Ko Hai ʻe Mahuʻingaʻia Nai Hení?
1. ʻI heʻetau lau ʻa ʻetau tatau ʻo e Taua Leʻo pe ʻĀ Hake! ko e hā ʻoku totonu ke tau fakakaukau ki aí, pea ko e hā hono ʻuhingá?
1 Ko e Taua Leʻo mo e ʻĀ Hake! ʻoku teuteu ia mo e fakakaukau ki he kakai te nau lau ʻi māmani lahí. Ko ia ai, ko e ngaahi kupú ʻoku lave ia ki he ngaahi kaveinga kehekehe. ʻI heʻetau lau ʻa e kupu taki taha ʻi heʻetau tataú tonu, ʻoku totonu ke tau fakakaukau pe ko hai ʻa e faʻahinga pau ʻe mahuʻingaʻia aí pea ʻai ko ʻete taumuʻá ia ke tuʻuaki leva ia ki ai.
2. Ko e hā ʻa e ngaahi kaveinga ʻi heʻetau makasiní ʻe tautefito ʻa e mahuʻingaʻia ai ʻa e niʻihi?
2 ʻOku lāulea nai ʻa e Taua Leʻo lolotongá ki ha kaveinga ʻi he Tohi Tapú naʻá ke talanoa ki ai mo hao kaungāngāue ki muʻa? ʻOku ʻi ai nai ha kupu ʻi he moʻui fakafāmilí ʻe ala hoko ʻo tokoni ki hao kāinga? ʻOku ʻi ai nai hao maheni ʻoku ʻamanaki ke folau ki ha fonua ʻa ia kuo lave ki ai ʻi he ʻĀ Hake!? ʻE fakamānako nai ʻa e taha ʻo e ngaahi makasiní ki ha ngaahi pisinisi pe ngaahi potungāue fakapuleʻanga fakalotofonua ʻi ho feituʻu ngāué? Ko e fakatātaá, ko ha makasini ʻoku lave ki he ʻekonōmiká ʻe mahuʻingaʻia nai ai ʻa e kau maʻu pisinisí. Ko e ngaahi potungāue fakalaó te nau mahuʻingaʻia nai ʻi ha makasini ʻoku fakakaveinga ki he faihiá.
3. Lave ki ha hokosia ʻoku fakahaaʻi ai ʻa e mahuʻinga ʻo hono tuʻuaki ʻa e ngaahi ʻīsiu pau ʻo e makasiní ki he faʻahinga ʻoku tau fakakaukau nai te nau mahuʻingaʻia ai.
3 Ngaahi Olá: Hili hono maʻu ʻo e ʻĀ Hake! ʻo Sanuali-Maʻasi 2012 ʻi he kaveinga ko e “Founga Hono ʻOhake ha Fānau Fua Fatongia,” naʻe telefoni ai ha ongo meʻa mali mei ʻAfilika Tonga ki he ʻapiako ʻe 25 ʻi he feituʻu ngāue ʻo ʻenau fakatahaʻangá. Ko e ʻapiako ʻe 22 ai naʻa nau tali ha ngaahi tatau pea tufa ia ki heʻenau fānau akó. Ko ha ongo meʻa mali kehe ʻi he fonua ko iá naʻá na maʻu ʻa e fakakaukau tatau ʻo na tufa ai ha ngaahi tatau ʻi he ngaahi ʻapiako ʻi hona feituʻu ngāué. Naʻe loto ʻa e taha ʻo e kau faiako ʻi he ngaahi ʻapiakó ke ngāueʻaki ʻa e makasiní ʻi heʻenau polokalama fakahinohino ki he lēsoní mo e lautohi fakauiké. Naʻe vahevahe ai ʻe he ongo meʻa malí ni ʻena hokosiá mo e ʻovasia sēketí. ʻA ia naʻá ne fakalototoʻaʻi ʻa e ngaahi fakatahaʻanga ʻi heʻene sēketí ke nau fakakau ʻa e ngaahi ʻapiakó ʻi heʻenau ngaahi feituʻu ngāué. Naʻe maʻu ai ʻe he ʻōfisi vaʻá ʻa e ngaahi kole lahi ʻaupito ki ha toe ngaahi makasini pea pau ai ke toe pulusi ʻa e ʻīsiu ko ení.
4. Ko e hā ʻoku fiemaʻu ai ke tau tuʻuaki ʻa e ngaahi makasiní ki he tokolahi taha ʻe ala lavá?
4 Ko ʻetau ngaahi makasiní ʻoku lāulea ai ki he ʻuhinga moʻoni ʻo e ngaahi meʻa ʻoku lolotonga hokó pea fakahanga ʻa e tokangá ki he Tohi Tapú mo e Puleʻanga ʻo e ʻOtuá. Ko e makasini pē ia ʻi māmani ʻokú ne “fakaha ae fakamoui.” (ʻAi. 52:7, PM) Ko ia ai, ʻoku fiemaʻu ke tau tuʻuaki atu ia ki he tokolahi taha ʻe ala lavá. Ko e founga lelei ʻe taha ke fai ai ení ko e ʻeke hifo kiate koe, ‘Ko hai ʻe mahuʻingaʻia nai hení?’