ʻOku Fēfē ʻEku Hā kia Sihová?
1. ʻOku anga-fēfē hoko ʻa e Tohi Tapú ʻo hangē ha sioʻatá?
1 ʻOkú ke faʻa sio ki he sioʻatá? Ko e tokolahi taha ʻo kitautolu ʻoku tau sio fakaʻaho ki ai koeʻuhí ʻoku tokoni eni ke tau ʻiloʻi ʻa e ngaahi tafaʻaki ʻi hotau fōtunga hā maí ʻa ia ʻe fiemaʻu ke fai ha tokanga ki ai. ʻOku fakatatau ʻa e Tohi Tapú ki ha sioʻata. Ko hono lau ʻa e Folofola ʻa e ʻOtuá ʻokú ne fakamafeia ai kitautolu ke tau malava ʻo sio ki hotau tangata ʻi lotó, ʻa e meʻa ʻoku vakai ki ai ʻa Sihová. (1 Sām. 16:7; Sēm. 1:22-24) ʻOku lava ʻe he Folofola ʻa e ʻOtuá ʻo “vavanga ki he ngaahi fakakaukau mo e ngaahi taumuʻa ʻo e lotó.” (Hep. 4:12) ʻE lava fēfē ʻe he lau mo e fakalaulauloto ʻi he Tohi Tapú he ʻaho kotoa, ʻo tokoniʻi kitautolu ke tau sio ki he ngaahi tafaʻaki ʻoku totonu ke tau fakaivimālohiʻí, kae malava ke tau hoko ko e kau ʻevangeliō lavameʻa angé?—Saame 1:1-3.
2. ʻE lava fēfē ke tokoniʻi kitautolu ʻe he Tohi Tapú ke tau fai ha sivisiviʻi-kita?
2 Ngāueʻaki ʻa e Tohi Tapú Hangē ha Sioʻatá: Ko e ngaahi fakamatala Fakatohitapu ʻo kau ki he kau sevāniti faitōnunga ʻa Sihová ʻoku akoʻi ai kitautolu ki he ngaahi ʻulungaanga ʻoku fakaʻofoʻofa kiate iá. Ko e fakatātaá, naʻe fakahāhaaʻi ʻe Tēvita ʻa e faivelenga maʻá e huafa ʻo e ʻOtuá. (1 Sām. 17:45, 46) Naʻe pole loto-toʻa ʻa ʻAisea ke malanga ʻi he feituʻu ngāue faingataʻá. (ʻAi. 6:8, 9) Ko e ʻofa loloto ʻa Sīsū ki heʻene Tamai fakahēvaní naʻe ueʻi ai ia ke ne vakai ki he ngāue fakafaifekaú ko e matavai ʻo e fakaivifoʻou mo e fakafiemālie kae ʻikai ko e kavenga fakamafasia. (Sione 4:34) Ko e kau Kalisitiane ʻi he ʻuluaki senitulí naʻa nau malanga faivelenga, falala kia Sihova mo fakapapauʻi ke ʻoua ʻe foʻi. (Ngā. 5:41, 42; 2 Kol. 4:1; 2 Tīm. 4:17) Ko e fakalaulauloto ki he ngaahi faʻifaʻitakiʻanga ko iá ʻoku tokoniʻi ai kitautolu ke tau sivisiviʻi kitautolu tonu mo e taumuʻa ke fakaleleiʻi ʻa e tuʻunga ʻetau ngāue toputapú.
3. Ko e hā ʻoku totonu ai ke ʻoua te tau tautoloi ʻi hono fai ʻa e ngaahi fakatonutonu ʻoku fiemaʻú?
3 Ngāue ke Fakatonutonu ha Ngaahi Mele: Ko hono moʻoní, ʻoku ʻikai ke ʻaonga ʻa e sio ki he sioʻatá pea tukunoaʻi ha ngaahi mele. ʻE lava ke tau kole kia Sihova ke ne tokoniʻi kitautolu ke tau maʻu ha vakai totonu kiate kitautolu pea tokoni mai ke tau fai ʻa e ngaahi fakatonutonu ʻoku fiemaʻú. (Saame 139:23, 24; Luke 11:13) Koeʻuhi ko e taimi ʻoku toé ʻoku tātāiʻi pea ʻoku kaunga ki ai ʻetau moʻuí, kuo pau ai ke ʻoua te tau tautoloi ʻi hono fai ʻa e ngaahi liliu mahuʻinga ʻoku fiemaʻú.—1 Kol. 7:29; 1 Tīm. 4:16.
4. Ko e hā ʻoku hoko ki ha tangata ʻoku sio fakamamaʻu ki he Folofola ʻa e ʻOtuá pea ngāue ki he meʻa kuó ne ʻiloʻí?
4 Ko e tangata ʻi lotó—ʻa e meʻa ʻoku vakai mai ki ai ʻa Sihová—ʻoku mahuʻinga mamaʻo ange ia ʻi he fōtunga hā mai ʻo ha tokotaha. (1 Pita 3:3, 4) Ko e hā ʻoku hoko ki he tangata ʻoku sio fakamamaʻu ki he Folofola ʻa e ʻOtuá pea ngāue ki he meʻa kuó ne ʻiloʻí? ʻOkú ne “hoko ai, ʻo ʻikai ko ha tokotaha fanongo pea ngalo, ka ko ha tokotaha fai ʻo e ngāué, pea te ne fiefia ʻi heʻene fai iá.” (Sēm. 1:25) ʻIo, te tau hoko ai ko e kau faifekau fiefia mo ola lelei koeʻuhí ʻoku tau “tapua atu ʻo hangē ha ngaahi sioʻatá ʻa e lāngilangi ʻo Sihová.”—2 Kol. 3:18.