Ngaahi Faingamālie Lahi Ange ke Fakahīkihikiʻi Ai ʻa Sihova
1. Ko e hā ʻa e fokotuʻutuʻu foʻou ʻe tokoniʻi ai kitautolu ke tau “fakafetaʻi lahi kia Sihova”?
1 ʻI Maʻasi kuo toki ʻosí, naʻe ʻi ai ha fokotuʻutuʻu foʻou ʻa ia naʻe ʻoange ai ki he kau malangá ʻa e faingamālie ke nau tāimuʻa tokoni ʻi Maʻasi mo ʻEpeleli pea mo e lolotonga ʻo e māhina ʻo e ʻaʻahi ʻa e ʻovasia sēketí ʻo fiemaʻu ai ʻa e taki houa ʻe 30. Kapau ko e ʻaʻahi ʻa e ʻovasia sēketí ʻoku fakatou maʻu ai ʻa e ongo māhina ʻe ua, ko e kau malanga ʻoku nau kole ki he houa ʻe 30 ʻe malava nai ke nau fili ki ha taha ʻo e ongo māhiná ke tāimuʻa tokoni ai. Ko e kau tāimuʻa tokoni kotoa pē te nau kau kakato nai ki he fakataha ʻokú ne fai mo e kau tāimuʻa tuʻumaʻú mo e tāimuʻa makehé. ʻOku ʻuhinga eni kapau ʻoku ʻikai malava ke tau maʻu ʻa e houa ʻe 50, te tau kei malava pē ke fakahīkihikiʻi pe “fakafetaʻi lahi kia Sihova” ko e kau tāimuʻa tokoni ʻo aʻu ʻo tuʻo fā ʻi he taʻu fakataha mo e houa ʻe 30!—Saame 109:30; 119:171.
2. Ko e hā ʻa e meʻa ʻe fiefia ai ʻa e faʻahinga ʻoku tāimuʻa tokoni lolotonga ʻa e ʻaʻahi ʻa e ʻovasia sēketí?
2 Lolotonga ʻa e ʻAʻahi ʻa e ʻOvasia Sēketí: ʻE malava ʻa e tokolahi ange ʻi he taimí ni ke tāimuʻa tokoni lolotonga ʻa e ʻaʻahi ʻa e ʻovasia sēketí pea fiefia ʻi he fefakalototoʻaʻaki ʻoku maʻu he ngāue fakataha mo ia ʻi he ngāue fakafaifekaú. (Loma 1:11, 12) Ko e kau tāimuʻa tokoni tokolahi te nau fokotuʻutuʻu nai ke nau mālōlō ʻi ha foʻi ʻaho lolotonga ʻa e uiké koeʻuhí ke ngāue fakataha mo e ʻovasia sēketí. Ko e faʻahinga ʻoku nau ngāue fakamāmani lolotonga ʻa e uiké ʻe lava ke nau kole kiate ia ke ngāue fakataha mo kinautolu ʻi he Tokonakí pe Sāpaté. Tānaki atu ki aí, he meʻa fakalototoʻa ē ke kau atu ʻa e kau tāimuʻa tokoní ki he fakataha tāimuʻá fakataha mo e kau tāimuʻa tuʻumaʻú mo e tāimuʻa makehé!
3. Ko e hā ko ha taimi lelei moʻoni ai ʻa e faʻahitaʻu Fakamanatú ke tāimuʻa tokoni aí?
3 Lolotonga ʻa Maʻasi mo ʻEpelelí: Ko e faʻahinga naʻa nau ngāue lelei ʻaki ʻa e muʻaki fokotuʻutuʻu ki muʻa ke tāimuʻa tokoni mo e fiemaʻu houa ʻe 30 ʻi he māhina ʻe taha lolotonga ʻa e faʻahitaʻu Fakamanatú ʻe lava ʻo liunga ua ʻi he taimí ni ʻenau “feilaulau ʻo e fakafetaʻi”! (Hep. 13:15) Fakatouʻosi ʻa Maʻasi mo ʻEpeleli ko e ongo māhina lelei moʻoni ia ke fakalahi atu ai ʻetau ngāue fakafaifekaú ko ha kau tāimuʻa tokoni. ʻI he taʻu taki taha lolotonga ʻa e ngaahi māhina ko iá, ʻoku tau kau ai ʻi ha feingangāue fakafiefia ke fakaafeʻi ʻa e niʻihi kehé ke nau maʻu ʻa e Fakamanatú. Tānaki atu ki aí, koeʻuhi ko e tokolahi ʻoku nau fakalahi ʻenau ngāue fakafaifekaú lolotonga ʻa e faʻahitaʻu Fakamanatú, ʻe lava ke tau ngāue ai mo ha kau malanga kehekehe. Hili ʻa e Fakamanatú, ʻoku tau toe foki ai ki he faʻahinga mahuʻingaʻia naʻa nau kau ki aí pea fakaʻaiʻai ke nau vēkeveke ke maʻu ʻa e malanga makehe maʻá e kakaí. ʻE ueʻi nai koe ʻe ho lotó ke ke ngāueleleiʻaki ʻa e ngaahi faingamālie lahi ange ko ení ke ke tāimuʻa tokoni ai?—Luke 6:45.