Hoko ʻa ʻAokosi ko ha Māhina Ngāue Fakahisitōlia!

1. Ko e hā ʻa e feingangāue makehe ʻe fakahoko ʻi māmani lahi ʻi heʻetau ofi atu ko ia ki he taʻu 100 ʻo e Puleʻangá?

¹ Kuo mei hoko ʻa e taʻu 100 ʻo hono fanauʻi ʻo e Puleʻanga ʻo e ʻOtuá. He feʻungamālie ē ke tau fakalāngilangiʻi ʻa Sihova ʻo fakafou ʻi ha feingangāue makehe! ʻI he lolotonga ʻo ʻAokosí te tau kau atu ai ki hono tufaki ʻi māmani lahi ʻa e tuleki foʻou ʻoku fakakaveinga Te Tau Maʻu mei fē ʻa e Tali ki he Ngaahi Fehuʻi Lalahi ʻi he Moʻuí? ʻI he tuleki ko ení ʻokú ne fakalototoʻaʻi ʻa e kau lautohí ke nau kumi ki he ngaahi talí mei he Tohi Tapú pea toe fakamatala ki he founga ʻe leva ke nau maʻu ai ʻa e tokoni ʻi he jw.org.

2. ʻE lava fēfē ke tau kau atu ki he ‘kalaga leʻo lahi, i he fakafetai kia Jihova’ ʻi he lolotonga ʻo e māhina ko ʻAokosí?

² Kalanga Leʻo-Lahi ʻi he Fakafetaʻi: Ke tokoniʻi ʻa e kau malangá ke fakalahi atu ʻenau ngāue fakafaifekaú, kuo fai ai ha tokonaki makehe ki ha taha pē ʻoku loto ke tāimuʻa tokoni ʻi he māhina ko ʻAokosí. Lolotonga ʻo e māhina ko iá, ʻe ʻatā ai ki he kau malanga ʻosi papitaisó ke nau tāimuʻa tokoni ʻo ngāueʻi ʻa e houa ʻe 30. Ko e kau malanga tokolahi ʻoku nau ngāue paʻanga pe ako ʻi he lolotonga ʻo e uiké, ʻe malava ke nau tāimuʻa tokoni koeʻuhí ʻoku ʻi ai ʻa e Falaite, Tokonaki mo e Sāpate ʻe nima ʻi ʻAokosi. Kapau ʻoku ʻi ai haʻo ako Tohi Tapu fakalakalaka pe ko ha kiʻi tama ʻoku loto ke hoko ko ha tokotaha malanga, fakalea leva ki he sea ʻo e kulupu ʻo e kau mātuʻá. He fakalototoʻa ē ke kau mai mo kitautolu ʻa e faʻahinga ko iá ʻi he hoko ko e kau malanga ʻi he lolotonga ʻo e māhina mahuʻinga ko ení! Neongo ko e tokolahi ʻo e kau tāimuʻa tuʻumaʻú ʻoku nau mālōlō ʻi he lolotonga ʻo ʻAokosí hili hono fakakakato ʻenau houa ki he taʻú, ʻe malava nai ke nau feʻunuaki ʻenau taimi-tēpilé koeʻuhí ka nau kau kakato atu ki he feingangāue makehe ko ení. Ko e taimi eni ke lāulea ai ʻa e ngaahi fāmilí ki he founga ʻe lava ke nau kau atu ai ki he ‘kalaga leʻo lahi, i he fakafetai kia Jihova’ ʻi he lolotonga ʻo e māhina ko ʻAokosí.—ʻĒsela 3:11, PM; Pal. 15:22.

3. Ko e hā ʻoku ʻamanaki atu ki ai ʻi he feingangāue makehe ko ení?

³ Neongo naʻa tau kau ʻi he feingangāue meimei tatau ʻi he kuohilí ʻoku tau ʻamanaki ʻe hoko eni ko ha meʻa fakahisitōlia. ʻE lava ke tau aʻusia ha tumutumu foʻou ʻo e ngaahi houa, kau malanga mo e kau tāimuʻa tokoni lolotonga ʻo e māhina ko ʻAokosí? ʻI heʻetau aʻu ki he ngataʻanga ʻo e taʻu fakangāue 2014, ʻofa ke tāpuakiʻi ʻe Sihova ʻa e ngaahi feinga kotoa ʻo hono kakaí ʻi māmani lahi ʻi hono ʻai ʻa e māhina ko ʻAokosí ko e māhina faifakamoʻoni lahi taha ia ʻi ha toe taimi!—Māt. 24:14.