Fakaleleiʻi ʻEtau Pōtoʻi ʻi he Ngāue Fakafaifekaú—Teuteu ʻEtau Ngaahi Lea Kamatá

ʻUhinga ʻOku Mahuʻinga Aí: Kapau ko ʻetau lea kamatá ʻoku ʻikai ke ne langaʻi ʻa e mahuʻingaʻiá, ʻe fakangata nai ʻe he tokotaha-ʻapí ʻa e fetalanoaʻakí ki muʻa ke tau fai ai ha faifakamoʻoni. Ko ia ai, ko e kau malanga tokolahi ʻoku nau fakakaukau ko ʻenau ngaahi lea kamatá ʻa e konga mahuʻinga taha ʻi heʻenau tuʻuakí. Neongo ʻoku ʻomai ʻi he Ko ʻEtau Ngāue Fakafaifekau mo e kiʻi tohi Founga ke Kamata mo Hoko Atu ʻa e Fetalanoaʻaki Fakatohitapú ha ngaahi sīpinga tuʻuaki, ka ʻoku ʻikai ke faʻa ʻomai kakato ai ʻa e lea kamatá, koeʻuhí kae malava ke fai ha ngaofengofua. Pea kapau ʻoku kakato ʻa e sīpinga tuʻuakí, ʻe fili nai ʻa e kau malangá ke liliu pe teuteu pē ʻe kinautolu ʻenau tuʻuaki. Ko ia ai, te tau hoko ʻo ola lelei ange kapau ʻoku tau teuteu lelei ʻetau ngaahi lea kamatá kae ʻikai ko e leaʻaki pē ʻa e ngaahi meʻa ʻoku haʻu ki hotau ʻatamaí ʻi he taimi ʻoku fakaava ai ʻe he tokotaha-ʻapí ʻa e matapaá.—Pal. 15: 28.

Founga Hono Fai Iá:

Fili hoʻo kaveingá. Pea ʻoku totonu ke makatuʻunga ia ʻi he tohi ʻokú ke tuʻuakí pea mo mahuʻingaʻia ai ʻa e kakai ʻi ho feituʻu ngāué.
Teuteu lelei ʻa e sētesi ʻuluaki mo e ua ko ia te ke leaʻakí hili hoʻo fai ʻa e lea fakafeʻiloaki anga-mahení. Te ke kamata leaʻaki nai: “ʻOku ou ʻi hení koeʻuhí . . . ,” “Ko e kakai tokolahi ʻoku nau hohaʻa fekauʻaki mo e . . . ,” “ʻOku ou fieʻilo ki he anga hoʻo fakakaukau ki he . . . ,” pe ko ha toe meʻa kehe. Ko e ngaahi sētesi nounou mo faingofuá ʻoku faʻa lelei maʻu pē. Ko e kau malanga ʻe niʻihi ʻoku nau fili ke ako maʻuloto ʻenau lea kamatá.
Faʻu ha fehuʻi fakatupu fakakaukau te ne tohoakiʻi mai ʻa e tokotaha-ʻapí ki ha fetalanoaʻaki. (Māt. 17:25) Manatuʻi ko e ki muʻa ke ke aʻu atú, ngalingali naʻe ʻuluaki fakakaukau ia ki ha ngaahi meʻa kehe, ko ia ai ko e fehuʻí ʻoku totonu ke ʻoua ʻe fuʻu faingataʻa pe fakahohaʻasi ia.

ʻAhiʻahiʻi Eni ʻi he Lolotonga ʻa e Māhiná:

Vaheʻi ha taimi ʻi he lolotonga ʻa e lotu fakafāmilí ke teuteu mo ʻahiʻahiʻi ai hoʻo ngaahi lea kamatá.
ʻI he ngāue fakafaifekaú, vahevahe ʻa e meʻa ʻokú ke teuteu ke leaʻakí mo e kau malanga kehé. (Pal. 27:17) Liliu hoʻo lea kamatá kapau ʻoku ʻikai ola lelei.