ʻOkú Ke Mateuteu ki he Fakamanatú?

ʻI Nīsani 13 ʻo e 33 T.S. naʻe ʻiloʻi ai ʻe Sīsū ʻoku toe pē ʻa e efiafi ʻe taha ke fakataha fakaʻosi ai mo hono ngaahi kaungāmeʻa ofí ki muʻa ke tāmateʻi iá. Te ne kātoangaʻi fakaʻosi mo kinautolu ʻa e Pāsová pea fokotuʻu leva ha kātoanga foʻou, ʻa ia ko e Kai Efiafi ʻa e ʻEikí. Ko ha kātoanga mahuʻinga pehē naʻe fiemaʻu ki ai ʻa e teuteu lelei. Ko ia, naʻá ne fekau atu ʻa Pita mo Sione ke teuteu ʻa e ngaahi meʻá. (Luke 22:7-13) Talu mei ai, ʻi he taʻu kotoa kuo hoko ia ko ha fiemaʻu ki he kau Kalisitiane ʻoku nau loto ke kātoangaʻi ʻa e Fakamanatú ke nau mateuteu ki he kātoanga ko ení. (Luke 22:19) Ko e hā ʻa e ngaahi meʻa tefito ʻoku totonu ke tau teuteu ki ai ʻi he Fakamanatu ʻoku teu ke fakahoko ʻi ʻEpeleli 3?

Teuteu ʻa e Kau Mātuʻá:

Fai ha ngaahi fokotuʻutuʻu ke ngāueʻaki ʻa e Fale Fakatahaʻangá pe ko ha holo feʻungamālie. ʻOku totonu ke ʻi ai ha ngaahi sea feʻunga, maama mo ʻea lelei. Fokotuʻutuʻu tokamuʻa ke fakamaʻa fakaʻauliliki ʻa e holó.
Fili ha tokotaha malanga taau, tokotaha sea, mo ha ongo tokoua ke fai ʻa e lotu ʻo e maá mo e uainé.
Kapau ʻoku ngāueʻaki ʻe ha fakatahaʻanga kehe ʻa e holo tatau ki he Fakamanatú, fokotuʻutuʻu lelei ʻa e taimi ki he Fakamanatú pea pehē foki ki he taimi ke hū ai ki he holó mo e tauʻanga meʻalelé mo e taimi ke mavahe aí.
Fili pea fokotuʻutuʻu maau ʻa e kau fakanofonofó mo e kau tufa ʻo e maá mo e uainé.
Fokotuʻutuʻu ke maʻu ʻa e mā mo e uaine totonú, fakataha mo e peleti, ipu uaine, ko ha tēpile mo hono meʻa ʻufiʻufi lelei.

Teuteu ʻa e Kau Malangá:

Fokotuʻutuʻu ke kau kakato ʻi he feingangāue tufa tohi fakaafe ki he Fakamanatú.
Hiki ʻa e hingoa ʻo e kau ako Tohi Tapú, kāingá, kaungāakó, kaungāngāué mo e ngaahi mahení pea fakaafeʻi kinautolu.
Lau pea fakalaulauloto ki he ngaahi konga Tohi Tapu ʻo e Fakamanatú.
Haʻu ki he Fakamanatú pea teuteu ke talitali lelei ʻa e kau ʻaʻahí.