Founga ke Teuteu Ai ha Lea Kamata Ola Lelei
1. Ko e hā ʻoku mahuʻinga ai ha lea kamata ola lelei?
1 ʻI he hangē ha meʻa fakaifoifo kai ʻokú ne fakaʻaiʻai ha fakatuʻamelie atu ki ha houa kai, ko ha lea kamata lelei ʻokú ne fakaava ai ha matapā ki ha fetalanoaʻaki Fakatohitapu lelei. Ko e ngaahi lea kamata ola leleí ʻoku kehekehe nai ʻi honau lōloá mo e fakaleá, kae hangē ha meʻakai ifo vovo, ʻoku fiemaʻu maʻu pē ʻa e fakakaukau tokamuʻá mo e teuteu leleí. (Pal. 15:28) Ko e hā ʻokú ne ʻai ha lea kamata ke ola lelei?
2. ʻE anga-fēfē nai haʻatau teuteu ha lea kamata ʻoku fakamānako?
2 Fili ʻa e Ngaahi Kaveinga ʻOku Fakamānakó: Ko ʻetau lea kamatá kuo pau ke ne langaʻi ʻa e mahuʻingaʻiá, pe ko hono fakangata nai ʻe he tokotaha-ʻapí ʻa e fetalanoaʻakí. Ko ia ʻi he taimi ʻo e teuteú, fakakaukau fekauʻaki mo e faʻahinga mahuʻingaʻia ʻi he feituʻu fakalotofonuá. ʻOku mahuʻingaʻia ʻa e kakai ʻi he feituʻú he founga-pule leleí, moʻui fakafāmili fiefiá pe ko hano fakangata ʻa e taú? ʻOku anga-maheniʻaki ʻe he kakaí ke ʻomai ʻenau fakakaukaú, ko ia teuteu ha fehuʻi fakatupunga-fakakaukau. ʻE lava ke ke ngāueʻaki ʻa e taha ʻo e ngaahi sīpinga lea kamata mei he Ko ʻEtau Ngāue Fakafaifekau pea feʻunuʻaki ia ki hoʻo feituʻu ngāué? Ko e hā ʻoku ʻikai toutou ʻahiʻahiʻi ai ʻa e niʻihi ʻo e ngaahi lea kamatá lolotonga hoʻomou efiafi Lotu Fakafāmilí?
3. ʻE anga-fēfē nai haʻatau liliu ʻetau lea kamatá ki he puipuituʻa mo e anga fakafonua ʻo kinautolu ʻi hotau feituʻu ngāué?
3 Fakakaukau ki he Anga Fakafonuá mo e Puipuituʻá: ʻI he ngaahi feituʻu ʻe niʻihi, ʻoku ʻamanekina meiate kitautolu ke fakahaaʻi ʻi he taimi pē ko iá ʻa e ʻuhinga ʻo ʻetau ʻaʻahí. ʻI he ngaahi feituʻu kehé, ʻoku lau ia ai ko e anga-taʻefakaʻapaʻapa kapau ʻe ʻikai ʻuluaki ʻeke ʻe he tokotaha ʻaʻahí fekauʻaki mo e tuʻunga ʻo e tokotaha-ʻapí mo vahevahe nai ha fakamatala fakafoʻituitui. ʻI he feituʻu ʻe niʻihi, ko e puipuituʻa fakalotu ʻo e kakaí ʻe fakaʻatā ai kitautolu ke tau ngāueʻaki tauʻatāina ʻa e Tohi Tapú ʻi heʻetau lea kamatá. (Ngā. 2:14-17) Kae kehe, ko e kakai ʻoku nau kau ki he lotu ʻikai Kalisitiané pe ʻikai ʻaupito kau ki ha lotú, ʻe lelei ange nai ke lave ki he Tohi Tapú ʻi he toe ʻaʻahí kae ʻikai ko e ʻuluaki ʻaʻahí.—Ngā. 17:22-31.
4. Ko e hā ʻoku totonu ke tau tokanga ki ai ʻi heʻetau fai ha ngaahi lea kamata?
4 Ngaahi Lea Kamatá: Teuteu lelei hoʻo ngaahi lea kamatá. Ko e ngaahi sētesi nounou mo faingofuá ʻoku faʻa lelei tahá. ʻOku mātuʻaki mahuʻinga foki ʻa e founga ʻoku tau ʻoatu ai ʻetau ngaahi lea kamatá. Hoko ʻo faivelenga. Fakahaaʻi ha malimali loto-moʻoni, ʻa ia ʻoku fakahāhā ai ʻa e mahuʻingaʻia fakafoʻituitui ʻi he tokotaha-ʻapí. Ko e muimui ʻi he ngaahi fokotuʻu ko ení ʻe tokoniʻi ai kitautolu ke teuteu ha ngaahi lea kamata ʻe fakaʻaiʻai ai ʻa e kakai ʻi hotau feituʻu ngāué ke nau kai ʻi he “tēpile ʻa Sihová.”—1 Kol. 10:21.