Teuteu ki he Fakamanatú mo ha Loto-Fiefia
1. Ko e faʻahitaʻu Fakamanatú ko ha taimi makehe ia ki he hā?
1 Ko e Fakamanatu ʻi he Tūsite, 26 ʻo Maʻasí, ʻoku ʻomai ai ha faingamālie lelei ʻaupito ke fiefia ʻi he fakamoʻui kuo tokonaki mai ʻe he ʻOtuá maʻa kitautolú. (ʻAi. 61:10) Naʻa mo e ki muʻa ʻi he kātoanga ʻoku teu fakahokó, ko ha laumālie fiefia te ne tokoniʻi kitautolu ke mateuteu lelei. ʻO anga-fēfē?
2. Ko e hā ʻokú ne ueʻi kitautolu ke fai ha ngaahi teuteu ki he kātoanga Fakamanatú?
2 Teuteu ki he Kātoanga Fakamanatú: Ko e Kai Efiafi ʻa e ʻEikí ʻoku mātuʻaki mahuʻinga ka ko e kātoanga faingofua. Neongo ia, ʻoku fiemaʻu ha palani tokamuʻa koeʻuhi ke ʻoua ʻe liʻaki hono ngaahi fakaikiiki mahuʻingá. (Pal. 21:5) Kuo pau ke fili ʻa e taimi mo ha feituʻu feʻungamālie. ʻOku fiemaʻu ke ʻomai ʻa e mā mo e uaine totonu. Ko e feituʻu faiʻanga fakatahá kuo pau ke maʻa mo maau. Ko e tokotaha-malanga kuo vaheʻí ʻoku fiemaʻu ke teuteu lelei pea ko e kau tufá mo e kau fakanofonofó kuo pau ke fokotuʻutuʻu maau. ʻOku ʻikai ha veiveiua ko e lahi ʻo e ngaahi meʻá ni kuo ʻosi maau. Ko e houngaʻia ʻi he mālohi fakaefakamoʻui ʻo e huhuʻí ʻokú ne ueʻi kitautolu ke teuteu lelei ki he kātoanga toputapú ni.—1 Pita 1:8, 9.
3. ʻE lava fēfē ke tau teuʻi hotau lotó ki he Kai Efiafi ʻa e ʻEikí?
3 Teuʻi ʻa e Lotó: ʻOku toe mahuʻinga ke teuʻi hotau lotó ke mahuʻingaʻia ʻi he ʻuhinga kakato ʻo e Fakamanatú. (ʻĒsela 7:10) Ke aʻusia iá, ʻoku totonu ke tau vaheʻi ha taimi ke lāulea ai ki he lau Tohi Tapu makehe ki he Fakamanatú pea ke fakalaulauloto leva ki he ngaahi ʻaho fakaʻosiʻosi ʻo e moʻui ʻi māmani ʻa Sīsuú. Ko e fakalaulauloto ki he laumālie feilaulauʻi-kita ʻo Sīsuú te ne ueʻi kitautolu ke faʻifaʻitaki kiate ia.—Kal. 2:20.
4. Ko fē tafaʻaki ʻo e huhuʻí ʻokú ne ʻoatu kiate koe ʻa e fiefia lahi tahá?
4 Ko e pekia ʻa Kalaisí ʻoku fakatonuhiaʻi ai ʻa e tuʻunga-hau ʻo Sihová. ʻOku ʻomai ai ʻa e tauʻatāina mei he angahalá mo e maté. (1 Sio. 2:2) ʻOku fakaava ai ʻa e hala ki ha vahaʻangatae melino mo e ʻOtuá mo e hala ki he moʻui taʻengatá. (Kol. 1:21, 22) ʻOku toe tokoniʻi ai kitautolu ke fakaivimālohiʻi ʻetau fakapapau ke moʻui ʻo fehoanaki mo ʻetau fakatapui kia Sihová pea tuʻumaʻu ai pē ko ha ākonga ʻa Kalaisi. (Māt. 16:24) ʻI hoʻo teuteu pea kau atu ki he Fakamanatu ʻoku hanga maí, ʻofa ke tupulekina hoʻo fiefiá!