ʻOkú Ke Mateuteu ki he Fakamanatú?

Ko e Pāsova fakaʻosi ʻa Sīsuú ʻe hoko ʻo mahuʻinga. Koeʻuhí naʻe ofi ʻene pekiá, naʻá ne fokotuʻutuʻu ke kai ʻa e houa kai ʻo e Pāsová mo ʻene kau ʻapositoló pea ke fakahaaʻi ha kātoanga foʻou fakataʻu ʻa ia ko e Kai Efiafi ʻa e ʻEikí. Ko ia naʻá ne fekauʻi ʻa Pita mo Sione ke na teuteu ʻa e lokí. (Luke 22:7-13; sio ki he fakatātā ʻi he peesi ʻuluakí.) ʻOku fakamanatu mai heni ʻa e fiemaʻu ke teuteu ki he Fakamanatú ʻi Maʻasi 27. Ngalingali kuo fokotuʻutuʻu ʻe he ngaahi fakatahaʻangá ha tokotaha malanga, ko e mā mo e uainé mo e ngaahi meʻa kehe. Kae kehe, ko e hā ʻe lava ke tau fai fakafoʻituitui ke mateuteu ai ki he Fakamanatú?

Teuteuʻi ho lotó. Lau pea fakalaulauloto ki he Lau Tohi Tapu ki he Fakamanatú. ʻE lava ke maʻu ha taimi-tēpile ʻi he Ko Hono Vakaiʻi Fakaʻaho ʻa e Tohi Tapú. ʻOku ʻi ai ha taimi-tēpile fakaikiiki lahi ange ʻi he Fakamatala Fakalahi E12 ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní. (Sio foki ki he kupu ʻo ʻEpeleli 2020 ʻo e Polokalama Ngāue ki he Fakataha Moʻuí mo e Ngāue Fakafaifekaú.) ʻE lava ke maʻu ʻe he ngaahi fāmilí ʻa e fakamatala ki he mahuʻinga ʻo e huhuʻí, ʻi hono vakaiʻi ʻa e Watch Tower Publications Index pe ko e Tataki Fakaefekumi Maʻá e Kau Fakamoʻoni ʻa Sihová ke lāulea ki ai lolotonga ʻa e lotu fakafāmilí.

Fakaafeʻi ʻa e niʻihi kehé. Kau kakato ki he feingangāue tufa tohi fakaafé. Fakakaukau fekauʻaki mo e faʻahinga ʻe lava ke ke fakaafeʻí, hangē ko ha ngaahi toe ʻaʻahi, ko ha ako Tohi Tapu ki muʻa, ngaahi maheni pe ko ha kāinga. ʻOku totonu ke fakapapauʻi ʻe he kau mātuʻá ke fakaafeʻi ʻa e faʻahinga ʻikai longomoʻuí. Manatuʻi kapau ʻoku ʻi ai ha taha ʻoku ʻikai nofo ʻi ho feituʻú, ʻe lava ke ke maʻu ʻa e taimi mo e feituʻu ki he Fakamanatú ʻi hono lomiʻi ʻa e FEKAUʻAKI MO KIMAUTOLU ʻi he peesi tefito ʻo e jw.org pea fili leva ʻa e “Fakamanatu.”

Ko e hā mo ha toe meʻa ʻe lava ke tau fai ke mateuteu aí?