiate iá? (5) Naʻe anga-fēfē hono fakahoko ʻe Tokoua Russell, ko ʻene tangataʻeikí, mo ha ngaahi maheni ʻe niʻihi ʻenau kalasi ako Tohi Tapú, pea ko e hā ʻa e ngaahi fakamulituku Fakatohitapu naʻa nau aʻu ki aí? (6) Naʻe anga-fēfē ʻa e fio ʻa e kulupu ako Tohi Tapu ko ení mo e kulupu ʻa Nelson Barbour, ka ko e hā naʻá ne fakatupunga ʻa Tokoua Russell ke mavahé? (7) Ko e hā naʻe hoko ʻi Siulai 1879 ʻa ia naʻe kamata ai ha kuonga foʻou ʻo e maama fakalaumālié? (8) Talu mei ai, ko e hā naʻe fai ʻe he Kau Ako Tohi Tapu tokolahi fakautuutú ni ke fakamafola ʻa e ongoongo leleí? (9) ʻI he ngaahi taʻu ki muʻá, ko e hā naʻe ʻamanekina ʻe he Kau Ako Tohi Tapú ke hoko ʻi he 1914? (10) Ko e hā ʻa e ngaahi pole naʻe fehangahangai mo e Kau Ako Tohi Tapú hili ʻa e mate ʻa Tokoua Russell? (11) Ko e hā naʻe fai ʻe he Kau Ako Tohi Tapú hili hono tukuange mai mei he pilīsoné ʻo Tokoua Rutherford mo hono kaungāfeohí? (12) Kuo anga-fēfē fakalolotoʻi ʻe hoʻo mamata ʻi he foʻi vitiō ko ení ʻa hoʻo houngaʻia ʻi he kautaha ʻa Sihová? (13) Kuo anga-fēfē hono fakaivimālohiʻi ʻe he foʻi vitiō ko ení ʻa hoʻo fakapapau ke hokohoko atu faivelenga ʻa e malanga neongo ʻa e ngaahi fakafaingataʻaʻiaʻangá? (14) ʻE lava fēfē ke tau ngāueʻaki ʻa e foʻi vitiō ko ení ke tokoniʻi hotau ngaahi kāingá, kau ako Tohi Tapú, mo e niʻihi kehé?
Ko ha tofiʻa fakalaumālie mahuʻinga ē naʻe tuku mai kia kitautolu ʻe he faʻahinga ʻo e muʻaki Kau Ako Tohi Tapú! ʻI ha māmani poʻuli fakalaumālie, naʻa nau hoko ko e kau toʻo maama loto-toʻa mo faivelenga. ʻOfa ke tau faʻifaʻitaki ki heʻenau faʻifaʻitakiʻangá pea “hokohoko atu ʻa e ʻaʻeva ʻi he tuʻunga ko e fānau ʻo e māmá.”—ʻEf. 5:8.